କଲମ୍ବୋ,୯।୮- ନିକଟରେ ଶେଷ ହୋଇଥିବା ଆଇସିସି ବିଶ୍ୱକପ୍ରେ ନ୍ୟୁଜିଲାଣ୍ଡ ଦଳକୁ ଫାଇନାଲରେ ପହଞ୍ଚାଇଥିବା ଅଧିନାୟକ କେନ୍ ଓ୍ବିଲିୟମସନଙ୍କ ପ୍ରଶଂସକଙ୍କ ସଂଖ୍ୟା ବିଶ୍ୱରେ ବୃଦ୍ଧି ପାଇବାରେ ଲାଗିଛି। ଓ୍ବିଲିୟମସନ ଗୁରୁବାର ୨୯ବର୍ଷରେ ପାଦ ଦେଇଛନ୍ତି। ଏହି ଅବସରରେ ସେ ଶ୍ରୀଲଙ୍କା ପ୍ରଶଂସକଙ୍କ ସହ ଜନ୍ମଦିନ ପାଳନ କରିଛନ୍ତି। କାଟୁନାୟାକେଠାରେ ଚାଲିଥିବା ଶ୍ରୀଲଙ୍କା ସଭାପତି ଏକାଦଶ ବିପକ୍ଷରେ ନ୍ୟୁଜିଲାଣ୍ଡ ଏକ ଅଭ୍ୟାସ ମ୍ୟାଚ୍ ବେଳେ ଶ୍ରୀଲଙ୍କା ପ୍ରଶଂସକମାନେ ଓ୍ବିଲିୟମସନଙ୍କ ପାଇଁ କେକ୍ ଆଣିଥିଲେ। ନ୍ୟୁଜିଲାଣ୍ଡ ଅଧିନାୟକ କେକ୍ କାଟିବା ସହ ଖାଇଥିଲେ। ଏହାର କିଛି ଫଟୋ ଶ୍ରୀଲଙ୍କା କ୍ରିକେଟ ପକ୍ଷରୁ ଟୁଇଟରରେ ଶେୟାର କରାଯାଇଛି। ଏଥିରେ ଓ୍ବିଲିୟମସନ ଗ୍ରାଉଣ୍ଡର ବାଉଣ୍ଡ୍ରି ଅଞ୍ଚଳରେ ଉପସ୍ଥିତ ଥିବା ପ୍ରଶଂସକଙ୍କ ସହ କେକ୍ କାଟୁଛନ୍ତି। ଅଭ୍ୟାସ ମ୍ୟାଚ୍ରେ ଶ୍ରୀଲଙ୍କା ବୋର୍ଡ ସଭାପତି ଏକାଦଶ ଦଳ ପ୍ରଥମ ଦିନ ଶେଷ ସୁଦ୍ଧା ୬ ଉଇକେଟ ହରାଇ ୩୨୩ ରନ୍ କରିଥିଲା। ଏହି ସିରିଜରେ ନ୍ୟୁଜିଲାଣ୍ଡ ଦୁଇ ଟେଷ୍ଟ ଓ ୩ ଟି୨୦ ମ୍ୟାଚ୍ ଖେଳିବ।