ଟୋକିଓ,୨୪।୭- ଦେଶର ଅଗ୍ରଣୀ ପୁରୁଷ ସିଙ୍ଗଲ୍ସ ଶଟଲର କିଡାମ୍ବି ଶ୍ରୀକାନ୍ତ ଚଳିତ ବର୍ଷ ଫର୍ମ ସହ ସଂଘର୍ଷ କରୁଛନ୍ତି। ଏଠାରେ ଚାଲିଥିବା ଜାପାନ ଓପନ ବ୍ୟାଡ୍ମିଣ୍ଟନ ଟୁର୍ନାମେଣ୍ଟର ପ୍ରଥମ ରାଉଣ୍ଡରେ ସେ ଅନ୍ୟ ଭାରତୀୟ ଖେଳାଳି ଏଚ୍. ଏସ୍. ପ୍ରଣୟଙ୍କଠାରୁ ପରାସ୍ତ ହୋଇଛନ୍ତି। ସାଢ଼େ ୭ ଲକ୍ଷ ଆମେରିକୀୟ ଡଲାର ପୁରସ୍କାର ରାଶି ବିଶିଷ୍ଟ ଟୁର୍ନାମେଣ୍ଟର ପ୍ରଥମ ମୁକାବିଲାକୁ ପ୍ରଣୟ ୧୩-୨୧, ୨୧-୧୧, ୨୨-୨୦ ଗେମ୍ରେ ଜିତି ନେଇଛନ୍ତି। ଦୁଇ ଖେଳାଳିଙ୍କ ମଧ୍ୟରେ ଦୀର୍ଘ ଏକ ଘଣ୍ଟା ଧରି କଡ଼ା ସଂଘର୍ଷ ହୋଇଥିଲା। ୮ମ ସିଡ୍ ଶ୍ରୀକାନ୍ତ ୨୧-୧୩ ବ୍ୟବଧାନରେ ପ୍ରଥମ ଗେମ୍କୁ ଜିତି ନେଇଥିଲେ। ହେଲେ ଦ୍ୱିତୀୟ ଗେମ୍ରେ ଆଶାନୁଯାୟୀ ପ୍ରଦର୍ଶନ କରିପାରି ନ ଥିଲେ। ଏହାପରେ ନିର୍ଣ୍ଣାୟକ ଗେମ୍ରେ ଦୁଇ ଖେଳାଳି ମ୍ୟାଚ୍ ହାତେଇବା ଲାଗି ବହୁ ଉଦ୍ୟମ କରିଥିଲେ। କିନ୍ତୁ ପୂର୍ବତନ ଶୀର୍ଷ ର଼୍ୟାଙ୍କଧାରୀ ଖେଳାଳି ବିଫଳ ହୋଇଥିଲେ। ପୂର୍ବରୁ ଉଭୟଙ୍କ ମଧ୍ୟରେ ୫ ଥର ମୁକାବିଲା ହୋଇଥିଲେ ହେଁ, ଶ୍ରୀକାନ୍ତ ୪ଥର ଜିତାପଟ ହାତେଇଥିଲେ।