ଭୁବନେଶ୍ୱର, ୯।୫(ବ୍ୟୁରୋ): ରାଜ୍ୟ ସରକାର ୨୦୨୦ ଏପ୍ରିଲ ୨୦ରେ ଶିଳ୍ପ ଓ ବାଣିଜି୍ୟକ କାର୍ଯ୍ୟକଳାପ ପାଇଁ ଜାରି କରିଥିବା କଟକଣାକୁ କିଛି ମାତ୍ରାରେ କୋହଳ କରିଛନ୍ତି। ଶ୍ରମିକମାନେ ଦୈନିକ ୮ ଘଣ୍ଟା ବଦଳରେ ୧୨ ଘଣ୍ଟା କାମ କରି ପାରିବେ। ଶ୍ରମିକମାନଙ୍କୁ କାରଖାନାରେ ଦୈନିକ ୧୨ ଘଣ୍ଟାରୁ ଅଧିକ କିମ୍ବା ସପ୍ତାହକୁ ୭୨ ଘଣ୍ଟାରୁ ଅଧିକ ସମୟ କାମରେ ନିୟୋଜିତ କରାଯାଇ ପାରିବ ନାହିଁ। କୌଣସି ଶ୍ରମିକ ଏକାଥରରେ ୬ଘଣ୍ଟାରୁ ଅଧିକ ସମୟ କାମ କରିବା ଉପରେ କଟକଣା ଜାରି କରାଯାଇଛି। ପ୍ରତି ୬ ଘଣ୍ଟାରେ ୩୦ ମିନିଟ ପାଇଁ ବିଶ୍ରାମ ଦେବାକୁ ପଡ଼ିବ। କାରଖାନା ଆଇନର ଧାରା ୫୪ ଅନୁଯାୟୀ ଜଣେ ଶ୍ରମିକ ସପ୍ତାହକୁ ୨୪ ଘଣ୍ଟାରୁ ଅଧିକ ସମୟ ଓଭର ଟାଇମ୍ କରି ପାରିବେ ନାହିଁ। ଶ୍ରମିକମାନଙ୍କୁ ଦୈନିକ ୪ ଘଣ୍ଟାର ଓଭର ଟାଇମ୍ ମଜୁରି ଦେବାକୁ ପଡ଼ିବ। କାରଖାନାରେ ୧୩ ଘଣ୍ଟାରୁ ଅଧିକ ସମୟ ରହି ହେବ ନାହିଁ। କୌଣସି ମହିଳା ଶ୍ରମିକଙ୍କୁ ସରକାରଙ୍କ ବିନାନୁମତିରେ ସନ୍ଧ୍ୟା ୭ଟାରୁ ସକାଳ ୬ଟା ଯାଏ କାର୍ଯ୍ୟରେ ଲଗାଯାଇ ପାରିବ ନାହିଁ। ଏହି ସମୟରେ କୋଭିଡ-୧୯ ସଂକ୍ରାନ୍ତ ଗାଇଡ୍ଲାଇନ୍କୁ କଡ଼ାକଡ଼ି ପାଳନ କରିବାକୁ ସରକାର ଶିଳ୍ପ ସଂସ୍ଥାଗୁଡିକୁ ପରାମର୍ଶ ଦେଇଛନ୍ତି। ସୂଚନା ଓ ଲୋକ ସମ୍ପର୍କ ସଚିବ ସଞ୍ଜୟ କୁମାର ସିଂ ଶୁକ୍ରବାର ଗଣମାଧ୍ୟମକୁ ଏହି ସୂଚନା ଦେଇଛନ୍ତି।