ଯାତ୍ରା ଜଗତର ଯୁବ ହାସ୍ୟାଭିନେତା ଗୁରିଆ ସାହୁ। ଘର ଜଗତ୍ସିଂହପୁର ଜିଲାର ରେଢୁଆ। ପିଲାଟି ବେଳରୁ କଳା ପ୍ରତି ସଉକ ଥିଲା। ଅଭିନୟ କ’ଣ ଜାଣିବା ଆଗରୁ ସେ ଅଭିନୟ ପ୍ରତି ଆକର୍ଷିତ ହୋଇଥିଲେ। ତେଣୁ ପଳେଇ ଆସିଲେ ଯାତ୍ରା ପାର୍ଟିକୁ। ପ୍ରଥମେ ଜଣେ ଜୁନିଅର ଆର୍ଟିଷ୍ଟ ଭାବେ ଯୋଗଦେଲେ ବାଣେଶ୍ୱରୀ ଗଣନାଟ୍ୟରେ। ଛୋଟପିଲା ଭୂମିକାରେ ଅଭିନୟ କଲେ। ଧୀରେଧୀରେ ବୟସ ବଢ଼ିଲା। ଆଉ ଅଭିଜ୍ଞତା ବି ବଢ଼ିଲା। ତାଙ୍କର ଇଚ୍ଛା ଥିଲା ସେ ବଡ଼ହୋଇ ହାସ୍ୟାଭିନେତା ହେବେ। କଥା କହି ହସେଇ ପକଉଥିଲେ। ତେଣୁ ଅନୁଷ୍ଠାନ ପକ୍ଷରୁ ତାଙ୍କୁ ହାସ୍ୟ ଭୂମିକାରେ ଠିଆ କରାଗଲା। ବାସ୍, ତା’ପରେ ସେ ପାଲଟିଗଲେ ହାସ୍ୟାଭିନେତା। ବାଣେଶ୍ୱରୀରୁ କମେଡିଆନ୍ ଭାବେ କ୍ୟାରିୟର ଆରମ୍ଭ କରିଥିବା ଗୁରିଆ ସାହୁ ଓରଫ୍ ଗୁରିଆ ଇତିମଧ୍ୟରେ ନିୟତି, ପାର୍ବତୀ, ବାଘାଯତୀନ, ଯାତ୍ରା ନନ୍ଦନକାନନ, ରଙ୍ଗମହଲ ପ୍ରଭୃତି ଅନୁଷ୍ଠାନରେ ନିଜର ଅଭିନୟ ଦକ୍ଷତା ଦେଖାଇ ସାରିଛନ୍ତି। ଆସନ୍ତା ଯାତ୍ରା ସିଜନ୍ରେ ସେ ତୁଳସୀ ଗଣନାଟ୍ୟରେ ଯୋଗ ଦେଇଛନ୍ତି। ସେ ଅଭିନୟ କରିଥିବା ନାଟକଗୁଡ଼ିକ ମଧ୍ୟରେ ରହିଛି କଥା ଦେଇ କଥା ରଖିଲୁ ନାହିଁ, ସଜେଇ ଦିଅଲୋ ବେଦିକି ଯିବି, ଭଲ ପାଇଥିଲି ରଜାଝିଅକୁ, କଙ୍କାଳ ଡାକୁଛି ଆ, ମଙ୍ଗୁଳି ଛକରେ ଲଙ୍ଗଳା ଲୋକ, ଅମଡ଼ା ବାଟ, ଆସନ୍ତାକାଲି ଓଡ଼ିଶା ବନ୍ଦ, କିଣିନେଲା ମନ କଳାନାଗର, ମିଛୁଆ ରାଧୁଆ ଗପ ସରିଲା, ବାହା ହେଇଛ ନା ବାଡୁଅ ଅଛ। ନିଜର କମେଡି ସମ୍ପର୍କରେ ମତ ଦେଇ ଗୁରିଆ କହନ୍ତି- ସିଚୁଏଶନ୍ ଅନୁଯାୟୀ ଆମକୁ ମଝିରେ ମଝିରେ ମସଲା ଦେଇ ଲୋକଙ୍କୁ ହସେଇବାକୁ ପଡ଼େ। ଆସନ୍ତା ଯାତ୍ରା ସିଜନ୍ରେ ଦର୍ଶକମାନଙ୍କୁ ଭରପୂର ମନୋରଞ୍ଜନ ଯୋଗେଇଦେବେ ବୋଲି କହିଛନ୍ତି ଏହି ହାସ୍ୟାଭିନେତା।