କଲମ୍ବୋ୨୫ା୪(ପି.ଟି): ଶ୍ରୀଲଙ୍କାର ଇଷ୍ଟର ସଣ୍ଡେ ବିସ୍ଫୋରଣରେ ଜଣେ ମହିଳାଙ୍କ ସମେତ ୯ ଆତ୍ମଘାତୀ ସାମିଲ ଥିଲେ ବୋଲି ଜଣାପଡ଼ିଛି। ଏହି ଘଟଣାରେ ଏପର୍ଯ୍ୟନ୍ତ ୬୦ ସନ୍ଦିଗ୍ଧଙ୍କୁ ଗିରଫ କରାଯାଇ ସାରିଲାଣି। ଶେଷ ସୂଚନା ସୁଦ୍ଧା ବିସ୍ଫୋରଣ ମୃତ୍ୟୁସଂଖ୍ୟା ୩୫୯ରେ ପହଞ୍ଚିଥିବାବେଳେ ଆତ୍ମଘାତୀମାନେ ସ୍ଥାନୀୟ ଇସ୍ଲାମିକ କଠୋରପନ୍ଥୀ ଗୋଷ୍ଠୀର ବୋଲି ଜଣେ ବରିଷ୍ଠ ପୋଲିସ ଅଧିକାରୀ ବୁଧବାର ସ୍ପଷ୍ଟ କରିଛନ୍ତି।
ବିସ୍ଫୋରଣ ଲାଗି ଶ୍ରୀଲଙ୍କା ସରକାର ନ୍ୟାଶନାଲ ଥୋଓ୍ବିଦ ଜମାତ(ଏନ୍ଟିଜେ)କୁ ଦାୟୀ କରିଥିଲାବେଳେ ଇସ୍ଲାମିକ୍ ଷ୍ଟେଟ୍ (ଆଇଏସ୍) ନିଜକୁ ଦାୟୀ କରିସାରିଛି। ବିସ୍ଫୋରଣକାରୀଙ୍କ ବିଦେଶୀ ଲିଙ୍କ୍ ନେଇ ଏପର୍ଯ୍ୟନ୍ତ କୌଣସି ତଥ୍ୟ ହସ୍ତଗତ ହୋଇ ନ ଥିବା ଶ୍ରୀଲଙ୍କା ପ୍ରତିରକ୍ଷା ରାଷ୍ଟ୍ରମନ୍ତ୍ରୀ ରୁଓ୍ବାନ ଓ୍ବିଜଓ୍ବେର୍ଦ୍ଦନା ପ୍ରକାଶ କରିଛନ୍ତି। ୯ ଆତ୍ମଘାତୀଙ୍କ ମଧ୍ୟରୁ ୮ ଜଣଙ୍କୁ ସିଆଇଡି ପକ୍ଷରୁ ଚିହ୍ନଟ କରାଯାଇିଛି ବୋଲି ପୋଲିସ ମୁଖପାତ୍ର ରୁଓ୍ବାନ ଗୁଣଶେଖର କହିଛନ୍ତି। ଆତ୍ମଘାତୀମାନେ ଉଚ୍ଚଶିକ୍ଷିତ ଓ ୟୁକେରେ ପାଠ ପଢିଥିବା ଓ୍ବିଜଓ୍ବେର୍ଦ୍ଦନା କହିଛନ୍ତି।
ଶ୍ରୀଲଙ୍କା ବିସ୍ଫୋରଣରେ ନିହତ ମୋଟ ୩୫୯ ଜଣଙ୍କ ମଧ୍ୟରେ ୧୦ ଜଣ ଭାରତୀୟ ଥିଲାବେଳେ ସେମାନଙ୍କ ମଧ୍ୟରୁ ବୁଧବାର ୯ ଜଣଙ୍କ ମରଶରୀର ସ୍ବଦେଶ ଫେରିଛି। ଭାରତୀୟ ହାଇକମିଶନଙ୍କ ପକ୍ଷରୁ ସେମାନଙ୍କ ବିସ୍ତୃତ ବିବରଣୀ ପ୍ରଦାନ କରାଯାଇଛି। ସେମାନେ ହେଲେ ଏସ.ଆର. ନାଗରାଜ, ଏଚ. ଶିବକୁମାର, କେ.ଜି. ହନୁମନ୍ଥରାୟାପ୍ପା, କେ.ଏମ. ଲକ୍ଷ୍ମୀନାରାୟଣ, ଏମ.ରଙ୍ଗପ୍ପା, ,ଭି. ତୁଳସୀରାମ, ଏମ. ମରେଗୌଡା, ଏଚ.ପୁଟ୍ଟାରାଜୁ ଓ ଆର.ଲକ୍ଷ୍ମଣ ଗୌଡା। ସେମାନଙ୍କ ମରଶରୀରକୁ ୪ଟି ଅଲଗା ଅଲଗା ବିମାନରେ ବେଙ୍ଗାଲୁରୁ ଓ ହାଇଦ୍ରାବାଦ ଅଣାଯାଇଛି।