ନୂଆଦିଲ୍ଲୀ,୨୪।୭- ଓ୍ବେଷ୍ଟଇଣ୍ଡିଜ ଗସ୍ତ ଲାଗି ଘୋଷିତ ଭାରତୀୟ ଦିନିକିଆ ଦଳରୁ ଭେଟେରାନ ଅଜିଙ୍କ୍ୟ ରାହାନେ ଓ ଯୁବ ବ୍ୟାଟ୍ସମ୍ୟାନ ଶୁବମନ ଗିଲ ବାଦ୍ ପଡ଼ିବା ଉପରେ ପୂର୍ବତନ ଭାରତୀୟ ଅଧିନାୟକ ସୌରଭ ଗାଙ୍ଗୁଲି ବୁଧବାର ପ୍ରଶ୍ନ ଉଠାଇଛନ୍ତି। ଚୟନ କମିଟି ସେମାନଙ୍କ ନୀତି ବଜାୟ ରଖୁ ନ ଥିବା ସେ କହିଛନ୍ତି। କ୍ରମାଗତ ପ୍ରଦର୍ଶନ କରିପାରୁ ନ ଥିବା କେଦାର ଯାଦବଙ୍କ ଦଳରେ ସ୍ଥାନ ବଜାୟ ରହିଥିବାବେଳେ ଓ୍ବେଷ୍ଟଇଣ୍ଡିଜ୍ ଏ’ ବିପକ୍ଷ ୫ ମ୍ୟାଚ୍ ବିଶିଷ୍ଟ ଅନ୍ ଅଫିସିଆଲ ସିରିଜ୍ରେ ସର୍ବାଧିକ ୨୧୮ ରନ୍ କରି ମ୍ୟାନ୍ ଅଫ୍ ଦ ସିରିଜ୍ ହୋଇଥିବା ଗିଲଙ୍କୁ ଦଳରେ ସ୍ଥାନ ମିଳିନାହିଁ। ଟୁଇଟର ଜରିଆରେ ଗାଙ୍ଗୁଲି କହିଛନ୍ତି, ସମସ୍ତ ଫର୍ମାଟ ଲାଗି ସମାନ ଖେଳାଳିଙ୍କୁ ଦଳରେ ସାମିଲ କରିବାର ସମୟ ଆସିଯାଇଛି। ଏହା ଦ୍ୱାରା ଖେଳାଳିଙ୍କ ଆତ୍ମବିଶ୍ୱାସ ବୃଦ୍ଧି ପାଇବ। ବହୁ କମ୍ ଖେଳାଳି ୩ ଫର୍ମାଟରେ ଖେଳୁଛନ୍ତି। ବଡ଼ ଦଳଗୁଡ଼ିକରେ କ୍ରମାଗତ ସମସ୍ତ ଫର୍ମାଟରେ ଖେଳୁଥିବା ଖେଳାଳି ରହିଥାନ୍ତି। ଚୟନକର୍ତ୍ତାଙ୍କ ମୁଖ୍ୟ ଦାୟିତ୍ୱ ଲୋକଙ୍କୁ ଖୁସି କରିବା ନୁହେଁ ଦେଶ ଲାଗି ଶ୍ରେଷ୍ଠ ଦଳ ଚୟନ କରିବା। ଏହାର ପରବର୍ତ୍ତୀ ଟୁଇଟ୍ରେ ଗିଲ ଓ ରାହାନେ ଦିନିକିଆ ଦଳରେ ସ୍ଥାନ ନ ପାଇବା ଲାଗି ଆଶ୍ଚର୍ଯ୍ୟ ପ୍ରକାଶ କରିଛନ୍ତି। ଅନ୍ୟପକ୍ଷରେ ଗିଲ ଓ୍ବେଷ୍ଟଇଣ୍ଡିଜ ଗସ୍ତ ଲାଗି ଦଳରେ ସ୍ଥାନ ପାଇ ନ ଥିବାରୁ ଦୁଃଖ ପ୍ରକାଶ କରିଛନ୍ତି। ଏମ୍ଏସ୍କେ ପ୍ରସାଦଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଚୟନ କମିଟି ଟି୨୦, ଦିନିକିଆ ଓ ଟେଷ୍ଟ ସିରିଜ୍ ଲାଗି ରବିବାର ଦଳ ଘୋଷଣା କରିଥିଲା। ଅଲରାଉଣ୍ଡର ରବୀନ୍ଦ୍ର ଜାଡେଜା, ବିରାଟ କୋହଲି, ରୋହିତ ଶର୍ମା, ଲୋକେଶ ରାହୁଲ ଓ ରିଷଭ ପନ୍ତଙ୍କ ବ୍ୟତୀତ ଅନ୍ୟ କୌଣସି ଖେଳାଳି ୩ ଫର୍ମାଟ ଲାଗି ଘୋଷିତ ଦଳରେ ସ୍ଥାନ ପାଇନାହାନ୍ତି।
