ବାରିପଦା ଅଫିସ,୩୦ା୫- ମୟୂରଭଞ୍ଜ ଜିଲା ନିର୍ମାଣ ଶ୍ରମିକ ସମନ୍ବୟ ସମିତି ପକ୍ଷରୁ ଶନିବାର ୯ ଦଫା ଦାବିରେ ପ୍ରଭାଗୀୟ ଶ୍ରମ ଆୟୁକ୍ତଙ୍କ କାର୍ଯ୍ୟାଳୟ ଆଗରେ ବିକ୍ଷୋଭ ପ୍ରଦର୍ଶନ କରାଯାଇଥିଲା। ଶ୍ରମିକ ସଂଘ ସମନ୍ବୟ ସମିତିର ସଭାପତି ଅମଲ ଦେଙ୍କ ନେତୃତ୍ୱରେ ଅପରାହ୍ନରେ ବିକ୍ଷୋଭ ପ୍ରଦର୍ଶନ କରାଯାଇ ସରକାରଙ୍କ ବିଭିନ୍ନ ଶ୍ରମିକ ମାରଣନୀତିକୁ ବିରୋଧ କରାଯାଇଥିଲା। ପ୍ରବାସୀ ଶ୍ରମିକମାନଙ୍କୁ ସରକାରୀ ଖର୍ଚ୍ଚରେ ସେମାନଙ୍କୁ ଘରକୁ ଫେରାଇ ଆଣିବା ଏବଂ ନିଜ ଖର୍ଚ୍ଚରେ ଆସିଥିବା ଶ୍ରମିକମାନଙ୍କୁ ସେମାନଙ୍କ ଗସ୍ତ ଟଙ୍କା ପ୍ରଦାନ କରିବା, କରୋନା ପରିସ୍ଥିତି ନ ସୁଧୁରିବା ପର୍ଯ୍ୟନ୍ତ ୬ ମାସ ଯାଏ ପ୍ରତି ନିର୍ମାଣ ଶ୍ରମିକଙ୍କୁ ମାସକୁ ୧୦ କିଲୋ ଚାଉଳ, ୧ କିଲୋ ଡାଲି, ୧୦ ହଜାର ଟଙ୍କା ପ୍ରଦାନ କରିବା, ନିର୍ମାଣ ଶ୍ରମିକମାନଙ୍କୁ ସରକାରଙ୍କ ତରଫରୁ ୧୫୦୦ ଟଙ୍କା ଯୋଗାଇ ଦିଆଯାଉଥିବା ବେଳେ ସମସ୍ତେ ଏ ପର୍ଯ୍ୟନ୍ତ ତାହା ପାଇ ପାରି ନାହାନ୍ତି। ଶ୍ରମ ଅଫିସରେ ପଡ଼ି ରହିଥିବା ପଞ୍ଜୀକରଣ ଆବେଦନ ପତ୍ରକୁ ପଞ୍ଜୀକରଣ କରାଯାଇ କାର୍ଡ ପ୍ରଦାନ କରିବା। ଜିଲାରେ କେତେ ଶ୍ରମିକ କେଉଁ ବାବଦରେ ସହାୟତା ରାଶି , କେତେ ପଞ୍ଜୀକୃତ ହୋଇଛନ୍ତି ତାହାର ତାଲିକା ପ୍ରଦାନ କରିବା। ଏମ୍ଜିଏନ୍ଆର୍ଇଜିଏସ୍ରେ କାମ ୧୦୦ ଦିନରୁ ୨୦୦ ଦିନକୁ ବୁଦ୍ଧି କରି ତୁରନ୍ତ କାମ ଯୋଗାଇ ଦେବା, କରୋନା ଯୋଦ୍ଧା ବୀମାରାଶି ପରି ଦୁର୍ଘଟଣାରେ ପ୍ରାଣ ହରାଇଥିବା ଶ୍ରମିକ ପରିବାରକୁ ୫ ଲକ୍ଷ ଟଙ୍କାର ବୀମା ରାଶି ପ୍ରଦାନ କରିବା ଭଳି ୯ ଦଫା ଦାବିରେ ବିକ୍ଷୋଭ ପ୍ରଦର୍ଶନ କରାଯାଇଥିଲା। ସମ୍ପାଦକ କାହ୍ନୁଚରଣ ବେହେରା, ନନ୍ଦ କୁମାର ମହାପାତ୍ର, ରବି ଗୋସ୍ବାମୀ, ସୂର୍ଯ୍ୟକାନ୍ତ ସାହୁଙ୍କ ସମେତ ବହୁ ନେତା ଓ ଶ୍ରମିକମାନେ ଏହି ବିକ୍ଷୋଭରେ ସାମିଲ ହୋଇଥିଲେ।