ଭଞ୍ଜନଗର,୭।୭(ଡି.ଏନ.ଏ)-ଭଞ୍ଜନଗର ଉପଖଣ୍ଡ ଡାକ୍ତରଖାନାର ଭିତ୍ତିଭୂମି ସୁଦୃଢ଼ କରିବା ପାଇଁ ସରକାର ବହୁ କୋଟି ଟଙ୍କା ଖର୍ଚ୍ଚ କରୁଛନ୍ତି । ମାତ୍ର ଦାୟିତ୍ୱରେ ରହୁଥିବା କେତେଜଣ କର୍ମଚାରୀଙ୍କ ଦାୟିତ୍ୱହୀନତାରୁ ଲୋକେ ସୁଫଳ ପାଇପାରୁନାହାନ୍ତି। ରବିବାର ସକାଳେ ଏଭଳି ଏକ ଘଟଣା ଦେଖିବାକୁ ମିଳିଥିଲା। ଶୌଚାଳୟରେ ପାଣି ନ ଥିବାରୁ କେତେଜଣ ରୋଗୀ ଅସୁବିଧାର ସମ୍ମୁଖୀନ ହୋଇଥିଲେ। ଏପରିକି କେତେଜଣ ପିଇବା ପାଇଁ ପାଖରେ ରଖିଥିବା ଫୁଟାପାଣି ଧରି ପାଇଖାନାକୁ ଯାଇଥିବା ଦେଖାଯାଇଥିଲା। ପାଣି ସମସ୍ୟା ନେଇ ରୋଗୀ ଏବଂ ସେମାନଙ୍କ ସମ୍ପର୍କୀୟମାନେ ଦାୟିତ୍ୱରେ ଥିତ୍ବା ଡାକ୍ତରଙ୍କୁ ଘେରି ଯାଇଥିଲେ। ଡାକ୍ତର ଆବଶ୍ୟକ ପଦକ୍ଷେପ ନେବାପାଇଁ ବିଭାଗୀୟ କର୍ମଚାରୀଙ୍କୁ ନିର୍ଦ୍ଦେଶ ଦେବା ପରେ ପରିସ୍ଥିତି ସ୍ବାଭାବିକ ହୋଇଥିଲା। ଅନ୍ୟପକ୍ଷରେ ମହିଳାମାନଙ୍କ ପାଇଁ ମେଡ଼ିସିନ ୱାର୍ଡ଼ରେ ଥିବା ଶୌଚାଳୟରେ ତାଲା ପଡ଼ିଛି। ମହିଳାମାନେ ବାଧ୍ୟ ହୋଇ ବିଭିନ୍ନ ସମୟରେ ପୁରୁଷ ଶୌଚାଳୟକୁ ଯାଉଛନ୍ତି। ପୁରୁଷ ଶୌଚାଳୟରେ ଟ୍ୟାପରେ ପାଣି ଆସୁନାହିଁ । ସେହିପରି ଡାକ୍ତରଖାନା ପରିସରରେ ଥିବା ବର୍ଜ୍ୟବସ୍ତୁ ପରିଚାଳନା ପ୍ରକଳ୍ପ ଠିକ୍ ଭାବେ ପରିଚାଳିତ ହେଉନି। ଏଣେତେଣେ ମଇଳା ପଡ଼ି ରହୁଛି । ବିଭାଗୀୟ ଉଚ୍ଚ କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେବାକୁ ଦାବି ହୋଇଛି ।
(((((ଫଟୋ))) ୭ସି-ମେଡ଼ିସିନ ୱାର୍ଡ଼ ମହିଳା ଶୌଚାଳୟରେ ତାଲା ପଡ଼ିଛି ।