ଲଣ୍ଡନ, ୯।୯- ଦୀର୍ଘ ୬୦ ବର୍ଷର କ୍ରିକେଟ୍ କ୍ୟାରିୟରରେ ପୂର୍ଣ୍ଣଚ୍ଛେଦ ଟାଣିଛନ୍ତି ୮୫ ବର୍ଷୀୟ ଓ୍ବେଷ୍ଟଇଣ୍ଡିଜ ଦ୍ରୁତ ବୋଲର ସେସିଲ ରାଇଟ୍। ଡାହାଣହାତୀ ଦ୍ରୁତ ବୋଲର ସେସିଲ ଶନିବାର ନିଜର ଅନ୍ତିମ ଅଫିସିଆଲ ମ୍ୟାଚ୍ ଖେଳିଛନ୍ତି। ଏଠାରେ ଅନୁଷ୍ଠିତ ପେନ୍ନିନେ ଲିଗ୍ର ସ୍ପ୍ରିଙ୍ଗ୍ହେଡ୍ ଟିମ୍ ବିପକ୍ଷ ମ୍ୟାଚ୍ରେ ଉପରମେଲ୍ କ୍ରିକେଟ୍ କ୍ଲବ ପକ୍ଷରୁ ଖେଳିଥିଲେ ସେସିଲ। ଏହି ମ୍ୟାଚ୍ରେ ସେସିଲ ଯେତେବେଳେ ଫିଲ୍ଡିଂ ପାଇଁ ପଡ଼ିଆକୁ ପ୍ରବେଶ କରିଥିଲେ ତାଙ୍କୁ ଉଭୟ ଦଳର ଖେଳାଳି ଗାର୍ଡ ଅଫ୍ ଅନର ପ୍ରଦାନ କରିଥିଲେ। ସେହିଭଳି ମ୍ୟାଚ୍ ପରେ ସାଥୀ ଖେଳାଳିମାନେ ତାଙ୍କ ସହ କରମର୍ଦ୍ଦନ କରିଥିବାର ଦେଖିବାକୁ ମିଳିଥିଲା। ୬୦ ବର୍ଷର ଲମ୍ବା କ୍ରିକେଟ୍ କ୍ୟାରିୟରରେ ସେସିଲ ୭ ହଜାରରୁ ଊର୍ଦ୍ଧ୍ୱ ଉଇକେଟ୍ ଅକ୍ତିଆର କରିଛନ୍ତି। ୧୯୫୮ରେ ଜାମାଇକା ପକ୍ଷରୁ ପ୍ରତିନିଧିତ୍ୱ କରି ବାର୍ବାଡୋସ ବିପକ୍ଷରେ ସେ ତାଙ୍କର ପ୍ରଥମ ଶ୍ରେଣୀ କ୍ରିକେଟ୍ କ୍ୟାରିୟର ଆରମ୍ଭ କରିଥିଲେ। ଏହି ମ୍ୟାଚ୍ରେ ସେ ଗ୍ୟାରୀଫିଲ୍ଡ ସୋବର୍ସ, ଓ୍ବେସ ହଲ୍, କୋଲି ସ୍ମିଥ୍ ଓ ସିମୋର୍ ନର୍ସଙ୍କ ପରି ଖେଳାଳିଙ୍କୁ ସାମ୍ନା କରିଥିଲେ। ଏହା ପରବର୍ଷ ସେ ଇଂଲଣ୍ଡ ଚାଲିଆସି ସେଣ୍ଟ୍ରାଲ ଲଙ୍କାଶାୟର ଲିଗ୍ରେ କ୍ରମ୍ପଟନ ଦଳ ପକ୍ଷରୁ ଖେଳିଥିଲେ।