ପୁରୀ ଅଫିସ,୨୯।୧୨: ନୂଆବର୍ଷ ପାଇଁ ପୁରୀ ପ୍ରଶାସନ ପକ୍ଷରୁ ବ୍ୟାପକ ବନ୍ଦୋବସ୍ତ କରାଯାଇଛି। ସୁରକ୍ଷା ବ୍ୟବସ୍ଥା ମଧ୍ୟ କଡାକଡି ହୋଇଥିବା କୁହାଯାଉଛି। ହେଲେ ଶ୍ରୀମନ୍ଦିର ସୁରକ୍ଷା ବ୍ୟବସ୍ଥା ଢିଲା ଥିବା ରବିବାର ଏକ ଭାଇରାଲ ଭଡିଓରୁ ସ୍ପଷ୍ଟ ହୋଇଛି। ମନ୍ଦିରର ଉତ୍ତର-ପଶ୍ଚିମ କୋଣରେ ଥିବା ଏକ ଓ୍ବାଚ୍ ଟାଓ୍ବାର ଉପରେ ତିନିଜଣ ବିଦେଶିନୀ ଚଢି ଶ୍ରୀମନ୍ଦିର ଦୃଶ୍ୟକୁ ଉପଭୋଗ କରିବା ସହ ଫଟୋ ମଧ୍ୟ ଉଠାଇଛନ୍ତି। ପରେ ସେମାନେ ଓହ୍ଲାଇ ତଳକୁ ଆସୁଥିବାର ଦୃଶ୍ୟ ଏହି ଭିଡିଓରେ ରହିଛି। ପୂର୍ବରୁ ମଧ୍ୟ ରୁଷିଆର ୮ ଜଣ ପର୍ଯ୍ୟଟକ ଏମାର ମଠ ଉପରୁ ଡ୍ରୋନ୍ରେ ଭିଡିଓ ଉତ୍ତୋଳନ କରି ଧରାପଡିଥିଲେ। ତେବେ ପୁଣି ବିଦେଶିନୀ ଶ୍ରୀମନ୍ଦିର ସୁରକ୍ଷା ବ୍ୟବସ୍ଥାକୁ ଚ୍ୟାଲେଞ୍ଜ ଦେଇ ଓ୍ବାଚ୍ ଟାଓ୍ବାର ଉପରକୁ ଯିବା ଘଟଣା ଏବେ ଚର୍ଚ୍ଚାର ବିଷୟ ହୋଇଛି।