ପୁରୀ ଅଫିସ, ୬ା୧୧: ଶ୍ରୀମନ୍ଦିରରେ ଶୃଙ୍ଖଳା ରକ୍ଷା କରିବା ପାଇଁ ପୋଲିସ କର୍ମଚାରୀଙ୍କୁ ନିୟୋଜିତ କରାଯାଇଛି। ଭକ୍ତଙ୍କ ଶୃଙ୍ଖଳିତ ଦର୍ଶନ ଓ ଭିଡ଼ ସମୟରେ ଏହାକୁ ନିୟନ୍ତ୍ରଣ କରିବା ପୋଲିସର ଦାୟିତ୍ୱ। ହେଲେ ବାଡ଼ ଫସଲ ଖାଇବା ଭଳି ଘଟଣା ଘଟିଛି ଶ୍ରୀମନ୍ଦିରରେ। ଅର୍ଥାତ୍ ଶୃଙ୍ଖଳା ରକ୍ଷା ପାଇଁ ନିୟୋଜିତ ଥିବା ପୋଲିସ ନିଜେ ନିୟମ ଭାଙ୍ଗିଛି। ଶ୍ରୀମନ୍ଦିରକୁ ଭକ୍ତମାନେ କେଉଁ ଦ୍ୱାର ଦେଇ ଯିବେ ଓ ବାହାରିବେ ତାହା ସ୍ଥିର କରାଯାଇଛି। ତେବେ ବୁଧବାର ଜଣେ ମହିଳା ହୋମ୍ଗାର୍ଡ ଏହି ନିୟମ ଭାଙ୍ଗି ପ୍ରସ୍ଥାନ ଦ୍ୱାର ବେହେରଣ ଦ୍ୱାରରେ ଜୋରଜବରଦସ୍ତି ଭକ୍ତଙ୍କୁ ଭିତରକୁ ଛାଡୁଥିବାରୁ ଏହାକୁ ନେଇ ସେବାୟତମାନେ ପ୍ରତିବାଦ କରିଥିଲେ। ଫଳରେ କିଛି ସମୟ ପାଇଁ ଉତ୍ତେଜନା ସୃଷ୍ଟି ସହ ନୀତି ପ୍ରଭାବିତ ହୋଇଥିଲା।
ବର୍ତ୍ତମାନ କାର୍ତ୍ତିକ ମାସ ଯୋଗୁ ଶ୍ରୀମନ୍ଦିରରେ ଭକ୍ତଙ୍କ ପ୍ରବଳ ଗହଳି ହେଉଛି। ଏମିତି କି ଛୁଟିଦିନ କିମ୍ବା ସ୍ବତନ୍ତ୍ର ପର୍ବପର୍ବାଣି ଦିନରେ ଭିଡ଼ ନିୟନ୍ତ୍ରଣ କରିବାରେ ପୋଲିସକୁ ନାକେଦମ୍ ହେବାକୁ ପଡୁଛି। ବୁଧବାର ସକାଳେ ଅବକାଶ ନୀତି ପରେ ଜୟ ବିଜୟ ଦ୍ୱାର ବନ୍ଦ କରାଯାଇଥିଲା। ବଲ୍ଲଭ ନୀତି ପାଇଁ ଭିତରକାଠରୁ ଭକ୍ତଙ୍କୁ ଖାଲି କରାଯାଉଥିଲା। ଶ୍ରଦ୍ଧାଳୁମାନେ ବେହେରଣ ଦ୍ୱାର ଦେଇ ବାହାରକୁ ବାହାରୁଥିଲେ। ଏହି ସମୟରେ ଜଣେ ମହିଳା ହୋମ୍ଗାର୍ଡ କେତେଜଣ ଭକ୍ତଙ୍କୁ ବେହେରଣ ଦ୍ୱାର ଦେଇ ଭିତରକୁ ଛାଡୁଥିଲେ। ଏହାକୁ କେତେଜଣ ସେବାୟତ ଦେଖି ବିରୋଧ କରିଥିଲେ। ସମ୍ପୃକ୍ତ ଭକ୍ତଙ୍କୁ ନ ଛାଡ଼ିବାକୁ କହିଥିଲେ। ଏହାକୁ ନେଇ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା। ଏହାର ପ୍ରଭାବରେ ଅଳ୍ପ ସମୟ ଲାଗି ବଲ୍ଲଭ ନୀତି ବ୍ୟାଘାତ ଘଟିଥିଲା। ସମ୍ପୃକ୍ତ ଭକ୍ତ ବାହାରକୁ ଯିବା ପରେ ସ୍ଥିତି ଶାନ୍ତି ପଡ଼ିଥିଲା ଓ ଠାକୁରଙ୍କ ନୀତିକାନ୍ତି ସ୍ବାଭାବିକ ହୋଇଥିଲା। ସୂଚନାଥାଉ କି, ଶ୍ରୀମନ୍ଦିର ସଂସ୍କାର ମାମଲାରେ ଗତ ସୋମବାର ସୁପ୍ରିମ୍କୋର୍ଟ ଅନ୍ତରୀଣ ରାୟ ପ୍ରକାଶ