ପାଟଣା,୧୩।୧୧(ବୀର କିଶୋର ଦାଶ): ପୁଅକୁ ଯେତେବେଳେ ୧୪ ବର୍ଷ ହୋଇଥିଲା କେଉଁଆଡ଼େ ପଳାଇଥିଲେ। ଦୀର୍ଘ ବର୍ଷ ଧରି ପୁଅ ନ ଫେରିବାରୁ ପରିବାର ଓ ସମ୍ପର୍କୀୟମାନେ ମୃତ୍ୟୁ ଘଟିଥିବା ଭାବି ଗତ ବର୍ଷ ଶୁଦ୍ଧିକ୍ରିୟା କରିଥିଲେ। ମାତ୍ର ହଜିଯାଇଥିବା ନାବାଳକ ପୁଅ ୧୫ ବର୍ଷ ପରେ ସୋମବାର ଯୁବକ ହୋଇ ଘରକୁ ଫେରିଛନ୍ତି। ଏପରି ଘଟଣା ଘଟିଛି କେନ୍ଦୁଝର ଜିଲା ପାଟଣା ବ୍ଲକ୍ ଉପାନ୍ତ ଅଞ୍ଚଳ ଡୁମୁରିଆ ପଞ୍ଚାୟତ ତଣ୍ଡୋ ଗ୍ରାମରେ। ମା’ ବାପା ହଜିଲା ପୁଅକୁ ପାଖରେ ପାଇ ଆତ୍ମ ବିଭୋର ହୋଇପଡ଼ିଛନ୍ତି।
ସୂଚନା ଅନୁଯାୟୀ, ଗ୍ରାମର ଅଯୋଧ୍ୟା ଦେହୁରୀଙ୍କ ସାନ ପୁଅ ଚିତ୍ରସେନ ୧୫ ବର୍ଷ ହେବ ଘରୁ କୁଆଡ଼େ ଚାଲି ଯାଇଥିଲେ। ନିଖୋଜ ହେବାର ୧୫ ବର୍ଷ ପରେ ଅଯୋଧ୍ୟା ୨୦୨୩ ଜୁନ୍ରେ ପୁଅ ଭଦ୍ରକରେ ଗାଡ଼ି ଚଳାଉଥିବା ଖବର ପାଇ ସେଠାକୁ ଗାଁ ଲୋକଙ୍କୁ ନେଇ ଯାଇଥିଲେ। ମାତ୍ର ଚିତ୍ରସେନ ବିବାହ କରିସାରିଥିବା ତାଙ୍କର ସ୍ତ୍ରୀ ଓ ପୁଅ ଥିବା ନେଇ ଗାଡ଼ି ମାଲିକ ସୂଚନା ଦେଇଥିଲେ। ଏଥିସହ ଗାଡ଼ି ଦୁର୍ଘଟଣାରେ ୨ଦିନ ତଳେ ତାଙ୍କର ମୃତ୍ୟୁ ହୋଇଛି। ଅଯୋଧ୍ୟାଙ୍କୁ ଗାଡ଼ି ମାଲିକ ଶବ ପୋତାଯାଇଥିବା ସ୍ଥାନ ବି ଦେଖାଇଥିଲେ। ପରେ ଅଯୋଧ୍ୟା ସାହି ଭାଇ ଓ ପୂଜକଙ୍କ ପରାମର୍ଶରେ ହିନ୍ଦୁ ପରମ୍ପରା ଅନୁଯାୟୀ, ଜୁନ୍ରେ ଶୁଦ୍ଧିକ୍ରିୟା କରିଥିଲେ। ମାତ୍ର ସୋମବାର ସାରେ ନେପାଳର ଏକ ଟ୍ରଷ୍ଟର କର୍ମକର୍ତ୍ତାମାନେ ଚିତ୍ରସେନଙ୍କୁ ଆଣି ଘରେ ସୁରକ୍ଷିତ ଭାବେ ଛାଡ଼ି ଦେଇଛନ୍ତି। ପରେ ତାଙ୍କୁ ପରିବାର ଲୋକେ ଏକ ନିଛାଟିଆ ଘରେ ଏକୁଟିଆ ରଖିଛନ୍ତି। ପୂଜକଙ୍କ ପରାମର୍ଶରେ ପରିବାର ଲୋକେ ଅନ୍ଧବିଶ୍ବାସର ବଶବର୍ତ୍ତୀ ହୋଇ ଚିତ୍ରସେନଙ୍କ ମୁହଁ ଦେଖୁ ନାହାନ୍ତି। ପୂଜକ ଘର ଲୋକଙ୍କୁ କହିଛନ୍ତି, କ୍ରିୟା ସରିଥିବା ବ୍ୟକ୍ତିଙ୍କ ମୁହଁ ଦେଖିଲେ ଅଶୁଭ ହେବ ଓ ଆୟୁଷ ହାନି ଘଟିବ। ଏଥିପାଇଁ ହିନ୍ଦୁ ଶାସ୍ତ୍ର ମତେ ନୂତନ ବିଧାନ କରିବାକୁ ହେବ ବୋଲି ପୂଜକ ପରାମର୍ଶ ଦେଇଛନ୍ତି। ଏ ନେଇ ଗାଁ ଲୋକ ଓ ଘର ଲୋକ ମୁହଁ ଖୋଲୁନାହାନ୍ତି। ସୂଚନାଯୋଗ୍ୟ, ଚିତ୍ରସେନ ଭଦ୍ରକ ଯାଇ ସେଠାରୁ ନେପାଳ ପଳାଇଥିଲେ। ମାନସିକ ରୋଗରେ ଆକ୍ରାନ୍ତ ଥିବା ବେଳେ ନେପାଳର ଏକ ସ୍ବେଚ୍ଛାସେବୀ ସଂଗଠନ ତାଙ୍କର ଚିକିତ୍ସା କରାଇବା ସହ ଏକ ଆଶ୍ରମରେ ରଖିଥିଲେ। ସୁସ୍ଥ ହେବାପରେ ଘର ଠିକଣା ବୁଝି ସଂଗଠନର ୨ ସଦସ୍ୟ ତାଙ୍କୁ ଆଣି ଘରେ ଛାଡ଼ିଛନ୍ତି।
