ଧାମନଗର, ୫ା୨(ଡି.ଏନ.ଏ.)-ଧାମନଗର ବ୍ଲକରେ ନଦୀସଂସ୍କାର ଯୋଜନାରେ ସରକାର କୋଟିକୋଟି ଟଙ୍କା ବ୍ୟୟକରି ପୋତି ହୋଇ ପଡିଥିବା ବିଭିନ୍ନ ନଦୀର ସଂସ୍କାର କାର୍ଯ୍ୟ ହୋଇ ଚାଷୀମାନଙ୍କ ମନରେ ହସ ଫୁଟାଇଥିଲା। ପ୍ରଥମରୁ ଏହାକୁ ଚାଷୀକୂଳ ସ୍ବାଗତ କରିଥିବାବେଳେ ବର୍ତ୍ତମାନ ବର୍ଷା ଏବଂ ବନ୍ୟା ଜଳ ନଦୀରେ ବୋହିଯାଇ ସମୁଦ୍ରରେ ମିଶିଯାଉଥିବାରୁ ଚାଷୀକୂଳ ଉତ୍କଟ ମରୁଡିର ସମ୍ମୁଖୀନ ହେଉଛନ୍ତି। ଏହା ସହିତ ସରକାରଙ୍କଦ୍ୱାରା କୋଚିଳା ବ୍ୟାରେଜ କାର୍ଯ୍ୟ ଆରମ୍ଭ ହେବାକୁ ଯାଉଥିବାବେଳେ ବ୍ୟାରେଜ ଜଳକୁ ତଳିଆ ଅଞ୍ଚଳରେ ଗଚ୍ଛିତ ପାଇଁ ଚାଷୀମାନଙ୍କ ଦାବି ଜୋରଦାର ହୋଇଛି। ଏହି ବ୍ଲକର ୧୦ଟି ପଞ୍ଚାୟତର ଚାଷୀଙ୍କ ଦ୍ୱାରା କୋଠାର ପଞ୍ଚାୟତ ବାଙ୍କସାହି ନିକଟରେ ରେବ ଏବଂ ବାଲିଚତିରି ନଦୀମୁହାଣରେ ଏକ ଆନିକଟ ପାଇଁ ଦାବି ଯୋର ଧରିଛି।
କୋଚିଳା ବ୍ୟାରେଜ ଜଳ, ଗୌରାଙ୍ଗପୁର ଏସକେପ ଏବଂ ମଲ୍ଲିମାହାରା ବନ୍ୟାଜଳ କେବଳ ଏହି ମୁହଁ ଦେଇ ସମୁଦ୍ର ଆଡକୁ ବୋହି ଯାଉଥିବାବେଳେ ରେବ ନଦୀ, ଜନ୍ତ ମାହାରା, ଫଳପୁର ମାହାରା ଏବଂ ହରିପୁର ଚେକଡ୍ୟାମ ଦେଇ ପ୍ରବାହିତ ଜଳକୁ ଗଚ୍ଛିତ ପାଇଁ ବିଭାଗ ଉଦ୍ୟମ କରିବାକୁ ହେଲେ ବାଙ୍କସାହି ନିକଟରେ ଏକ ସ୍ଲୁଇସଗେଟର ଏକାନ୍ତ ଆବଶ୍ୟକତା ରହିଛି। ଯାହା ଫଳରେ ବର୍ଷାଦିନ ପରେ ଏଠାରେ ଗେଟକୁ ପକାଇ ଜଳ ଗଚ୍ଛିତ ରଖିଲେ ପ୍ରାୟ ୧୦ ଗୋଟି ପଞ୍ଚାୟତରେ ଥିବା ରେବ ନଦୀ ଏବଂ ବାଲିଚିତିରି ନଦୀରେ ପାଣିକୁ ଅଟକ ରଖାଯାଇପାରିବ। ଖରାଦିନେ ଉକ୍ତ ନଦୀର ଦୁଇ ଧାରରେ ଥିବା ଉପର ମୁଣ୍ଡରେ ପ୍ରାୟ ୧୦ କି.ମି. ପର୍ଯ୍ୟନ୍ତ ନଦୀ ଗର୍ଭରେ ବର୍ଷା ଜଳ ଗଚ୍ଛିତ ହେଲେ ନଦୀର ଦୁଇଧାରରେ ହଜାର ହଜାର ହେକ୍ଟର ଚାଷ ଜମିରେ ପର୍ଯ୍ୟାପ୍ତ ପରିମାଣରେ ପନିପରିବା ଚାଷ ହୋଇ ପାରିବ ବୋଲି ଦିନାଜପୁର ଗ୍ରାମର ଚାଷୀ ନିରାକାର ରାଉତ, ଗୋଲକ ରାଉତ ପ୍ରକାଶ କରିଛନ୍ତି। ଉକ୍ତ ମୁହାଣରେ ସ୍ଲୁଇସ ଗେଟ କୋଠାର, ଫତେପୁର, ଅସୁରାଳୀ, କାଶିମପୁର, ଧୂଷୁରୀ, ଭଟ୍ଟସାହି, ନଦୀଗଁ।, ଦଳାଙ୍ଗ, ଅର୍ଜୁନପୁର, ବୟାଙ୍ଗଡିହି, ରାଧାବଲ୍ଲଭପୁର ପଞ୍ଚାୟତର ହଜାର ହଜାର ଏକର ଚାଷ ଜମିକୁ ମରୁଡି ମୁକ୍ତ କରାଇବ ବୋଲି ପୂର୍ବତନ କୋଠାର ସମିତିସଭ୍ୟ ମନୋରଞ୍ଜନ ମଣ୍ଡଳ ପ୍ରକାଶ କରିଛନ୍ତି। ସ୍ଲୁଇସଗେଟ କରାଗଲେ ପାଣି ଅଟକ ପାଇଁ ଘେରିବନ୍ଧର ଆଉ ଆବଶ୍ୟକତା ନାହିଁ ବୋଲି ସାମାଜିକ କର୍ମୀ ନୃସିିଂହ ତରାଇ ପ୍ରକାଶ କରିଛନ୍ତି । ଏଠାରେ ଗଚ୍ଛିତ ଜଳ ତଳ ମୁଣ୍ଡକୁ ମଧ୍ୟ ପାଣି ମଡାଯାଇ ପାରିବ। କାରଣ ପୂର୍ବରୁ ନାଉଗଡିଆ ପୋଲ, ବାଙ୍କସାହି ଠାକୁରାଣୀ ନିକଟ କଲଭର୍ଟ, ବାଙ୍କସାହି ସ୍କୁଲ ନିକଟରେ ଥିବା କଲଭର୍ଟ ଦେଇ ପୂର୍ବଦିଗକୁ ଗଚ୍ଛିତ ଜଳକୁ ଚାଷୀମାନେ ବ୍ୟବହାର କରିପାରିବେ ବୋଲି ଚାଷୀ ପତ୍ରୀସାହିର ସୁରେନ୍ଦ୍ର ମିଶ୍ର ସୂଚନା ଦେଇଛନ୍ତି। ବନ୍ୟା ଜଳ ନିଷ୍କାସିତ ପାଇଁ ମୁଖ୍ୟ ସ୍ଥାନ ବାଙ୍କସାହି ପୋଲ ନିକଟରେ ଉଚ୍ଚସ୍ଥାନ ଯୋଗୁ ବନ୍ୟାଜଳକୁ ଗଚ୍ଛିତ ରଖାଗଲେ ଏହି ନଦୀ ଜଳ ବାଲିଚତିରି ନଦୀ ଦେଇ ହରିପୁର ଚେକଡ୍ୟାମ ପର୍ଯ୍ୟନ୍ତ ଗଚ୍ଛିତ ରହିବା ସହିତ ସେପଟେ ରେବନଦୀରେ ଜଳ ଅସୁରାଳୀ ପର୍ଯ୍ୟନ୍ତ ଚାଷୀମାନେ ବ୍ୟବହାର କରିପାରିବେ ବୋଲି ବାହାରବିଲର ପୂର୍ବତନ ସେନା କର୍ମଚାରୀ ପୂର୍ଣ୍ଣଚନ୍ଦ୍ର ନାୟକ ସୂଚନା ଦେଇଛନ୍ତି । ଦୀର୍ଘଦିନ ଧରି ଚାଷୀମାନଙ୍କର ଉକ୍ତ ଦାବି ଯଥାର୍ଥ ସହିତ ପ୍ରଶାସନିକ ଏବଂ ରାଜନୈତିକ ଦୃଷ୍ଟି ଆକର୍ଷଣ ନେଇ କୋଠାର ସରପଞ୍ଚ ଡା. ନିମାଇଁ ନାୟକ ସୂଚନା ଦେଇଛନ୍ତି।