ଯାଜପୁର ରୋଡ,୨୧।୮(ନି.ପ୍ର.)- ନିଖିଳ ଉତ୍କଳ ନିର୍ମାଣ ଶ୍ରମିକ ସଂଘ ପକ୍ଷରୁ ଶ୍ରମିକଙ୍କ ଯନ୍ତ୍ରପାତି କ୍ରୟ ବିଲ୍ ଉପରେ ବାଣିଜ୍ୟକର ବିଭାଗ ପ୍ରଦାନ କରିଥିବା ତଥ୍ୟର ସଂଶୋଧନ ଦାବିରେ ମଙ୍ଗଳବାର ଉପ ବାଣିଜ୍ୟକର ଆୟୋଗ ଯାଜପୁର ରୋଡ କାର୍ଯ୍ୟାଳୟ ସମ୍ମୁଖରେ ଗଣଧାରଣା ଦିଆଯାଇଛି। ଶ୍ରମିକ ସଂଘର ସଭାପତି ବିଦ୍ୟାଧର ମହାନ୍ତିଙ୍କ ନେତୃତ୍ୱରେ ଧାରଣା ଦିଆଯାଇଥିଲା। ଏଥିରେ ୩୨୨ଜଣ ନିର୍ମାଣ ଶ୍ରମିକ ହିତାଧିକାରୀ ଯନ୍ତ୍ରପାତି ୨ ବର୍ଷଧରି କ୍ରୟକରି ଯାଜପୁର ରୋଡ୍ ଜିଲା ଶ୍ରମ ଦପ୍ତରରେ ବିଲ୍ ପୈଠ କରିଥିଲେ। ଉକ୍ତ ବିଲ୍ଗୁଡିକୁ ଜିଲା ଶ୍ରମବିଭାଗ ଯାଞ୍ଚ ପାଇଁ ବାଣିଜ୍ୟକର ବିଭାଗକୁ ପ୍ରଦାନ କରିଥିଲେ। ବାଣିଜ୍ୟକର ବିଭାଗ କ୍ରୟବିଲ୍ ଉପରେ ଭୁଲ୍ ତଥ୍ୟ ଦେଇଥିବାରୁ ଶ୍ରମବିଭାଗ ହିତାଧିକାରୀଙ୍କର ବିଲ୍ କରି ନାହାନ୍ତି। ଫଳରେ ୩୨୨ଜଣ ଶ୍ରମିକ ଅନୁଦାନରୁ ବଞ୍ଚତ୍ତ ହୋଇଛନ୍ତି ା ଏହି ବିଲ୍କୁ ପୂର୍ଣ୍ଣ ବିଚାର କରାଯାଇ ଶ୍ରମଆଇନ ଯୋଜନାରେ ଶ୍ରମିକଙ୍କୁ କ୍ରୟ ବାବଦ ସହାୟତା ରାଶି ଯୋଗାଇ ଦେବାପାଇଁ ଶ୍ରମିକ ସଂଘ ପକ୍ଷରୁ ଦାବି କରାଯାଇଛି। ଖରା ଓ ବର୍ଷାରେ ଶ୍ରମିକମାନେ ଧାରଣା ଦେଇଥିଲେ। ହେଲେ ବାଣିଜ୍ୟକର ବିଭାଗର ଅଧିକାରୀ ଧାରଣା ସ୍ଥଳକୁ ନ ଆସିବାରୁ ଧାରଣାକାରୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ନିଖିଳ ଉତ୍କଳ ନିର୍ମାଣ ଶ୍ରମିକ ସଂଘର ସମ୍ପାଦକ ପରମାନନ୍ଦ ସେଠୀ, ଶିବ ପ୍ରସାଦ ନାଥ, ପ୍ରବୀଣ କୁମାର ନାୟକ, କୁନୀ ଓଝା, ସଞ୍ଜୁଲତା ଦାସ୍, ବିଜୟ ବୋଇତେଇ, ପ୍ରଫୁଲ୍ଲ ଜେନା, ଶତ୍ରୁଘନ ମଳିକ, କବିତା ପାତ୍ର, ଲତା ଜେନା, ସୁନିତା ଦାସ ପ୍ରମୁଖ ବହୁ ହିତାଧିକାରୀ ଯୋଗଦେଇଥିଲେ। ଯାଜପୁର ଜିଲାପାଳଙ୍କ ଅଧ୍ୟକ୍ଷତାରେ ଗତ ଫେବୃୟାରୀ ୩୦ତାରିଖରେ ଏ ସମ୍ପର୍କରେ ଏକ ଉଚ୍ଚସ୍ତରୀୟ ବୈଠକରେ ହିତାଧିକାରୀଙ୍କ ଅର୍ଥ ପୈଠ ନିଷ୍ପତ୍ତି ନିଆଯାଇଥିଲା। ଶ୍ରମବିଭାଗ ଓ ବାଣିଜ୍ୟକର ବିଭାଗର ଟାଳଟୁଳ ନୀତିଯୋଗୁ ହିତାଧିକାରୀମାନେ ଅର୍ଥ ପାଇବା ପାଇଁ ବଞ୍ଚତ୍ତ ହେଉଥିବା ଧାରଣାରେ କୁହାଯାଇଛି। ଏ ଦିଗରେ ସମାଧାନ ନ ହେବା ପର୍ଯ୍ୟନ୍ତ ଗଣଧାରଣା ଚାଲୁରହିବ। ବୁଧୁବାର ନିର୍ମାଣ ଶ୍ରମିକମାନେ ଉପ ବାଣିଜ୍ୟକର ଆୟୋଗଙ୍କ କାର୍ଯ୍ୟାଳୟରେ ତାଲା ପକାଇବା ନେଇ ଧାରଣାକାରୀ କହିଛନ୍ତି। ଏ ସମ୍ପର୍କରେ ଉପବାଣିଜ୍ୟକର ଆୟୋଗ ପୂର୍ଣ୍ଣଚନ୍ଦ୍ର ଯେନାଙ୍କୁ ପଚାରିବାରୁ, ନିର୍ମାଣ ଶ୍ରମକଙ୍କ ବିଲ୍ଗୁଡିକ ଯାଞ୍ଚ କରିବା ପାଇଁ ଶ୍ରମ ବିଭାଗ ବାଣିଜ୍ୟକର ବିଭାଗକୁ ପଠାଇଥିଲା। ଯାଜପୁର ଟାଉନ ୟୁନିଟି ବିଲ୍ଗୁଡିକୁ ଯାଞ୍ଚକରି ତ୍ରୁଟିପୂର୍ଣ୍ଣ ଦର୍ଶାଇ ଶ୍ରମବିଭାଗକୁ ପଠାଇଥିବାରୁ ଶ୍ରମବିଭାଗ ନିର୍ମାଣ ଶ୍ରମିକଙ୍କ ବିଲ୍ ଉପରେ ନିଷ୍ପତ୍ତି ନେବେ। ବାଣିଜ୍ୟକର ବିଭାଗ ଏ ଦିଗରେ କିଛି କରିପାରିବେ ନାହଁି ବୋଲି କହିଛନ୍ତି।