ନୂଆଦିଲ୍ଲୀ,୯ା୧(ସ୍ବ.ପ୍ର.): ସୁପ୍ରିମ୍କୋର୍ଟରେ ବୁଧବାର ଥିଲା ଶ୍ରୀମନ୍ଦିର ସଂସ୍କାର ମାମଲାର ଶୁଣାଣି। ସୁପ୍ରିମକୋର୍ଟଙ୍କ ନିର୍ଦ୍ଦେଶ କ୍ରମେ ଶ୍ରୀମନ୍ଦିର ପ୍ରଶାସନ ପକ୍ଷରୁ ଇତିମଧ୍ୟରେ ଆକ୍ସନ ଟେକେନ ରିପୋର୍ଟ ଦାଖଲ କରାଯାଇଥିଲା। ହେଲେ ତାହା ଅସମ୍ପୂର୍ଣ୍ଣ ଥିବାରୁ ସର୍ବୋଚ୍ଚ ଅଦାଲତ ଅସନ୍ତୋଷ ବ୍ୟକ୍ତ କରିଛନ୍ତି। ସମ୍ପୂର୍ଣ୍ଣ ରିପୋର୍ଟ ଦାଖଲ କରିବା ଲାଗି ଶ୍ରୀମନ୍ଦିର ପ୍ରଶାସନ ସମୟ ମାଗିଛି। ତଦନୁଯାୟୀ ୨ ସପ୍ତାହ ମଧ୍ୟରେ ଏହି ରିପୋର୍ଟ ପ୍ରଦାନ କରିବା ଲାଗି ମନ୍ଦିର ପ୍ରଶାସନକୁ ନିର୍ଦ୍ଦେଶ ଦିଆଯାଇଛି। ପ୍ରଧାନ ବିଚାରପତି ଏସ୍. ଏ. ବୋବ୍ଡେ, ଜଷ୍ଟିସ ବି. ଆର. ଗବାଇ ଓ ଜଷ୍ଟିସ ସୂର୍ଯ୍ୟ କାନ୍ତଙ୍କୁ ନେଇ ଗଠିତ ଖଣ୍ଡପୀଠ ୪ ସପ୍ତାହ ପରେ ପରବର୍ତ୍ତୀ ଶୁଣାଣି ପାଇଁ ସମୟ ଧାର୍ଯ୍ୟ ହୋଇଛି।
ଗତ ନଭେମ୍ବର ୪ରେ ସୁପ୍ରିମ୍କୋର୍ଟ ମଧ୍ୟବର୍ତ୍ତିକାଳୀନ ରାୟରେ ୨୨ଟି ନିର୍ଦ୍ଦେଶ କାର୍ଯ୍ୟକାରୀ କରିବା ଲାଗି ଶ୍ରୀମନ୍ଦିର ପ୍ରଶାସନ ଏବଂ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଥିଲେ। ତଦନୁଯାୟୀ ଶ୍ରୀମନ୍ଦିର ପ୍ରଶାସନ ପକ୍ଷରୁ ସୁପ୍ରିମ୍କୋର୍ଟରେ ରିପୋର୍ଟ ଦାଖଲ କରାଯାଇଥିଲେ ମଧ୍ୟ ତାହା ସମ୍ପୂର୍ଣ୍ଣ ନୁହେଁ। ରାଜ୍ୟ ବାହାରେ ଶ୍ରୀଜଗନ୍ନାଥ ମହାପ୍ରଭୁଙ୍କ ଜମିର ହିସାବ ଦାଖଲ କରାଯାଇ ପାରି ନ ଥିବା ବେଳେ ଖଣିଖାଦନ ନେଇ ବିସ୍ତୃତ ତଥ୍ୟ ଦିଆଯାଇ ନାହିଁ। ରାଜ୍ୟରେ ମହାପ୍ରଭୁଙ୍କ ଜମିରେ କେତେ ପଥରକ୍ବାରି ରହିଛି ଏବଂ ସେ ସବୁର କେମିତି ଚାଲିଛି ତାହା ରିପୋର୍ଟରେ ଉଲ୍ଲେଖ କରାଯାଇ ନାହିଁ। ସେହିପରି ଶ୍ରୀମନ୍ଦିର ପାଇଁ ଜଣେ ପୂର୍ଣ୍ଣକାଳୀନ ମୁଖ୍ୟ ପ୍ରଶାସକ ନିଯୁକ୍ତି ବି ଅନୁପାଳନ ହୋଇ ନ ଥିବା ଦର୍ଶାଇଥିଲେ ଆମିକସ୍ କ୍ୟୁରି ରଞ୍ଜିତ କୁମାର। ତେଣୁ ବାକି ପ୍ରସ୍ତାବଗୁଡ଼ିକ ସମ୍ପର୍କରେ ତର୍ଜମା କରି ୨ ସପ୍ତାହ ମଧ୍ୟରେ ରିପୋର୍ଟ ଦେବାକୁ ଆମିକସ୍ କ୍ୟୁରିଙ୍କୁ ନିର୍ଦ୍ଦେଶ ହୋଇଛି। ଆମିକସ୍ କ୍ୟୁରିଙ୍କ ନୋଟ୍ ଆଧାରରେ ଶ୍ରୀମନ୍ଦିର ପ୍ରଶାସନ ଅତିରିକ୍ତ ସତ୍ୟପାଠ ମାଧ୍ୟମରେ ଏହି ରିପୋର୍ଟ ଦାଖଲ କରିବ।
ଅନ୍ୟପକ୍ଷରେ ଶୁଣାଣି ବେଳେ ଇଣ୍ଟରକଣ୍ଟିନେଣ୍ଟାଲ ଅସୋସିଏଶନ ଅଫ ଲୟର୍ସ ପକ୍ଷରୁ ଓକିଲ ଦେବାଶିଷ ମିଶ୍ର ଶ୍ରୀଜଗନ୍ନାଥ ମନ୍ଦିର ପ୍ରଶାସନର ବିଭିନ୍ନ ପଦକ୍ଷେପକୁ ବିରୋଧ କରିବା ସହ କୋର୍ଟଙ୍କ ପୂର୍ବ ନିର୍ଦ୍ଦେଶ ଅନୁପାଳନ କରାଯାଇନାହିଁ ବୋଲି କହିଥିଲେ। ବିଶେଷ କରି ପୂର୍ଣ୍ଣକାଳୀନ ମୁଖ୍ୟ ପ୍ରଶାସକ ନିଯୁକ୍ତି ହୋଇ ନ ଥିବା ଦର୍ଶାଇଥିଲେ। ଅପରପକ୍ଷରେ ଅଦାଲତ ଅବମାନନା ନେଇ ଯଦି କିଛି ଆପତ୍ତି ଥାଏ ତେବେ ୪ ସପ୍ତାହ ମଧ୍ୟରେ ଆବେଦନ କରିବାକୁ ମିଶ୍ରଙ୍କୁ ଖଣ୍ଡପୀଠ କହିଥିଲେ।
ସୁପ୍ରିମକୋର୍ଟରେ ଦାଖଲ ଅସମ୍ପୂର୍ଣ୍ଣ ରିପୋର୍ଟକୁ ନେଇ ଆପତ୍ତି ଉଠାଇଛନ୍ତି ବରିଷ୍ଠ ସେବାୟତ ରାମଚନ୍ଦ୍ର ଦାସମହାପାତ୍ର। ସେ କହିଛନ୍ତି, ମହାପ୍ରଭୁଙ୍କର ଓଡ଼ିଶାରେ କେତେ, ଓଡ଼ିଶା ବାହାରେ କେତେ ଏବଂ ଖାତା ଓ ପ୍ଲଟ ନମ୍ବର କ’ଣ ଯଦି ତାହା ସୁପ୍ରିମ୍କୋର୍ଟଙ୍କୁ ଦିଆଯାଇଥାନ୍ତା ତେବେ ତାହା ନିଶ୍ଚିତ ଭାବେ ଗ୍ରହଣ ହୋଇଥାନ୍ତା। ସେହିପରି ବରିଷ୍ଠ ସେବାୟତ ବିନାୟକ ଦାସମହାପାତ୍ର କହିଛନ୍ତି, ସେବାୟତଙ୍କ କଲ୍ୟାଣ ସଂକ୍ରାନ୍ତରେ ରିପୋର୍ଟରେ କିଛି ଉଲ୍ଲେଖ କରାଯାଇ ନାହିଁ। ତେଣୁ ଏ ନେଇ ସେ ଆମିକସ୍ କ୍ୟୁରିଙ୍କ ପ୍ରତିନିଧି ପ୍ରିୟା ହିଙ୍ଗୋରାନୀଙ୍କୁ ଜଣାଇଛନ୍ତି। ସେବାୟତଙ୍କ କଲ୍ୟାଣ କ’ଣ କରାଯାଇପାରିବ ୨ ସପ୍ତାହ ମଧ୍ୟରେ ଲିଖିତ ଭାବେ ଦେଲେ ସେ ସୁପ୍ରିମକୋର୍ଟଙ୍କୁ ଅବଗତ କରାଇବେ ବୋଲି ହିଙ୍ଗୋରାନୀ କହିଥିବା ବିନାୟକ ସୂଚନା ଦେଇଛନ୍ତି।