ଖଲ୍ଲିକୋଟ,୧୮ା୬(ଡି.ଏନ.ଏ)- ଗଞ୍ଜାମ ଜିଲା ଖଲ୍ଲିକୋଟ ଥାନା ଚିକିଲି ପଞ୍ଚାୟତ ଗୋପପୁର ଗ୍ରାମରେ ବୁଧବାର ରାତିରେ ଏକ ଅଭାବନୀୟ ଘଟଣା ଘଟିଛି। ଶୋଇଥିବାବେଳେ ପୁଅକୁ ହତ୍ୟା କରି ବାଡ଼ିପଟେ ପୋତି ଦେଇଛନ୍ତି ମା’। ଗୁରୁବାର ଅପରାହ୍ନରେ ପୋଲିସ ମାଟିଖୋଳି ମୃତଦେହ ଜବତ କରିବା ସହ ମା’ଙ୍କୁ ଗିରଫ କରିଛି। ମୃତକ ହେଲେ ଶୁକୁରିଆ ନାହାକ (୨୪)। ଗୋପପୁର ଗ୍ରାମ ଅନୁସୂଚିତ ଜାତି ସାହିର ଦୁହିତା ନାୟକ (୫୦) ସ୍ବାମୀଙ୍କ ମୃତ୍ୟୁ ପରେ ବଡପୁଅ ଶୁକୁରିଆ, ସାନପୁଅ ଧନୁ ଏବଂ ବୋହୂଙ୍କ ସହ ରହୁଥିଲେ। ଶୁକୁରିଆ ବିଭିନ୍ନ ସମୟରେ ନିଶାସକ୍ତ ଅବସ୍ଥାରେ ଆସି ଘରେ ପାଟିତୁଣ୍ଡ କରିବା ସହ ମା’ ଓ ସ୍ତ୍ରୀଙ୍କୁ ମାରଧର କରନ୍ତି। ଏନେଇ ସ୍ତ୍ରୀ କିଛିଦିନ ହେଲା ବାପଘରରେ ଯାଇ ରହୁଛନ୍ତି। ବୁଧବାର ରାତିରେ ସାନପୁଅ ଖାଇସାରି ଖୁଡୀଙ୍କ ଘରକୁ ଶୋଇବାକୁ ଚାଲିଯାଇଥିଲେ। ଶୁକୁରିଆ ନିଶାସକ୍ତ ଅବସ୍ଥାରେ ଆସି ମା’ଙ୍କ ସହ କୌଣସି କାରଣରୁ ପାଟିତୁଣ୍ଡ କରିବା ସହ ମାଡ ମାରିଥିଲେ। ପରେ ଖାଇସାରି ଶୋଇ ପଡିଥିଲେ। ରାତିରେ ମା’ ଘରେ ଥିବା ଏକ କାତିରେ ଶୁକୁରିଆଙ୍କୁ ହାଣି ହତ୍ୟା କରିବା ପରେ ବାରିପଟେ ଗାତଖୋଳି ପୋତି ଦେଇଥିଲେ। ସକାଳେ ସାନପୁଅ ଧନୁ ଆସି ମା’ଙ୍କୁ ଭାଇ କୁଆଡେ ଗଲେ ବୋଲି ପଚାରିବାରୁ ସେ ସବୁ କଥା କହିଥିଲେ। ପରେ ସାନପୁଅ ଏନେଇ ଥାନାରେ ଜଣାଇଥିଲେ। ଅପରାହ୍ନରେ ଖଲ୍ଲିକୋଟ ତହସିଲଦାର ଚକ୍ରଧର ପାଢୀ ଓ ପୋଲିସ ଘଟଣାସ୍ଥଳକୁ ଯାଇ ମାଟିଖୋଳି ମୃତଦେହ ଜବତ କରିଥିଲେ। ଏକ ହତ୍ୟା ମାମଲା (ନଂ.୨୩୮/୨୦) ରୁଜୁ କରି ମୃତଦେହ ବ୍ୟବଚ୍ଛେଦ ପାଇଁ ବ୍ରହ୍ମପୁର ବଡ ମେଡିକାଲ ପଠାଯାଇଛି। ମା’ ଏକୁଟିଆ ହତ୍ୟା କରିଛନ୍ତି ନା ଏଥିରେ ଆଉ କେହି ସମ୍ପୃକ୍ତ ଅଛନ୍ତି ଏନେଇ ଅଧିକ ତଦନ୍ତ ଚାଲିଥିବା ପୋଲିସ କହିଛି।