ଗୁଣପୁର,୧୭।୪(ଡି.ଏନ୍.ଏ.)-ରାୟଗଡା ଜିଲା ଗୁଣପୁର ବିଜେଡିରେ ଥିବା ମତଭେଦ ଯୋଗୁ ଶ୍ରାଦ୍ଧ ଦିବସରେ ପ୍ରବାଦ ପୁରୁଷଙ୍କ ପ୍ରତି ଅସମ୍ମାନ ହେଲାଭଳି ଘଟଣା ଦେଖିବାକୁ ମିଳିଛି। ବୁଧବାର ନୂତନ ବସ୍ଷ୍ଟାଣ୍ଡସ୍ଥିତ ବିଜୁ ପଟ୍ଟନାୟକଙ୍କ ପ୍ରତିମୂର୍ତ୍ତୀରେ ବିଜେଡିର କେହି ନେତା ଓ କର୍ମୀ ଫୁଲମାଳଟିଏ ସୁଦ୍ଧା ପକାଇ ନାହାନ୍ତି। ଏହାକୁ ନେଇ ବିଜୁ ପ୍ରେମୀ ନିରାଶ ହେବା ସହ ଏହାର ନିନ୍ଦା କରିଛନ୍ତି।
ପୂର୍ବରୁ ଜିଲା ପରିଷଦ ସଭ୍ୟ ଅଶ୍ୱିନୀ ଗମାଙ୍ଗ ଏବଂ ବିଧାୟକ ସମର୍ଥିତ ପୂର୍ବତନ ଏନଏସି ଅଧ୍ୟକ୍ଷ ଶିବ ପ୍ରସାଦ ଗୌଡ଼ଙ୍କ ପୃଥକ ଗୋଷ୍ଠୀ ସମାନ୍ତରାଳ ଭାବେ ଦଳର ବିଭିନ୍ନ କାର୍ଯ୍ୟକ୍ରମ କରୁଥିବା ଅନେକ ନଜିର ରହିଥିଲା। ଦଳ ଭିତରେ ଦୁଇ ଗୋଷ୍ଠୀଙ୍କ ମଧ୍ୟରେ ତୀବ୍ର ମତଭେଦ ପଞ୍ଚାୟତ ନିର୍ବାଚନରେ ବିଜେଡି ବପର୍ଯ୍ୟୟର କାରଣ ହୋଇଥିଲା। ଶେଷରେ ସଦ୍ୟ ସମାପ୍ତ ନିର୍ବାଚନରେ ଦଳ ଭିତରେ ପ୍ରବଳ ବିରୋଧ ଯୋଗୁ ବିଧାୟକ ତ୍ରିନାଥ ଗମାଙ୍ଗଙ୍କୁ ଟିକେଟ ମିଳି ନ ଥିଲା। ଶେଷରେ ସେ ଦଳରୁ ଇସ୍ତଫା ଦେଇ ସ୍ବାଧୀନ ଭାବେ ଲଢିଥିଲେ। ତାଙ୍କର ଦୃଢ ସମର୍ଥକ ଶିବ ଗୌଡଙ୍କୁ ମଧ୍ୟ ଦଳରୁ ବହିଷ୍କାର କରାଯାଇଥିଲା। ଶିବ ଗୌଡ ଦଳରୁ ବହିଷ୍କୃତ ହେଇଥିବା ବେଳେ ଦଳର ଅନ୍ୟ ନେତା ଓ କର୍ମୀ ବିଜୁ ବାବୁଙ୍କୁ ଭୁଳିଯିବା ଆଲୋଚନାର ବିଷୟ ହୋଇଛି।