ନୂଆଦିଲ୍ଲୀ,୨ା୩: ଠିକ୍ ସପ୍ତାହେ ତଳେ ଜାତୀୟ ରାଜଧାନୀର ଉତ୍ତର-ପୂର୍ବ ଅଞ୍ଚଳରେ ସୃଷ୍ଟି ହୋଇଥିଲା ହିଂସା। କେନ୍ଦ୍ର ସରକାରଙ୍କ ନାଗରିକତ୍ୱ ସଂଶୋଧନ ଆଇନ (ସିଏଏ) ସପକ୍ଷବାଦୀ ଓ ବିପକ୍ଷବାଦୀଙ୍କ ମଧ୍ୟରେ ଘଟିଥିଲା ସଂଘର୍ଷ। ଗତ ରବିବାର ଆରମ୍ଭ ହୋଇଥିବା ଏହି ହିଂସା କ୍ରମଶଃ ସାମ୍ପ୍ରଦାୟିକ ଦଙ୍ଗାର ରୂପ ନେଇଥିଲା। ସୋମବାର ୪ ଜଣଙ୍କ ପ୍ରାଣହାନି ଘଟିଥିବାବେଳେ ସାତ ଦିନ ପରେ ଏହି ମୃତ୍ୟୁସଂଖ୍ୟା ୪୭କୁ ଛୁଇଁଛି। ଏହାସହ ୨୦୦ରୁ ଊର୍ଦ୍ଧ୍ୱ ଲୋକ ଆହତ ହୋଇ ବିଭିନ୍ନ ହସ୍ପିଟାଲରେ ଚିକିତ୍ସାଧୀନ ଓ ଅନେକ ନିଖୋଜ ଅଛନ୍ତି। ଶବଗୃହ ବାହାରେ ଏବେ ମଧ୍ୟ ବହୁ ଲୋକ ନିଜ ଆମତ୍ୀୟସ୍ବଜନଙ୍କୁ ଅପେକ୍ଷା କରିଛନ୍ତି। ଦଙ୍ଗାକାରୀ ଭିଆଇଥିବା ଲୁଟ୍, ରାହାଜାନି, ଭଙ୍ଗାରୁଜା ଓ ଜଳାପୋଡ଼ାର କ୍ଷତ ସବୁଠି ବାରି ହୋଇଯାଉଛି।
ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କ ଭାରତ ଗସ୍ତ ବେଳେ ଦିଲ୍ଲୀରେ ଦଙ୍ଗା ହୋଇଥିଲା। ଏଥିରେ ସବୁଠୁ ବେଶି ପ୍ରଭାବିତ ହୋଇଛି ଜାଫରାବାଦ, ମୌଜପୁର, ବାବରପୁର, ଚାନ୍ଦବାଗ, ଶିବବିହାର, ଭଜନପୁରା, ଯମୁନା ବିହାର ଓ ମୁସ୍ତାଫାବାଦ ଅଞ୍ଚଳ। ଶନିବାର ସୁଦ୍ଧା ମୃତ୍ୟୁସଂଖ୍ୟା ୪୩ରେ ପହଞ୍ଚତ୍ଥିବାବେଳେ ରବିବାର ଏହି ଅଞ୍ଚଳରେ ଆଉ ୪ ଜଣଙ୍କ ମୃତଦେହ ଉଦ୍ଧାର ହୋଇଛି। ଅପରାହ୍ନରେ ଗୋକଲପୁରୀର ଏକ କେନାଲରୁ ଜଣଙ୍କ ମୃତଦେହ ଉଦ୍ଧାର ହୋଇଥିବାବେଳେ ଆଉ ଦୁଇଟି ମିଳିଛି ଭାଗୀରଥି ବିହାର କେନାଲରୁ। ସେହିପରି ଶିବବିହାରସ୍ଥିତ ଭଗିରଥ ଡ୍ରେନ୍ରୁ ରାତି ୮ଟା ୨୦ରେ ଆଉ ଜଣଙ୍କ ମୃତଦେହକୁ ପୋଲିସ ଉଦ୍ଧାର କରିଛି। ତେବେ ସେଗୁଡ଼ିକୁ ଚିହ୍ନଟ କରାଯାଇ ପାରିନାହିଁ।
ଏହା ପୂର୍ବରୁ ଗୁରୁ ତେଗ୍ ବାହାଦୁର ହସ୍ପିଟାଲରେ ୩୮ ଓ ଲୋକନାୟକ ଜୟପ୍ରକାଶ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ୩ ଜଣ ଆଖିବୁଜି ଦେଇଥିଲେ। ଦିଲ୍ଲୀ ଦଙ୍ଗାକୁ ନେଇ ପୋଲିସ ୨୫୪ ଏଫ୍ଆଇଆର୍ କରିଥିବାବେଳେ ୯୦୩ ଜଣଙ୍କୁ ଗିରଫ କରିଛି କିମ୍ବା ଅଟକ ରଖିଛି। ଏହି ମାମଲାଗୁଡ଼ିକ ମଧ୍ୟରୁ ବେଆଇନ ଅସ୍ତ୍ରଶସ୍ତ୍ର ରଖିବା ଅଭିଯୋଗରେ ୪୧ଟି ଏଫ୍ଆଇଆର୍ ହୋଇଛି। ସ୍ଥିତି ସ୍ବାଭାବିକ ହେବାରେ ଲାଗିଥିବାରୁ ପୋଲିସକୁ ଆଉ ଦଙ୍ଗା ସମ୍ପର୍କିତ ଅଭିଯୋଗ ନେଇ ଫୋନ୍ କଲ ଆସୁ ନ ଥିବା ଜଣାପଡ଼ିଛି। କ୍ରାଇମ୍ବ୍ରାଞ୍ଚ ପୋଲିସର ଦୁଇଟି ସ୍ବତନ୍ତ୍ର ତଦନ୍ତକାରୀ ଦଳ (ଏସ୍ଆଇଟି) ବିଭିନ୍ନ ଅଞ୍ଚଳ ବୁଲି ତନାଘନା ଜାରି ରଖିଛନ୍ତି। ଦିଲ୍ଲୀରେ ଏବେ ଜୀବନଯାତ୍ରା ସ୍ବାଭାବିକ ହେବାରେ ଲାଗିଛି। ଏହାସହ ଷଡ଼ଯନ୍ତ୍ରକୁ ନେଇ ଅନେକ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିବାରେ ଲାଗିଛି। ବିଶ୍ୱାସଘାତକଙ୍କୁ ଗୁଳି ମାର ବୋଲି ସିଏଏ ବିପକ୍ଷବାଦୀଙ୍କ ବିରୋଧରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଓ କେନ୍ଦ୍ରମନ୍ତ୍ରୀ ଅନୁରାଗ ଠାକୁର ଦୃଢ଼ ଭାବେ ଓକିଲାତି କରିଥିଲେ। କୋଲକାତାରେ ସିଏଏ ସପକ୍ଷରେ ଆୟୋଜିତ ସଭାରେ ସ୍ବରାଷ୍ଟ୍ରମନ୍ତ୍ରୀ ଅମିତ୍ ଶାହା ଭାଷଣ ଦେଉଥିବାବେଳେ ‘ଗୋଲି ମାରୋ’ ସ୍ଲୋଗାନ ଶୁଣିବାକୁ ମିଳିଛି। ସୋମବାର ଆରମ୍ଭ ହେବାକୁ ଥିବା ପାର୍ଲାମେଣ୍ଟର ଦ୍ୱିତୀୟ ପର୍ଯ୍ୟାୟ ବଜେଟ ଅଧିବେଶନରେ ଶାହାଙ୍କ ଇସ୍ତଫା ଦାବି ଜୋର୍ ଧରିବା ସାଙ୍ଗକୁ ଦିଲ୍ଲୀ ଦଙ୍ଗା ପ୍ରମୁଖ ପ୍ରସଙ୍ଗ ହେବ ବୋଲି ବିରୋଧୀ ସୂତ୍ରରୁ ଜଣାପଡ଼ିଛି। ଆଧ୍ୟାମତ୍ିକ ଗୁରୁ ତଥା ଆର୍ଟ ଅଫ୍ ଲିଭିଙ୍ଗ ପ୍ରତଷ୍ଠୋତା ଶ୍ରୀଶ୍ରୀ ରବିଶଙ୍କର ଉତ୍ତର-ପୂର୍ବ ଦିଲ୍ଲୀର ଦଙ୍ଗା ପ୍ରଭାବିତ ଅଞ୍ଚଳ ପରିଦର୍ଶନ କରି ପୀଡ଼ିତମାନଙ୍କୁ ଭେଟିଛନ୍ତି। ହିଂସା ଭିଆଉଥିବା ଅପରାଧୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନିଆଯିବା ଉଚିତ ବୋଲି ସେ କହିଛନ୍ତି।