ନବରଙ୍ଗପୁର,୧୫।୨(ବି.ପ୍ର.)
ଶିକ୍ଷା ଓ ସଚେତନତା ଅଭାବ ଯୋଗୁ ଅନେକ ଶ୍ରମିକ ଠକାମିର ଶିକାର ହେଉଛନ୍ତି। ଜିଲା ଶ୍ରମ ଅଧିକାରୀଙ୍କ କାର୍ଯ୍ୟାଳୟରେ ଶ୍ରମ କାର୍ଡ ପାଇଁ ନାମ ପଞ୍ଜୀକରଣ କରାଇ ଦେବାକୁ କହି ଲୋକଙ୍କୁ ଠକି ଚାଲିଛନ୍ତି ଦଲାଲ। ନକଲି ପଞ୍ଜୀକରଣ ପତ୍ର ଧରାଇ ଦେଇ ଟଙ୍କା ନେଇ ଚାଲି ଯାଉଛନ୍ତି। ଶ୍ରମିକମାନେ କାର୍ଯ୍ୟାଳୟକୁ ଆସି ବୁଝିବା ସମୟରେ ସେ ଗୁଡିକ ଅସଲି ନୁହେଁ ନକଲି ବୋଲି ଜାଣି ହତାଶ ହୋଇ ଘରକୁ ଫେରୁଛନ୍ତି।
ନବରଙ୍ଗପୁର ଜିଲା ପାପଡାଡାଣ୍ଡି ବ୍ଲକ ଅଧୀନ କଣ୍ଟାମାଳ ଗାଁର ଦୁଲବ ଜାନୀ ରାଜମସ୍ତ୍ରି କାମ କରୁଛନ୍ତି। ଶ୍ରମ ଅଧିକାରୀଙ୍କ କାର୍ଯ୍ୟାଳୟରେ ସେ ତାଙ୍କ ନାମ ପଞ୍ଜୀକରଣ କରାଇବାକୁ ଚାହିଁଥିଲେ। ତେବେ ଜଣେ ଲୋକ ଏଥିପାଇଁ ଫର୍ମ ପୂରଣ କରି ସେ ବାବଦକୁ ୫୦ ଟଙ୍କା ପ୍ରଥମେ ନେଇଥିଲେ। ପଞ୍ଜୀକରଣ କାର୍ଡ ଦେବା ପରେ ବକେୟା ଅର୍ଥ ନେବେ ବୋଲି କହିଥିଲେ। ପରେ ସେ ଦୁଲବଙ୍କଠାରୁ ୫୭୦ ଟଙ୍କା ନେଇ ଏକ କାର୍ଡ ଦେଇଥିଲେ। କାର୍ଡ ମାଧ୍ୟମରେ କିଛି ସରକାରୀ ସୁବିଧା ମିଳିବ ନା ନାହିଁ ତାହ ା ଜାଣିବାକୁ ସେ ଓଡିଏନ୍ବିଆର୦୦୧୦୩୯୩୮ ନମ୍ବର ବିଶିଷ୍ଟ କାର୍ଡକୁ ନେଇ ଗୁରୁବାର ନବରଙ୍ଗପୁର ମଣ୍ଡଳ ଲେବର କମିଶନରଙ୍କ କାର୍ଯ୍ୟାଳୟକୁ ଆସିଥିଲେ। ସେଠାରେ ଉକ୍ତ କାର୍ଡ ଯାଞ୍ଚ ପରେ ତାହା ନକଲି ବୋଲି ଜଣାପଡିଥିଲା। ୨୭ ହଜାର ଶ୍ରମିକ ପଞ୍ଜୀକରଣ ପୂର୍ବରୁ ଅଫ୍ଲାଇନରେ ପଞ୍ଜିକରଣ କରାଯାଉଥିଲା। ତାହା ପରଠାରୁ ଅନ୍ଲାଇନ ପଞ୍ଜୀକରଣ କରାଯାଉଛି। ଅନ୍ଲାଇନ ପଞ୍ଜୀକରଣରେ ଦୁଲବଙ୍କ ନାମ ନ ଥିବା ଜଣାପଡିଥିଲା। ତେବେ ଯେଉଁ କାର୍ଡ ଦେଇଛନ୍ତି ତାହା ଦେଖିବାକୁ ଅବିକଳ ଅସଲି। ସେଥିରେ ସେଠାରେ ଶ୍ରମ ନିରୀକ୍ଷକ ଅଶୋକ କୁମାର ଦାଶଙ୍କ ଦସ୍ତଖତ ମଧ୍ୟ ରହିଛି। ଯାହାକୁ କିନ୍ତୁ ଶ୍ରମ କାର୍ଯ୍ୟାଳୟ ପକ୍ଷରୁ ନକଲି କୁହାଯାଉଛି। ଏନେଇ ଦୁଲବ କହିଛନ୍ତି ଯେ, ଉକ୍ତ ଲୋକ ଗାଁର ୫୦ ଜଣଙ୍କ ଠାରୁ ଟଙ୍କା ଆଦାୟ କରିଛନ୍ତି। ଏ ନେଇ ସେ ଜିଲାପାଳ ଓ ମଇଦଲପୁର ଫାଣ୍ଡିରେ ଅଭିଯୋଗ କରିବେ ବୋଲି କହିଛନ୍ତି। ଏହି ଘଟଣା ସମ୍ପର୍କରେ ଜିଲା ଶ୍ରମ ଅଧିକାରୀ ନରେନ୍ଦ୍ର କୁମାର ଗଇପାଇଙ୍କୁ ପଚାରିବାରୁ ଏଭଳି ଅଭିଯୋଗ ଆସିଲେ ତଦନ୍ତ ସହ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।