ପ୍ରତିବର୍ଷ ୩୦ ଜାନୁୟାରୀରେ ଭାରତରେ ଶହୀଦ ଦିବସ ପାଳନ କରାଯାଏ। ଜାତିର ପିତା ତଥା ଅହିଂସା ପୂଜାରୀ ମହାତ୍ମା ଗାନ୍ଧୀଙ୍କ ପୁଣ୍ୟତିଥିକୁ ଶହୀଦ ଦିବସ ଭାବେ ପାଳନ କରଯାଉଛି। ୩୦ ଜାନୁୟାରୀ, ୧୯୪୮ରେ ମହାମତ୍ା ଗାନ୍ଧୀଙ୍କୁ ବିର୍ଲା ହାଉସ୍ର ପ୍ରାର୍ଥନାସଭାରେ ନାଥୁରାମ ଗଡ୍ସେ ଗୁଳିକରି ହତ୍ୟା କରିବା ପରେ ଗାନ୍ଧିଜୀଙ୍କ ଜୀବନଦୀପ ଲିଭିଯାଇଥିଲେ ବି ତାଙ୍କ ଅହିଂସାଦୀପ ସରା ବିଶ୍ୱକୁ ଆଲୋକିତ କରିଆସୁଛିି। ଶହୀଦ ଦିବସରେ ଦେଶ ଲାଗି ନିଜ ଜୀବନକୁ ଉତ୍ସର୍ଗ କରିଥିବା ମହାମତ୍ାଙ୍କ ସମେତ ବହୁ ବୀର ଶହୀଦ ସଂଗ୍ରାମୀଙ୍କୁ ମଧ୍ୟ ଶ୍ରଦ୍ଧାଞ୍ଜଳି ଅର୍ପଣ କରାଯାଇଥାଏ। ଏହି ଅବସରରେ ଦେଶର ବିଭିନ୍ନ ସ୍ଥାନରେ କାର୍ଯ୍ୟକ୍ରମ ଓ ଶ୍ରଦ୍ଧାଞ୍ଜଳି ସଭାମାନ ଆୟୋଜନ କରାଯାଇଥାଏ। ରାଷ୍ଟ୍ରପତି, ଉପରାଷ୍ଟ୍ରପତି, ପ୍ରଧାନମନ୍ତ୍ରୀ, ପ୍ରତିରକ୍ଷାମନ୍ତ୍ରୀ ଓ ତିନି ସେନାର ମୁଖ୍ୟ ରାଜଘାଟସ୍ଥିତ ଗାନ୍ଧିଜୀଙ୍କ ସମାଧିପୀଠରେ ଶ୍ରଦ୍ଧାଞ୍ଜଳି ଦେଇଥାନ୍ତି। ବିଶ୍ୱରେ ସ୍ବାଧୀନତା ସଂଗ୍ରାମୀଙ୍କୁ ଶ୍ରଦ୍ଧାଞ୍ଜଳି ଦେବା ଉଦ୍ଦେଶ୍ୟରେ ଶହୀଦ ଦିବସ ପାଳନ କରୁଥିବା ୧୫ଟି ରାଷ୍ଟ୍ର ମଧ୍ୟରେ ଭାରତ ଅନ୍ୟତମ। ଏହାର କାରଣ, ଇଂରେଜଙ୍କ ବିରୋଧରେ ସଂଗ୍ରାମ କରି ଆମ ଦେଶକୁ ସ୍ବାଧୀନତା ଦେଇଥିବା ବୀର ସଂଗ୍ରାମୀଙ୍କ ତ୍ୟାଗକୁ ଆମେ କେବେ ବି ଭୁଲିପାରିନୁ କି ଭୁଲି ପାରିବୁନାହିଁ। ଗାନ୍ଧିଜୀ ଶାନ୍ତି ଓ ଅହିଂସା ମାର୍ଗରେ ସ୍ବାଧୀନତା ସଂଗ୍ରାମୀଙ୍କୁ ଉଦ୍ବୁଦ୍ଧ କରିଥିଲେ। ସଂଗ୍ରାମୀଙ୍କ ଅତୁଟ ମନୋବଳ ଓ ଅହିଂସାର ଆୟୁଧ ସମ୍ମୁଖରେ ଇଂରେଜ ବେଶି ଦିନ ତିଷ୍ଠିପାରି ନ ଥିଲେ। ସେମାନେ ଦେଶ ଛାଡି ଯିବାକୁ ବାଧ୍ୟ ହୋଇଥିଲେ। ଭାରତର ସ୍ବାଧୀନତା ସଂଗ୍ରାମରେ ଗାନ୍ଧିଜୀଙ୍କ ସହ ଝାସ ଦେଇଥିବା ପ୍ରତ୍ୟେକ ବୀର ସଂଗ୍ରାମୀଙ୍କୁ ଆଜି ଦିନରେ ସ୍ମରଣ କରି ସେମାନେ ସ୍ବାଧୀନ ଭାରତ ପାଇଁ ଦେଖିଥିବା ସ୍ବପ୍ନକୁ ଆଗକୁ ନେବା ଲାଗି ପ୍ରେରଣା ଦେଇଥାଏ ଏହି ଦିବସ। ଦେଶର ପ୍ରଗତି ପାଇଁ ଲଢେଇ ଜାରି ରଖିବା ପାଇଁ ଏହା ସଂକଳ୍ପର ଦିନଟିଏ।
