କଟକ ରୋଡ,୧୯।୯(ଡି.ଏନ୍.ଏ.): ଚଳିତବର୍ଷ ଝାରପଡ଼ା ଦୁର୍ଗାପୂଜା ସମିତି ନବମ ବର୍ଷରେ ପହଞ୍ଚିଛି। ପୂର୍ବରୁ ବିଭିନ୍ନ ସମୟରେ ଆକର୍ଷଣୀୟ ତୋରଣ ନିର୍ମାଣ କରି ଚର୍ଚ୍ଚାକୁ ଆସିଥିବା ପୂଜା ସମିତି ଚଳିତଥର ପ୍ୟାରିସ୍ର ଡିଜ୍ନିଲ୍ୟାଣ୍ଡ ପାର୍କ ନିର୍ମାଣ କରିବାକୁ ଯାଉଛି। ଏହା ମୁଖ୍ୟ ଆକର୍ଷଣ ହେବ ବୋଲି ସମିତି ସଭାପତି ଶିଖର ଚନ୍ଦ୍ର ଜେନା ବୁଧବାର ଝାରପଡ଼ା ଦୁର୍ଗାପୂଜା ମଣ୍ଡପରେ ଆୟୋଜିତ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି। ପ୍ରାୟ ଦେଢ ମାସ ହେବ ପଶ୍ଚିମବଙ୍ଗର ୫୦ରୁ ଊର୍ଦ୍ଧ୍ୱ କାରିଗର ତୋରଣ ନିର୍ମାଣ ଚଳାଇଛନ୍ତି। ଶ୍ରଦ୍ଧାଳୁଙ୍କ ସୁରକ୍ଷିତ ଦର୍ଶନ ପାଇଁ ଗୋଟିଏ ପ୍ରବେଶ ପଥ ଓ ୪ଟି ପ୍ରସ୍ଥାନ ପଥ ରଖାଯିବ। ପୂଜାପେଣ୍ଡାଲ ଅଭ୍ୟନ୍ତର ଶୀତତାପ ନିୟନ୍ତ୍ରିତ କରାଯିବ। ୫ଟି ଏଲଇଡି ଲାଇଟ ଗେଟ ମାଧ୍ୟମରେ ପୌରାଣିକ, ଆଧୁନିକ ଓ ଆଦିବାସୀଙ୍କ କଥାବସ୍ତୁ ସ୍ଥାନ ପାଇବ ବୋଲି ପୂଜା ସମିତି ସମ୍ପାଦକ ଧରଣୀଧର ଜେନା କହିଛନ୍ତି। ଦୁର୍ଗାଙ୍କ ମୃଣ୍ମୟୀ ମୂର୍ତ୍ତି ୧୨ଫୁଟ, ବୁଲେନ ଓ ସୁନେଲି ମେଢ଼ ୨୦ଫୁଟ ରହିବ। ରୁପା ମୁକୁଟରେ ଦେବୀ ଶୋଭାପାଇବାକୁ ଥିବା ବେଳେ ରୁପା ଅଳଙ୍କାରରେ ପାର୍ଶ୍ୱ ଦେବୀ ସଜ୍ଜିତ ହେବେ। ବଙ୍ଗୀୟ ରୀତିରେ ପୂଜାନୀତି ଅନୁଷ୍ଠିତ ହେବାକୁ ଥିବା ବେଳେ ସପ୍ତମୀ, ନବମୀ, ଦଶମୀରେ ଖେଚୁଡି ଓ ଅଷ୍ଟମୀ ତିଥିରେ ହାଲୁଆ ଭୋଗ ଲାଗି ହେବ। ମଣ୍ଡପରେ ଶାନ୍ତିଶୃଙ୍ଖଳା ରକ୍ଷା ପାଇଁ କମିଶନରେଟ ପୋଲିସ, ୩୦୦ ସ୍ବେଚ୍ଛାସେବୀ ଓ୍ବାକିଟକି ସହ ନିୟୋଜିତ ରହିବେ। ଆଶୁ ଚିକିତ୍ସା ସାଙ୍ଗକୁ ସୂଚନାକେନ୍ଦ୍ର ଓ ମଣ୍ଡପ ପରିସରରେ ୨୦ସିସି କ୍ୟାମେରା ଖଞ୍ଜାଯିବ। ଭିଡିଓ ଓ ଜିମି କ୍ୟାମେରା ମାଧ୍ୟମରେ ପୂଜା ମଣ୍ଡପ ଦୃଶ୍ୟ ପ୍ରସାରିତ ହେବ। ଯାନବାହନ ପାର୍କିଂ ପାଇଁ ମଣ୍ଡପ ପୂର୍ବରୁ ୪ଟି ସ୍ଥାନ ଚିହ୍ନଟ କରାଯାଇଥିବା ସମିତି ଆବାହକ ଶ୍ରୀଧର ଜେନା କହିଛନ୍ତି। ହିନ୍ଦୁ ଓ ମୁସଲିମ ସମ୍ପ୍ରଦାୟ ଏକତା ଓ ଭାଇଚାରାକୁ ଆଧାର କରି ଅନୁଷ୍ଠିତ ହେଉଥିବା ପୂଜା ଉତ୍ସବ ସୁରୁଖୁରୁରେ ସମ୍ପନ୍ନ ପାଇଁ ସହଯୋଗ ଲୋଡିଥିଲେ ସମିତି ଉପଦେଷ୍ଟା ମଣ୍ଡଳୀ ସଦସ୍ୟ ଉଗ୍ରସେନ ମଙ୍ଗରାଜ, ବୁଲେଇ ଜେନା, ରଣଜିତ୍ ରାୟ, ମୁଶାରଫ ଖାନ, ଗନ୍ଧର୍ବ ପ୍ରଧାନ। ବିଭିନ୍ନ ପାରମ୍ପରିକ ବାଦ୍ୟରେ ଭସାଣି ଉତ୍ସବ ସମ୍ପନ୍ନ କରାଯିବ। ଶିଶୁ ଓ ଶ୍ରଦ୍ଧାଳୁଙ୍କ ପାଇଁ ମିନାବଜାର ଖୋଲାଯିବାକୁ ସମିତି ମଧ୍ୟ ନିଷ୍ପତ୍ତି ନେଇଛି। ଭୁବନେଶ୍ୱର, ଛତ୍ରପୁର ଓ କଟକର କଳାକାରଙ୍କୁ ନେଇ ଷଷ୍ଠୀ ଠାରୁ ଦଶମୀ ତିଥି ପର୍ଯ୍ୟନ୍ତ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବ। ଦଶମୀ ତିଥିରେ ୪୦ଫୁଟ ଉଚ୍ଚତା ରାବଣ ପୋଡି ସହ ଆତସବାଜି ପ୍ରଦର୍ଶନ କରାଯିବ।