ଭୋଗରାଇ, ୭।୧୨(ଡି.ଏନ.ଏ.)-ବାଲେଶ୍ୱର ଜିଲା ଭୋଗରାଇ ବ୍ଲକ ଶ୍ରଦ୍ଧାପୁର ପଞ୍ଚାୟତ ଉପନିର୍ବାଚନରେ ବିଶୃଙ୍ଖଳା ଓ ବ୍ଲକ ପରିସରରେ ୧୨ନଂ. ଓ ୧୪ନଂ. ବୁଥ୍ର ଭୋଟ୍ ବାକ୍ସ ଖୋଲାଥିବା ଓ ଭଙ୍ଗାଯାଇଥିବା ଅଭିଯୋଗ ହୋଇଥିଲା। ଉପନିର୍ବାଚନରେ କାର୍ଯ୍ୟରେ ଅବହେଳା କରିଥିବା ଅଭିଯୋଗରେ ୬ଜଣ ଶିକ୍ଷକଙ୍କୁ ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀ କାର୍ଯ୍ୟରୁ ନିଲମ୍ବିତ କରିଛନ୍ତି। ଜିଲାପାଳଙ୍କ ଚିଠି (ନଂ. ୨୩୭୮) ଅନୁଯାୟୀ ଗତ ୩ତାରିଖରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଜିଲାପାଳଙ୍କ ଏହି କାର୍ଯ୍ୟାନୁଷ୍ଠାନ ପରେ ଶିକ୍ଷକଙ୍କ ମହଲରେ ଅସନ୍ତୋଷ ପ୍ରକାଶ ପାଇଛି। ଏହାର ପ୍ରତିବାଦ କରି ଶୁକ୍ରବାର ସନ୍ଧ୍ୟାରେ ଜଳେଶ୍ୱରପୁରସ୍ଥିତ ଶିକ୍ଷକ ଭବନରେ ସମସ୍ତ ବର୍ଗର ଶିକ୍ଷକ ମେଳି କରିଛନ୍ତି। ସେମାନେ ଅବିଳମ୍ବେ ନିଲମ୍ବନ ପ୍ରତ୍ୟାହାର ପାଇଁ ସରକାର ଓ ପ୍ରଶାସନଠାରେ ଦୃଢ଼ ଦାବି କରିଛନ୍ତି। ନଚେତ୍ ପ୍ରାଥମିକ ବିଦ୍ୟାଳୟ ସହ ଉଚ୍ଚ ବିଦ୍ୟାଳୟର ସମସ୍ତ ଶିକ୍ଷକ ମିଳିତ ହୋଇ ବୃହତ୍ତର ଶିକ୍ଷକ ଆନ୍ଦୋଳନ ଗଢ଼ି ତୋଳିବାକୁ ନିଷ୍ପତ୍ତି ନେଇଛନ୍ତି। ସମସ୍ତ ସ୍କୁଲରେ ତାଲା ପଡ଼ିବା ସହିତ ଶିକ୍ଷକମାନେ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି। ନିଲମ୍ବିତ ଶିକ୍ଷକମାନେ ହେଲେ କଲ୍ୟାଣପୁର ଆର୍.ଏନ୍ ଉପ୍ରା ବିଦ୍ୟାଳୟର ତାପସ ସିଂ, ରସଲପୁର ସିଆର୍ସିସି ଅବନୀ କୁମାର ଜେନା, ବାଗରୁଖୀ ଏସ୍ଆର୍ ବିଦ୍ୟାପୀଠର କମ୍ପ୍ୟୁଟର ଶିକ୍ଷକ (ଆଇସିଟି) ତପନ କୁମାର ପ୍ରଧାନ, ଶ୍ରୀଦୁର୍ଗା ପଲ୍ଲୀଭୂମୀ ହାଇସ୍କୁଲର ଶିକ୍ଷକ କମଳଲୋଚନ ପାତ୍ର, ଉତ୍ତରନିଧୁବଣୀ ପ୍ରାଇମେରୀ ସ୍କୁଲର ଶିକ୍ଷକ ସୁକୁମାର ମହାନ୍ତି, ଅନଳିଆ ସରକାରୀ ନୋଡ଼ାଲ ସ୍କୁଲର ଶିକ୍ଷକ ଚିତ୍ତରଞ୍ଜନ ସାହୁ। ଏହି ମେଳିରେ ଉଚ୍ଚମାଧ୍ୟମିକ ଶିକ୍ଷକ ସଂଘର ସଭାପତି ଶ୍ରୀନିବାସ ପ୍ରଧାନ, ସମ୍ପାଦକ ବିଜୟାନନ୍ଦ ପଟ୍ଟନାୟକ, ନଟରଞ୍ଜନ ଘରାଇ, ପ୍ରଶାନ୍ତ କୁମାର ମହାନ୍ତି, ପ୍ରାଥମିକ ଶିକ୍ଷକ ସଂଘର ସଭାପତି ସୁଶାନ୍ତ ବେହେରା, ନିମ୍ନ ମାଧ୍ୟମିକ ଶିକ୍ଷକ ସଂଘର ସଭାପତି ଅଜିତ କୁମାର ସାମଲ, ସମ୍ପାଦକ ସୀତାରାମ ପ୍ରଧାନ, ପରେଶ ଚନ୍ଦ୍ର ଦାସ, ଅଶୋକ କୁମାର ସାହୁ ଓ ଗୌତମ ଦତ୍ତ ପ୍ରମୁଖ ଉପସ୍ଥିତ ଥିଲେ।