ପୁରୀ ଅଫିସ,୩ା୭: ମହାପ୍ରଭୁଙ୍କ ସମ୍ପର୍କରେ ଏଣିକି ଟିକିନିକି କଥା ସହଜରେ ଜାଣି ହେବ। ମାଉସ୍ କ୍ଲିକ କରିବା ମାତ୍ରେ ବାହାରିବ ସବୁକିଛି ତଥ୍ୟ। ଏଥିପାଇଁ ମଙ୍ଗଳବାର ଶ୍ରୀମନ୍ଦିରର ନୂତନ ଅଫିସିଆଲ ୱେବ୍ସାଇଟ୍ www.shreejagannatha.in ଉନ୍ମୋଚିତ ହୋଇଛି। ଶ୍ରୀନହର ପରିସରରେ ଗଜପତି ମହାରାଜା ଦିବ୍ୟସିଂହ ଦେବ ଏହାକୁ ଉନ୍ମୋଚନ କରି କହିଛନ୍ତି ମହାପ୍ରଭୁଙ୍କ ପବିତ୍ର ନବଯୌବନ ଦର୍ଶନ ସମୟରେ ଶ୍ରୀମନ୍ଦିରର ନୂତନ ଅଫିସିଆଲ ୱେବ୍ସାଇଟ୍ ଉନ୍ମୋଚିତ ହୋଇଛି । ବିଶ୍ୱରେ ଥିବା ଶ୍ରୀଜଗନ୍ନାଥପ୍ରେମୀ ଭକ୍ତମାନେ ଏହାର ଲାଭ ନେଇପାରିବେ। ଏହି ୱେବ୍ସାଇଟ୍ ମାଧ୍ୟମରେ ମହାପ୍ରଭୁଙ୍କ ଇତିହାସ, ଐତିହ୍ୟ, ମହିମା, ପରମ୍ପରା ସମ୍ପର୍କରେ ଜାଣିପାରିବେ । ମୁଖ୍ୟ ପ୍ରଶାସକ ପ୍ରଦୀପ୍ତ ମହାପାତ୍ର କହିଛନ୍ତି, ପୂର୍ବରୁ ଶ୍ରୀମନ୍ଦିରର ଏକ ୱେବ୍ସାଇଟ ଥିଲା। ନୂତନ ୱେବ୍ ସାଇଟ୍ରେ ମହାପ୍ରଭୁଙ୍କ ସମ୍ପର୍କରେ ସବୁ ତଥ୍ୟ ରହିଛି। ଶ୍ରୀମନ୍ଦିରର ଦୈନନ୍ଦିନ ନୀତି, ଏହାର ପରିଚାଳନା, ବର୍ଷକ ଯାକର ପର୍ବପର୍ବାଣି ବି ସ୍ଥାନ ପାଇଛି । ଏହା ମାଧ୍ୟମରେ ଭକ୍ତମାନେ ଅନ୍ଲାଇନ ଡୋନେଶନ ମଧ୍ୟ ଦେଇପାରିବେ। ଆସନ୍ତା ୨ମାସ ମଧ୍ୟରେ ଦର୍ଶନାର୍ଥୀଙ୍କ ପାଇଁ ଏଥିରେ ଆଉ କିଛି ସୁବିଧା କରାଯିବ। ଦୈନିକ ମହାପ୍ରଭୁଙ୍କ କୋଠ ଭୋଗରେ ପ୍ରାୟ ୫୦ ହଜାର ଟଙ୍କା ଖର୍ଚ୍ଚ ହେଉଛି। କିଛି ଲୋକ ଅଛନ୍ତି ଯେଉଁମାନେ ଦୈନିକ କୋଠ ଭୋଗ ପାଇଁ ଦାନ ଦେବାକୁ ରାଜି ଅଛନ୍ତି। ଏମିତି ବି ସମୟ ଆସିବ ବହୁ ସଂଖ୍ୟାରେ ଲୋକ କୋଠ ଭୋଗ ଦାନ ଦେବାକୁ ଆଗେଇ ଆସିବେ । ଫଳରେ ମନ୍ଦିରର ଆୟ ମଧ୍ୟ ବୃଦ୍ଧି ପାଇବ। ସେହିପରି ଦେଶ ବିଦେଶରୁ ଲୋକେ ମହାପ୍ରଭୁଙ୍କୁ ବିବାହର ନିମନ୍ତ୍ରଣ କାର୍ଡ ମଧ୍ୟ ପଠାଇ ପାରିବେ। ସମ୍ପୃକ୍ତ ଖୁଣ୍ଟିଆ ସେବକ ପ୍ରିଣ୍ଟ କରି ମହାପ୍ରଭୁଙ୍କ ପାଖରେ ବିଧି ଅନୁଯାୟୀ କାର୍ଡ ଚଢାଇବେ। ସମ୍ପୃକ୍ତ ବ୍ୟକ୍ତିଙ୍କ ପାଖକୁ ଏ ସମ୍ପର୍କିତ ମେସେଜ୍ ମଧ୍ୟ ଦିଆଯିବ। ଏ ବାବଦ ପ୍ରାପ୍ୟ ମଧ୍ୟ ସେ ଅନ୍ଲାଇନରେ ଡିପୋଜିଟ୍ କରିପାରିବେ। ପର୍ଯ୍ୟାୟକ୍ରମେ ଏହାକୁ ହିନ୍ଦୀ, ଓଡ଼ିଆ ଏବଂ ବେଙ୍ଗଲୀ ଭାଷାରେ ମଧ୍ୟ କରାଯିବ ବୋଲି ମୁଖ୍ୟ ପ୍ରଶାସକ କହିଛନ୍ତି । ଏହି ଉନ୍ମୋଚନ ଉତ୍ସବରେ ପୁରୀ ବିଧାୟକ ଜୟନ୍ତ କୁମାର ଷଡ଼ଙ୍ଗୀ, ପୂର୍ବତନ ମୁଖ୍ୟ ଶାସନ ସଚିବ ସୁବାସ ପାଣି, ଆଇଜି ସୌମେନ୍ଦ୍ର ପ୍ରିୟଦର୍ଶୀ, ଏଡିଜି ସଞ୍ଜୀବ କୁମାର ପଣ୍ଡା, ନୀତି ପ୍ରଶାସନ ବିଶ୍ୱଜିତ ବିଶ୍ୱାଳ, ଉନ୍ନୟନ ପ୍ରଶାସନ ବିଶ୍ୱନାଥ ସାହୁ, ରାଜସ୍ବ ଉପ ପ୍ରଶାସକ ମଧୁସୂଦନ ଦାଶ, ସୁରକ୍ଷା ପ୍ରଶାନ୍ତ କୁମାର ମହାପାତ୍ରଙ୍କ ସମେତ ପରିଚାଳନା କମିଟି ସଦସ୍ୟ ଓ ବୁଦ୍ଧିଜୀବୀ ଉପସ୍ଥିତ ଥିଲେ।