ପୁରୁଣା ଭୁବନେଶ୍ୱର,୨୦।୧(ଡି.ଏନ.ଏ.): ରାଜ୍ୟ ପର୍ଯ୍ୟଟନ ବିଭାଗର ତରବରିଆ ଏବଂ ଖାମଖିଆଲ କାର୍ଯ୍ୟ ନେଇ ବହୁ ଯୋଜନା ସଫଳ ରୂପାୟନ ହେଉ ନ ଥିବା ଅଭିଯୋଗ ହେଉଛି। ଆମସାର ଆକ୍ଟ ଉଲ୍ଲଂଘନ କରି ବ୍ୟାଖ୍ୟାନ କେନ୍ଦ୍ର, ଟୁରିଷ୍ଟ ଶେଡରେ କୋଟି କୋଟି ଟଙ୍କା ଖର୍ଚ୍ଚ ହେବା ପରେ ଏବେ ଏହା ଭଙ୍ଗାଯାଇ ମାଟିରେ ମିଶିଛି। ଅନୁରୂପ ଭାବେ ୨୦୧୪ରେ ଶ୍ରୀଲିଙ୍ଗରାଜ ମନ୍ଦିର ଚତୁଃପାର୍ଶ୍ୱରେ ପଥରର ପାଦଚଲା ରାସ୍ତା ପ୍ରାୟ ୧୮ ଲକ୍ଷ ଟଙ୍କା ବ୍ୟୟରେ ନିର୍ମାଣ କରାଯାଇଥିତ୍ଲା। ଏହି ପାଦଚଲା ରାସ୍ତା ଏବେ ପର୍ଯ୍ୟଟକଙ୍କର କାମରେ ଲାଗୁନି। ବିଶେଷ ଭାବେ ଦିବ୍ୟାଙ୍ଗ ମାନଙ୍କ ପାଇଁ ନିର୍ମାଣ ହୋଇଥିବା ଏହି ଯୋଜନା ଏବେ ସ୍ବପ୍ନ ପାଲଟିଛି। ପାଦ ଚଲା ପଥଟି ଚିତ୍ରକାରିଣୀ ମନ୍ଦିର, ପଶ୍ଚିମ-ଦକ୍ଷିଣ କୋଣଠାରେ ପାଚେରି ପଡିଯିବା ନେଇ ବନ୍ଦ ରହିଛି। ପରିତ୍ୟକ୍ତ ଭାବେ ପଡି ରହିଥିବା ପାଦଚଲା ରାସ୍ତାର ମନ୍ଦିର ଉତ୍ତରଦ୍ୱାରଠାରେ ମଦ ବୋତଲ, ଆବର୍ଜନା ପଡି ପରିବେଶ ଦୂଷିତ ହେଉଛି। ନିର୍ମାଣ ପରଠାରୁ ଦିନେ ବି କେହି ଶ୍ରଦ୍ଧାଳୁ ପଥ ଦେଇ ଯାତାୟାତ କରିନାହାନ୍ତି। ବିଭାଗର ଏଭଳି ଦୂରଦୃଷ୍ଟି ଅଭାବ ପଦାରେ ପଡିଛି। ତୁରନ୍ତ ଏହି ଯୋଜନାର ପୁନରୁଦ୍ଧାର କରାଯାଇ ଶ୍ରଦ୍ଧାଳୁଙ୍କ ପାଇଁ କାର୍ଯ୍ୟକ୍ଷମ କରିବାକୁ ଶ୍ରଦ୍ଧାଳୁଙ୍କ ପକ୍ଷରୁ ଦାବି ହେଉଛି।
