ନୂଆଦିଲ୍ଲୀ, ୨୮ା୧୨(ପି.ଟି.)-ଭାରତର ପୂର୍ବତନ ଅଧିନାୟକ ତଥା ୧୯୮୩ ବିଶ୍ୱକପ୍ ବିଜୟୀ ଭାରତୀୟ ଦଳର ଅନ୍ୟତମ ସଦସ୍ୟ କ୍ରିଷ୍ଣାମାଚାରୀ ଶ୍ରୀକାନ୍ତ ଚଳିତବର୍ଷ ସମ୍ମାନଜନକ ସିକେ ନାୟୁଡୁ ଲାଇଫ୍ ଟାଇମ୍ ଆଚିଭମେଣ୍ଟ ଆଓ୍ବାର୍ଡ ପାଇବେ। ତାଙ୍କ ସହିତ ଭାରତ ମହିଳା ଦଳର ପୂର୍ବତନ ଅଧିନାୟିକା ଅଞ୍ଜୁମ ଚୋପ୍ରା ମଧ୍ୟ ୨୦୧୯ ବର୍ଷ ପାଇଁ ଲାଇଫ୍ ଟାଇମ୍ ଆଚିଭମେଣ୍ଟ ଆଓ୍ବାର୍ଡ ପାଇବା ପାଇଁ ମନୋନୀତ ହୋଇଛନ୍ତି। ଜାନୁୟାରୀ ୧୪ରେ ଅଷ୍ଟ୍ରେଲିଆ ବିପକ୍ଷ ପ୍ରଥମ ଅନ୍ତର୍ଜାତୀୟ ଦିନିକିଆ ପୂର୍ବରୁ ଅର୍ଥାତ ଜାନୁୟାରୀ ୧୨ରେ ମୁମ୍ବାଇଠାରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ବାର୍ଷିକ ପୁରସ୍କାର ଉତ୍ସବରେ ଏହି ଦୁଇଜଣଙ୍କୁ ସମ୍ମାନିତ କରାଯିବ। ଭାରତୀୟ କ୍ରିକେଟ ପ୍ରତି ଉଭୟ ଶ୍ରୀକାନ୍ତ ଏବଂ ଅଞ୍ଜୁମଙ୍କର ଉଲ୍ଲେଖନୀୟ ଅବଦାନ ରହିଛି। ପୂର୍ବତନ ଭାରତ ଅଧିନାୟକ ଏସ୍. ଭେଙ୍କଟ ରାଘବନ ଏବଂ ରବିଚନ୍ଦ୍ରନ ଅଶ୍ୱିନଙ୍କୁ ଛାଡ଼ିଦେଲେ ଶ୍ରୀକାନ୍ତ ହେଉଛନ୍ତି ତାମିଲନାଡୁ କ୍ରିକେଟର ଅନ୍ୟତମ ନାମୀ ଖେଳାଳି। ସେ ୧୯୮୧ରୁ ୧୯୯୨ ମଧ୍ୟରେ ଭାରତୀୟ କ୍ରିକେଟ ଦଳରେ ପ୍ରତିନିଧିତ୍ୱ କରିଥିଲେ। ୬୦ ବର୍ଷୀୟ ଶ୍ରୀକାନ୍ତ ୪୩ ଟେଷ୍ଟ ମ୍ୟାଚରେ ମୋଟ ୨୦୬୨ ରନ ସଂଗ୍ରହ କରିଛନ୍ତି। ତନ୍ମଧ୍ୟରେ ତାଙ୍କର ଦୁଇଟି ଶତକ ଏବଂ ୧୨ଟି ଅର୍ଦ୍ଧଶତକ ସାମିଲ ରହିଥିଲା। ଅନ୍ତର୍ଜାତୀୟ ଦିନିକିଆରେ ସେ ତାଙ୍କ ସମୟରେ ବିନା ହେଲମେଟ୍ରେ ଫାଷ୍ଟ ବୋଲରଙ୍କ ବୋଲିଂରେ ହୁକ୍ ଶଟ୍ ଖେଳିଥିବାର ବହୁ ଦୃଷ୍ଟାନ୍ତ ରହିଛି। ୧୯୮୩ ପ୍ରୁଡେନ୍ସିଆଲ ବିଶ୍ୱକପ୍ ଫାଇନାଲରେ ସେ ଭାରତୀୟ ଦଳର ଟପ୍ ସ୍କୋରର ଥିଲେ। ମାଲକମ ମାର୍ଶାଲ, ଜୋଏଲ ଗାର୍ନର, ଆଣ୍ଡି ରବଟର୍ସ ଏବଂ ମାଇକେଲ ହୋଲ୍ଡିଂଙ୍କୁ ନେଇ ସେ ସମୟର ଦୁର୍ଦ୍ଧର୍ଷ ଓ୍ବେଷ୍ଟଇଣ୍ଡିଜ ବୋଲିଂ ଆକ୍ରମଣର ସାମ୍ନା କରି ସେ ୩୮ ରନ କରିଥିଲେ। ପୁନଶ୍ଚ ସେ ୧୯୮୫ରେ ବେନସନ ହେଜେସ୍ ଓ୍ବାଲର୍ଡ ଚାମ୍ପିୟନଶିପ୍ ଫାଇନାଲରେ ପାକିସ୍ତାନ ବିପକ୍ଷରେ ଏକ ଅର୍ଦ୍ଧଶତକ ହାସଲ କରିଥିଲେ। ୧୯୮୯ରେ କଠିନ ପାକିସ୍ତାନ ଟୁର୍ ପାଇଁ ଶ୍ରୀକାନ୍ତଙ୍କୁ ଅଧିନାୟକ ଭାବେ ମନୋନୀତ କରାଯାଇଥିଲା। ଏହି ଟୁର୍ରେ ସଚିନ ତେନ୍ଦୁଲକର ତାଙ୍କ ଅନ୍ତର୍ଜାତୀୟ ପଦାର୍ପଣ କରିଥିଲେ। ଏହି ସିରିଜ ଡ୍ର ରହିଥିଲା। ମାତ୍ର ଏହାପରେ ତାଙ୍କୁ ଭିନ୍ନ ପରିସ୍ଥିତିରେ ଅଧିନାୟକ ପଦବୀରୁ ବିଦାୟ ନେବାକୁ ପଡ଼ିଥିଲା। ୧୯୯୨ରେ ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡରେ ବିଶ୍ୱକପ୍ ପରେ ଶ୍ରୀକାନ୍ତ କ୍ରିକେଟରୁ ଅବସର ନେଇଥିଲେ। ପରେ ସେ ୨୦୦୯ରୁ ୨୦୧୨ ପର୍ଯ୍ୟନ୍ତ ନ୍ୟାଶନାଲ ସିଲେକ୍ସନ କମିଟିର ଚେୟାରମ୍ୟାନ ଥିଲେ। ଶ୍ରୀକାନ୍ତଙ୍କ ନେତୃତ୍ୱାଧୀନ କମିଟି ୨୦୧୧ ବିଶ୍ୱକପ୍ ପାଇଁ ଦଳ ମନୋନୟନ କରିଥିଲା। ଅନ୍ୟପକ୍ଷରେ ମିଥାଲି ରାଜ୍ଙ୍କ ପୂର୍ବରୁ ୪୨ ବର୍ଷୀୟା ଅଞ୍ଜୁମ ଭାରତର ଅନ୍ୟତମ ଶ୍ରେଷ୍ଠ ବ୍ୟାଟ୍ସଓମ୍ୟାନ ବିବେଚିତ ହେଉଥିଲେ। ସେ ବାମହାତୀ ଥିଲେ। ଅଞ୍ଜୁମ ୧୨ଟି ଟେଷ୍ଟ ଖେଳି ୫୪୮ ରନ ସଂଗ୍ରହ କରିଥିଲେ। ସେ ଆହୁରି ମଧ୍ୟ ୧୨୭ ଅନ୍ତର୍ଜାତୀୟ ଦିନିକିଆ ଖେଳିଛନ୍ତି। ସେ ଗୋଟିଏ ଶତକ ଏବଂ ୧୮ ଅର୍ଦ୍ଧଶତକ ହାସଲ କରିଛନ୍ତି। ସେ ୧୮ଟି ଅନ୍ତର୍ଜାତୀୟ ଟି୨୦ ଖେଳିଛନ୍ତି। ୨୦୦୫ରେ ଅଷ୍ଟ୍ରେଲିଆରେ ମହିଳା ବିଶ୍ୱକପ୍ ଫାଇନାଲ ଖେଳିଥିବା ଭାରତୀୟ ମହିଳା ଏକାଦଶର ଅନ୍ୟତମ ସଦସ୍ୟା ଥିଲେ।