ଧାମନଗର, ୧।୬ (ଡି.ଏନ.ଏ.) – ଭଦ୍ରକ ଜିଲା ଧାମନଗର ଥାନା ଅନ୍ତର୍ଗତ କଲ୍ୟାଣୀନଗରୀ ନିକଟ ରେବ ନଦୀ କୂଳରେ ଏକ ଗଛରେ ଜଣେ ଯୁବକଙ୍କ ମୃତଦେହ ଝୁଲନ୍ତା ଅବସ୍ଥାରେ ପୋଲିସ ଉଦ୍ଧାର କରିଛି। ଶନିବାର ସକାଳେ ବଣଘେରା ସ୍ଥାନରେ ମୃତଦେହ ଦେଖି ଲୋକେ ଥାନାକୁ ଖବର ଦେଇଥିଲେ। ପୋଲିସ ପହଞ୍ଚି ମୃତଦେହ ଉଦ୍ଧାର କରିବା ପରେ ମୃତ ଯୁବକ ଧୂଷୁରୀ ଥାନା ଅଧୀନ କାଶିମପୁର ଗ୍ରାମର ପ୍ରଶାନ୍ତ ଜେନା ବୋଲି ଜଣାପଡ଼ିଥିଲା। ଧାମନଗର ଥାନା ଚୁନିଦା ଗ୍ରାମରେ ପ୍ରଶାନ୍ତଙ୍କ ଶ୍ୱଶୁର ଘର। ତାଙ୍କ ପୁଅକୁ ଶ୍ୱଶୁର ଘର ଲୋକେ ହତ୍ୟା କରିଥିବା ପ୍ରଶାନ୍ତଙ୍କ ବାପା ମାଧବାନନ୍ଦ ଧାମନଗର ଥାନାରେ ଅଭିଯୋଗ କରିଛନ୍ତି। ପୋଲିସ ଏକ ଅପମୃତ୍ୟୁ ମାମଲା(ନଂ. ୧୬/୧୯) ରୁଜୁ କରି ମୃତଦେହ ବ୍ୟବଚ୍ଛେଦ ପାଇଁ ପଠାଇଛି।
ପୋଲିସ ଅନୁଯାୟୀ, ପ୍ରଶାନ୍ତ ଓ ତାଙ୍କ ସ୍ତ୍ରୀଙ୍କ ମଧ୍ୟରେ ପୂର୍ବରୁ ମନୋମାଳିନ୍ୟ ଲାଗିରହୁଥିଲା। ତାଙ୍କ ସ୍ତ୍ରୀ ବାପଘରେ ରହିଆସୁଥିଲେ। ୩ ଦିନ ତଳେ ଶ୍ୱଶୁର ଘରୁ ଡାକରା ଆସିବାରୁ ପ୍ରଶାନ୍ତ ଯାଇଥିଲେ। ଶନିବାର କଲ୍ୟାଣୀନଗରୀର ଶିବ ମନ୍ଦିର ପଛପଟେ ରେବ ନଦୀ କୂଳରେ ଏକ ନିମ୍ବ ଗଛରେ ସମ୍ପୂର୍ଣ୍ଣ ଉଲଗ୍ନ ଅବସ୍ଥାରେ ଏକ ଗାମୁଛାରେ ମୃତଦେହ ବନ୍ଧାହୋଇ ଝୁଲୁଥିବା ଖବର ମିଳିଥିଲା। ଶ୍ୱଶୁର ଘର ଲୋକେ ପ୍ରଶାନ୍ତଙ୍କୁ ହତ୍ୟା କରି ଗଛରେ ଝୁଲାଇ ଦେଇଥିବା ତାଙ୍କ ବାପା ଅଭିଯୋଗରେ ଦର୍ଶାଇଛନ୍ତି। ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ଜଣାପଡ଼ିବ ବୋଲି ପୋଲିସ କହିଛି।