ଦୁବାଇ,୧୧ା୯(ପି.ଟି): ରବିବାର ଏସିଆ କପ୍ ଟି୨୦ ଟୁର୍ନାମେଣ୍ଟର ଫାଇନାଲରେ ପରସ୍ପରକୁ ଭେଟିବେ ପାକିସ୍ତାନ ଓ ଶ୍ରୀଲଙ୍କା। ପ୍ରାରମ୍ଭରୁ ଶ୍ରୀଲଙ୍କା ଆୟୋଜକ ଦେଶ ରହିଥିଲା। ତେବେ ଅର୍ଥନୈତିକ ସଙ୍କଟ ଓ ରାଜନୈତିକ ହିଂସା କାରଣରୁ ଏହି ଟୁର୍ନାମେଣ୍ଟକୁ ଦୁବାଇକୁ ସ୍ଥାନାନ୍ତର କରାଯାଇଥିଲା। ଭାରତ-ପାକିସ୍ତାନ ଫାଇନାଲ ନେଇ ସମସ୍ତେ ଆଶାବାନ୍ଧି ବସିଥିବା ବେଳେ ନିଜ ପ୍ରଦର୍ଶନରେ ସମସ୍ତଙ୍କୁ ଚମକେଇ ଦେଇଥିଲା ଶ୍ରୀଲଙ୍କା। ଲିଗ୍ ପର୍ଯ୍ୟାୟରେ ଆଫଗାନିସ୍ତାନ ବିପକ୍ଷ ପରାଜୟ ବାଦ୍ ଦଳ ଆଉ ପଛକୁ ଫେରି ଚାହିଁ ନାହିଁ। ବ୍ୟାଟିଂ, ବୋଲିଂ ଓ ଫିଲ୍ଡିଂରେ ଦଳର ପ୍ରଦର୍ଶନ ବଢିଆ ରହିଛି। ସୁପର-୪ରେ ଏକମାତ୍ର ଦଳ ଭାବେ ଶ୍ରୀଲଙ୍କା ଅପରାଜେୟ ରହିଥିଲା। ଅନ୍ୟପକ୍ଷରେ ଅର୍ଥନୈତିକ ସଂଘର୍ଷ କରୁଥିବା ଦେଶବାସୀଙ୍କ ପାଇଁ ଟ୍ରଫି ଏକ ଉପହାର ହେବ। ତେବେ ଦେଶବାସୀଙ୍କ ପାଇଁ ଏହି ଉପହାର ରାସ୍ତାରେ ଆସିପାରେ ପାକିସ୍ତାନ। ମହମ୍ମଦ ରିଜଓ୍ବାନ, ମହମ୍ମଦ ନଓ୍ବାଜ ଓ ନଶିମ ଶାହଙ୍କ ପ୍ରଦର୍ଶନ ଉପରେ ପାକିସ୍ତାନ ଅଧିକ ନିର୍ଭରଶୀଳ ରହିବ। ୨୦୧୪ରେ ଟି୨୦ ବିଶ୍ୱ ଚାମ୍ପିୟନ୍ ଶ୍ରୀଲଙ୍କାର ପ୍ରଦର୍ଶନ ଦିନକୁ ଦିନ ଖରାପ ହେବାରେ ଲାଗିଥିଲା। ତେବେ ଦସୁନ ସନକାଙ୍କ ନେତୃତ୍ୱରେ ଦଳ ଭଲ ପ୍ରଦର୍ଶନ ଦେବାରେ ସମର୍ଥ ହୋଇଛି। ପ୍ରମୁଖ ଦ୍ରୁତ ବୋଲର ଦୁଷ୍ମନ୍ତ ଚମିରାଙ୍କ ଅନୁପସ୍ଥିତି ମଧ୍ୟ ଦଳ ଅନୁଭବ କରୁନାହିଁ। ବର୍ତ୍ତମାନ ସୁଦ୍ଧା ୫ଟି ମ୍ୟାଚ୍ ଖେଳିଥିବା ଶ୍ରୀଲଙ୍କା ଦଳ ୨୮ ଛକା ଓ ୬୨ ଚୌକା ମାରିଛି। ଦଳର ସମସ୍ତ ଖେଳାଳି ଯୋଗଦାନ ଦେଉଥିବା ବେଳେ ଏହା ଦଳର ୟୁଏସପି ରହିଛି। ପାଥୁମ ନିଶଙ୍କା ଚମତ୍କାର ଫର୍ମରେ ରହିଥିବା ବେଳେ ମଧ୍ୟକ୍ରମରେ ରାଜପକ୍ଷେ ଓ ସନକା ଭଲ ବ୍ୟାଟିଂ କରୁଛନ୍ତି। ସେହିପରି ହସରଙ୍ଗାଙ୍କ ପାର୍ଟନର ଭାବରେ ମହୀଷ ତୀକ୍ଷଣାଙ୍କ ବୋଲିଂ ମଧ୍ୟ ବେଶ୍ ବଢିଆ ରହିଛି। ଯୁବ ବୋଲର ଦିଲସାନ ମଦୁଶଙ୍କା ପେସ ବୋଲିଂ ଭାର ନେଇଥିବା ବେଳେ ଅଭିଜ୍ଞ ଖେଳାଳିଙ୍କ ଅନୁପସ୍ଥିତି ଅନୁଭୂତ ହୋଇନି। ଅନ୍ୟ ପକ୍ଷରେ ପାକିସ୍ତାନ ପାଇଁ ଅଧିନାୟକ ବାବର ଆଜମଙ୍କ ଫର୍ମ ଚିନ୍ତା ବଢାଇଛି। ଦୁଇ ପାକିସ୍ତାନୀ ସ୍ପିନର ମହମ୍ମଦ ନଓ୍ବାଜ ଓ ଶଦାବ ଖାନଙ୍କ ବୋଲିଂ ଆଭରେଜ ଓ ଇକୋନୋମି ରେଟ ବଢିଆ ରହିଛି। ତେବେ ଦୁବାଇରେ ଟସ ଜିତିବା ଦଳ ଏକ ସାମାନ୍ୟ ମନସ୍ତାତ୍ତ୍ୱିକ ଫାଇଦାରେ ରହିବ।