ଶେରଗଡ଼,୧୫ା୬(ଡି.ଏନ୍.ଏ.): ଗଞ୍ଜାମ ଜିଲା ଶେରଗଡ଼ର ଜଳମଗ୍ନ ଚାଷଜମି ଓ ଝିଣ୍ଟିକା ଦଳ ଦେଖି କୃଷି ବିଭାଗର ଅଧିକାରୀମାନେ ଫେରିଯାଇଛନ୍ତି। କୃଷି ଜିଲା ଅଧିକାରୀ ପ୍ରଶାନ୍ତ କୁମାର ପଟ୍ଟନାୟକ, ବ୍ଲକ କୃଷି ଅଧିକାରୀ ଅଜୟ କୁମାର ନାୟକ, ପିତ୍ତଳ କୃଷି ଅଧିକାରୀ ବିଶ୍ୱନାଥ ବେହେରା, ଗ୍ରାମସେବକ ଅରୁଣ କୁମାର ପ୍ରଧାନ ପ୍ରମୁଖ ଆନ୍ଧ୍ରବ୍ୟାଙ୍କ ନିକଟରେ ଥିବା ଗଛରେ ବହୁ ସଂଖ୍ୟାରେ ଝିଣ୍ଟିକା ଦେଖିବାକୁ ପାଇଥିଲେ। ତେବେ ଏଗୁଡ଼ିକ ପଙ୍ଗପାଳ ନୁହନ୍ତି ବୋଲି ଉକ୍ତ ଦଳ ସ୍ପଷ୍ଟ କରିଛନ୍ତି। କିଛି ବଡ଼ ପ୍ରଜାତିର ଝିଣ୍ଟିକା। ଚାଷୀମାନେ ଭୟ କରିବାର କିଛି କାରଣ ନାହିଁ ବୋଲି ଉକ୍ତ ଟିମ୍ର କର୍ମକର୍ତ୍ତାମାନେ କହିଥିଲେ। ଏହାପରେ ଶେରଗଡ଼ କଳିଙ୍ଗ ବୈଶ୍ୟ ଭବନ ସମ୍ମୁଖରେ ୫୦୦ ଏକର ଚାଷଜମିରେ ବର୍ଷାଜଳ ଜମିରହିଥିବା ଦେଖିଥିଲେ। ଜବରଦଖଲକାରୀଙ୍କ ଯୋଗୁ ଏପରି ପରିସ୍ଥିତି ଉପୁଜିଥିବାରୁ ସେମାନଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ନିଆଯିବା ସହ ନାଳ ସଫେଇ ବ୍ୟବସ୍ଥା କରାଯିବ ବୋଲି ଉକ୍ତ ଟିମ୍ କହିଛି।
