ତିହିଡ଼ି, ୨୮।୭ (ଡି.ଏନ.ଏ.) – ଭଦ୍ରକ ଜିଲା ତିହିଡ଼ି ବ୍ଲକରେ ବର୍ଷା ଅଭାବରୁ ମରୁଡ଼ି ପରିସ୍ଥିତି ଦେଖାଦେଇଛି। ଅପରପକ୍ଷେ ବିଭିନ୍ନ ପଞ୍ଚାୟତରେ ଜମିକୁ ଜଳସେଚିତ କରିବା ପାଇଁ ରହିଥିବା ଦଶମୌଜା କେନାଲ ଶୁଖିଲା ପଡ଼ିଛି। କେନାଲରେ ପ୍ରଚୁର ପାଣି ଛଡ଼ାଯାଉଥିଲେ ମଧ୍ୟ ତାହା ତଳମୁଣ୍ଡର ଥିବା ଜମି ପାଖରେ ପହଞ୍ଚତ୍ ପାରୁନାହିଁ। ଉପରମୁଣ୍ଡରେ ଥିବା ଚାଷୀମାନେ କେନାଲରେ ବନ୍ଧ କରି ଜମିକୁ ପାଣି ଉଠାଇ ଚାଷ କାର୍ଯ୍ୟ କରୁଥିବାରୁ ଏଭଳି ପରିସ୍ଥିତି ଉପୁଜିଥିବା କୁହାଯାଇଛି। ଏହା ତଳମୁଣ୍ଡରେ ଥିବା ଚାଷୀଙ୍କୁ ନିରାଶ କରିଛି। ସାଳନ୍ଦୀ ଜଳସେଚନ ବିଭାଗ ପକ୍ଷରୁ କୌଣସି ତତ୍ପରତା ନ ଥିବାରୁ କେତେଜଣ ଚାଷୀ ମନଇଚ୍ଛା କାର୍ଯ୍ୟ କରୁଥିବା ଅଭିଯୋଗ ହେଉଛି। ଖରିଫ୍ ଧାନଚାଷ ଆରମ୍ଭରୁ ପାଣିପାଗ ପ୍ରତିକୂଳ ଅବସ୍ଥାରେ ରହିଛି। ଆବଶ୍ୟକ ପରିମାଣରେ ବର୍ଷା ହେଉ ନ ଥିବାରୁ ଚାଷଜମି ଶୁଖି ଫାଟି ଅଁା କଲାଣି। ତଳି ଓ ବୁଣାଧାନ ପାଣି ଅଭାବରୁ ହଳଦିଆ ପଡ଼ିଗଲାଣି। ପାଣି ସୁବିଧା ଥିବା ଅଳ୍ପ କେତେକ ସ୍ଥାନରେ ଚାଷୀମାନେ ପମ୍ପସେଟ ସହାୟତାରେ ପାଣି ମଡ଼ାଇ ଚାଷକାର୍ଯ୍ୟ ଆରମ୍ଭ କରିଛନ୍ତି।
ବ୍ଲକର ୯ଟି ପଞ୍ଚାୟତର ଚାଷଜମି ଦଶମୌଜା କେନାଲ ଦ୍ୱାରା ଜଳସେଚିତ ହୋଇଥାଏ। ଏହି କେନାଲ ଏବେ କଳମବଣରେ ଭର୍ତ୍ତି ହୋଇଛି। ମରୁଡ଼ି ପରିସ୍ଥିତିକୁ ଲକ୍ଷ୍ୟକରି ସାଳନ୍ଦୀରେ ପାଣି ଛଡ଼ାଯାଇଥିଲା। ମାତ୍ର ଦଶମୌଜା କେନାଲର ଉପରମୁଣ୍ଡରେ ଚାଷୀମାନେ ବନ୍ଧ ପକାଇ ଜମିକୁ ପାଣି ନେଉଛନ୍ତି। କେନାଲରେ ବନ୍ଧ ପକାଇବା ନିୟମ ନ ଥିଲେ ମଧ୍ୟ କେତେଜଣ ଚାଷୀଙ୍କ ଏ ପ୍ରକାର କାର୍ଯ୍ୟ ଅଧିକାଂଶ ପଞ୍ଚାୟତର ଚାଷୀଙ୍କୁ ସମସ୍ୟାରେ ପକାଇଛି। ବନ୍ଧ ଯୋଗୁ ତାଳପଦା, ଅଚକ, ଭାଟପଡ଼ା, କୋହ୍ଲ, ଫତେପୁର, ମଙ୍ଗଳପୁର, ସିନ୍ଦୋଳ ପଞ୍ଚାୟତର ଚାଷୀମାନେ କେନାଲ ପାଣି ପାଇପାରୁ ନାହାନ୍ତି। ସାଳନ୍ଦୀ ଜଳସେଚନ ବିଭାଗ କେନାଲରେ ପାଣି ଛାଡ଼ିଦେଇ ନିଜର ଦାୟିତ୍ୱ ସାରି ଦେଉଥିବା କୁହାଯାଉଛି। ପାଣିର ଠିକ୍ ବିନିଯୋଗ ହୋଇପାରିଲା କି ନାହିଁ ସେନେଇ କୌଣସି ତଦାରଖ କରୁ ନ ଥିବାରୁ ଏହି ପଞ୍ଚାୟତଗୁଡ଼ିକରେ ୬ ହଜାର ହେକ୍ଟର ଜମିରେ ଜଳସେଚନ ସୁବିଧା ଥାଇ ମଧ୍ୟ ଚାଷ ହୋଇପାରୁ ନ ଥିବା ଚାଷୀମାନେ ଅଭିଯୋଗ କରିଛନ୍ତି। ସାଳନ୍ଦୀ ଜଳସେଚନ ବିଭାଗ ଏଥିପ୍ରତି ଦୃଷ୍ଟିଦେବାକୁ ଚାଷୀମାନେ ଦାବି କରିଛନ୍ତି। ଏ ସମ୍ପର୍କରେ ବିଭାଗର ଏସ୍ଡିଓ ଆର୍ତ୍ତତ୍ରାଣ ସାହୁଙ୍କୁ ପଚାରିବାରୁ କେନାଲରେ ପ୍ରଚୁର ପାଣି ଛଡ଼ାଯାଇଛି, ପାଣି କିପରି ତଳମୁଣ୍ଡରେ ପହଞ୍ଚତ୍ବ ସେ ଦିଗରେ ପଦକ୍ଷେପ ନିଆଯିବ ବୋଲି କହିଛନ୍ତି।
