ବ୍ରହ୍ମପୁର ଅଫିସ,୧୯ା୮-ଶ୍ରମିକ ଓ ଅଣସଂଗଠିତ ଶ୍ରମିକଙ୍କୁ ରାଜ୍ୟ ସରକାର ମାସିକ ପେନ୍ସନ ଯୋଜନା କାର୍ଯ୍ୟକାରୀ କରିବା ପାଇଁ ଗଞ୍ଜାମ ଜିଲା ବିଜୁ ଶ୍ରମିକ ସାମ୍ମୁଖ୍ୟ ଦାବି କରିଛି । ଅଣ ସଂଗଠିତ ଶ୍ରମିକଙ୍କୁ ରାଜ୍ୟ ସରକାର ଏବେ ସାଧାରଣ ଓ ଦୁର୍ଘଟଣାଜନିତ ମୃତ୍ୟୁ ଏବଂ ସ୍ବାସ୍ଥ୍ୟଗତ ସମସ୍ୟାର ସମାଧାନ ଲାଗି ସହାୟତା ପ୍ରଦାନ କରୁଥିଲେ ମଧ୍ୟ ଏହା ଯଥେଷ୍ଟ ହୋଇ ନ ଥିବା ଦର୍ଶାଇ ଉଦ୍ବେଗ ପ୍ରକାଶ କରାଯାଇଛି। ଅପରପକ୍ଷରେ ଅଣସଂଗଠିତ ଶ୍ରମିକଙ୍କୁ ମାସିକ ୩ ହଜାର ଟଙ୍କା ପେନ୍ସନ ପ୍ରଦାନରେ କେନ୍ଦ୍ର ସରକାରଙ୍କ ପ୍ରଚାରକୁ ସ୍ବାଗତ କରାଯାଇଛି। ତେବେ ସର୍ତ୍ତ ଓ ନିୟମାବଳୀ କଡ଼ାକଡ଼ି ହୋଇଥିବାରୁ ସାମ୍ମୁଖ୍ୟ ସମାଲୋଚନା କରିଛି । ଏହାକୁ କୋହଳ କରିବା ଉପରେ ଗୁରୁତ୍ୱ ଦିଆଯାଇଛି ।
ଜିଲାର ନବ ନିର୍ବାଚିତ ଏମ୍ପି, ବିଧାୟିକା, ବିଧାୟକମାନଙ୍କୁ ସମ୍ବର୍ଦ୍ଧନା ଦେବା ପାଇଁ ଶ୍ରମିକ ସାମ୍ମୁଖ୍ୟ ପକ୍ଷରୁ ରବିବାର ବ୍ରହ୍ମପୁରରେ ସ୍ବତନ୍ତ୍ର ସମାବେଶ ଜିଲା ଶ୍ରମିକ ସାମ୍ମୁଖ୍ୟ ପକ୍ଷରୁ ରବିବାର ବ୍ରହ୍ମପୁରରେ ସ୍ବତନ୍ତ୍ର ସମାବେଶ ଅନୁଷ୍ଠିତ ହୋଇଥିଲା। ପ୍ରକାଶମ୍ ହଲରେ ଆୟୋଜିତ କାର୍ଯ୍ୟକ୍ରମରେ ବିଧାୟକ ତଥା ବିଜୁ ଶ୍ରମିକ ସାମ୍ମୁଖ୍ୟ ଜିଲା ସଭାପତି ଶ୍ରୀକାନ୍ତ ସାହୁ ଅଧ୍ୟକ୍ଷତା କରିଥିଲେ। ସମ୍ପାଦକ ଉଜ୍ଜ୍ୱଳଚାନ୍ଦ ପାଢ଼ୀ ତାଙ୍କ ପ୍ରାରମ୍ଭିକ ଭାଷଣରେ ଉପରୋକ୍ତ ପ୍ରସଙ୍ଗ ଉଠାଇଥିଲେ । ସେ ଆହୁରି ସୂଚାଇଥିଲେ, ବ୍ରହ୍ମପୁର ସମେତ ବିଭିନ୍ନ ସ୍ଥାନରେ ଶ୍ରମିକ ପରିଚୟ ପତ୍ରରୁ ବଞ୍ଚତ୍ତମାନଙ୍କୁ ସାମ୍ମୁଖ୍ୟ ପକ୍ଷରୁ ଚିହ୍ନଟ କରାଯାଇ କାର୍ଡ ସୁବିଧା ଯୋଗାଇ ଦିଆଯାଇଛି। ଅଣସଂଗଠିତ ଶ୍ରମିକ ତଥା ରିକ୍ସା ଚାଳକ, ଅଟୋ ଚାଳକ, ମୋଚି ଶ୍ରମିକ, ବୁଲା ବିକାଳି, କ୍ଷୁଦ୍ର ଚା, ପାନ ଦୋକାନୀ, ଜଙ୍ଗଲରୁ ବିଭିନ୍ନ ସାମଗ୍ରୀ ଆଣୁଥିବା ଶ୍ରମିକଙ୍କୁ ବିଜୁ ଶ୍ରମିକ ସାମ୍ମୁଖ୍ୟରେ ସାମିଲ କରାଇ ସେମାନଙ୍କୁ ଲେବର କାର୍ଡ ପ୍ରଦାନ ସହ ସମସ୍ତ ସରକାରୀ ସୁବିଧା ଯୋଗାଇବାର ପଦକ୍ଷେପ ନିଆଯାଇଥିବା ସମ୍ପାଦକ ଦର୍ଶାଇଥିଲେ ।
ଏହି ଅବସରରେ ବ୍ରହ୍ମପୁର ଏମ୍ପି ଚନ୍ଦ୍ରଶେଖର ସାହୁ, ବିଧାୟକ ବିକ୍ରମ ପଣ୍ଡା, ଆସିକା ବିଧାୟିକା ମଞ୍ଜୁଳା ସ୍ବାଇଁ, ଖଲ୍ଲିକୋଟ ବିଧାୟିକା ସୂର୍ଯ୍ୟମଣି ବୈଦ୍ୟ ପ୍ରମୁଖଙ୍କୁ ସାମ୍ମୁଖ୍ୟ ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା। ପୂର୍ବତନ ବିଧାୟକ ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ, ପୂର୍ବତନ ବିଡିଏ ଅଧ୍ୟକ୍ଷ ସୁବାସ ଚନ୍ଦ୍ର ମହାରଣା ଉଦ୍ବୋଧନ ଦେଇ ଶ୍ରମିକମାନଙ୍କ ସାମୂହିକ କଲ୍ୟାଣ ନିମନ୍ତେ ରାଜ୍ୟ ସରକାରଙ୍କ ପକ୍ଷରୁ ହୋଇଥିବା ଯୋଜନା ସମ୍ପର୍କରେ ସଚେତନ କରାଇଥିଲେ । ବିଜେଡି ରାଜ୍ୟ ସମ୍ପାଦକ ଟି. ଗୋପି, ମହିଳା ବିଜେଡି ଜିଲା ସଭାନେତ୍ରୀ ସଂଘମିତ୍ରା ଦଳାଇ, ଯୁବ ବିଜେଡି ଜିଲା ସଭାପତି ଏନ୍. ଧନଞ୍ଜୟ ରାଓଙ୍କ ସମେତ ଅନ୍ୟ କର୍ମକର୍ତ୍ତା ଓ ଅନେକ ଶ୍ରମିକ ଉପସ୍ଥିତ ଥିଲେ। ସଭାପତି ଶ୍ରୀକାନ୍ତଙ୍କୁ ମଧ୍ୟ ସମ୍ବର୍ଦ୍ଧିତ କରାଯାଇଥିଲା ।