ଆନନ୍ଦପୁର,୨୯। ୭(ସ୍ବ.ପ୍ର.)- ଆଜି ଶ୍ରାବଣ ମାସର ଦ୍ୱିତୀୟ ସୋମବାର। ଏହି ଉପଲକ୍ଷେ ସକାଳୁ ବିଭିନ୍ନ ଅଞ୍ଚଳରୁ ଶୈବଭକ୍ତମାନେ ଆନନ୍ଦପୁରର ପବିତ୍ର ପୁର୍ଣ୍ଣତ୍ୱୟା ବୈତରଣୀରୁ ଜଳ ନେଇ ଶୈବ ପୀଠ ଅଭିମୁଖେ ଯାତ୍ରା କରିଥିଲେ। ଯାତ୍ରା ସମୟରେ ବୋଲ୍ ବମ୍, ହର ହର ବମ୍, ଜଟିଆ ବାବା ପାର କରେଗା, ଲମ୍ବା ରାସ୍ତା ପାର୍ କରେଗା ଧ୍ୱନୀରେ ସହର ପ୍ରକମ୍ପିତ ହୋଇଥିଲା। ସ୍ଥାନୀୟ ଶୈବ ଭକ୍ତ ମାନେ ଜଳ ନେଇ ଅନ୍ୟସ୍ଥାନକୁ ଯାତ୍ରା କରୁଥିବାବେଳେ ବାହାର ଅଞ୍ଚଳର ଭକ୍ତମାନେ ବୈତରଣୀ ଜଳ ନେଇ ନିଜ ଅଞ୍ଚଳରେ ଥିବା ଶୈବପୀଠରେ ଲାଗି କରିଥିଲେ। ଏଥିପାଇଁ ସକାଳ ସମୟରୁ ଦିନ ୧୧ ଟା ପର୍ଯ୍ୟନ୍ତ ସହରର ବିଭିନ୍ନ ସ୍ଥାନରେ ଶୈବଭକ୍ତମାନଙ୍କୁ ଦେଖିବାକୁ ମିଳିଥିଲା। ଛୋଟ ଛୁଆଠାରୁ ଆରମ୍ଭ କରି ମହିଳା, ପୁରୁଷ, ବୟସ୍କ ଶୈବ ଭକ୍ତମାନେ କାନ୍ଧରେ କାଉଡ଼ି ଧରି ଶୈବପୀଠ ଅଭିମୁଖେ ଯାତ୍ରା କରିଥିଲେ। ଦ୍ୱିତୀୟ ସୋମବାରରେ ଆନନ୍ଦପୁରର ଉତରେଶ୍ୱର, ଝାଡେଶ୍ୱର, କୁଣ୍ଡେଶ୍ୱର, ଦେଓଗାଁର କୁଶଳେଶ୍ୱର ପ୍ରଭୃତି ଶୈବପୀଠରେ ଭକ୍ତଙ୍କ ଭିଡ଼ ଲାଗି ରହିଥିଲା।