ପରଜଙ୍ଗ, ୫।୨(ଡି.ଏନ୍.ଏ.): ଢେଙ୍କାନାଳ ଜିଲା ପରଜଙ୍ଗ ଥାନା ଦଦରାଘାଟି ଫାଣ୍ଡି ଅଧୀନ ମାଣିକମରା ଗ୍ରାମରେ ମଙ୍ଗଳବାର ରାତିରେ ଶ୍ୱଶୁର ଘର ଲୋକଙ୍କ ମରଣାନ୍ତକ ଆକ୍ରମଣରେ ଜ୍ୱାଇଁ ଗୁରୁତର ହେବା ଘଟଣା ଚର୍ଚ୍ଚାର ବିଷୟ ପାଲଟିଛି। ଆକ୍ରମଣର ଶିକାର ହୋଇଛନ୍ତି ଯାଜପୁର ଜିଲା ଜେନାପୁର ଥାନା ଗଡ଼ମଧୁପୁର ଗ୍ରାମର ରଞ୍ଜନ କୁମାର ସାହୁ। ରକ୍ତ ଜୁଡୁବୁଡୁ ଅବସ୍ଥାରେ ରାତିସାରା ଏକ ପାଇଖାନା ଟାଙ୍କି ଉପରେ ପଡ଼ି ରହିଥିବାବେଳେ ସକାଳୁ ସ୍ଥାନୀୟ ଲୋକେ ରଞ୍ଜନଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଥିଲେ। ଏ ନେଇ ଥାନାରେ ଲିଖିତ ଅଭିଯୋଗ ପରେ ପୋଲିସ ତଦନ୍ତ ଆରମ୍ଭ କରିଛି।
ରଞ୍ଜନ ବର୍ଷେ ତଳେ ଦଦରାଘାଟି ଫାଣ୍ଡି ଅଧୀନ ମାଣିକମରା ଗ୍ରାମର ସୁଭଦ୍ରା ସାହୁଙ୍କୁ ପ୍ରେମ ବିବାହ କରିଥିଲେ। ବିବାହର କିଛି ଦିନ ପରେ କୌଣସି କାରଣରୁ ଦମ୍ପତିଙ୍କ ମଧ୍ୟରେ କଳହର ସୂତ୍ରପାତ ହୋଇଥିଲା। ଏହପରେ ସୁଭଦ୍ରା ବାପଘରକୁ ପଳାଇ ଆସିଥିଲେ। ମଙ୍ଗଳବାର ସୁଭଦ୍ରା ଫୋନ୍ କରି ରଞ୍ଜନଙ୍କୁ ଡାକିଥିଲେ। ବିବାଦ ଭୁଲି ତାଙ୍କୁ ସାଙ୍ଗରେ ନେଇଯିବାକୁ ଅନୁରୋଧ କରିଥିଲେ। ସ୍ତ୍ରୀଙ୍କ ଅନୁରୋଧ ରକ୍ଷା କରି ରଞ୍ଜନ ଶ୍ୱଶୁର ଘରକୁ ଆସିଥିଲେ। ଉକ୍ତ ସମୟରେ ସ୍ତ୍ରୀ ଘରେ ଥିବାବେଳେ ଅନ୍ୟ ସଦସ୍ୟମାନେ ଏକ ବିବାହ ଭୋଜିରେ ଯୋଗଦେବାକୁ ଯାଇଥିଲେ। ସନ୍ଧ୍ୟାରେ ରଞ୍ଜନ ଖାଇସାରି ଶୋଇଥିଲେ। ଏହି ସମୟରେ ସୁଭଦ୍ରାଙ୍କ ପରିବାର ଲୋକେ ପହଞ୍ଚତ୍ ରଞ୍ଜନଙ୍କୁ ଦେଖି ଉତ୍ତ୍ୟକ୍ତ ହୋଇପଡ଼ିଥିଲେ। ତାଙ୍କୁ ଘର ଭିତରେ ପୂରାଇ କବାଟ ବନ୍ଦ କରିଦେଇଥିଲେ। ମାନସିକ ଭାରସାମ୍ୟ ହରାଇ ରଞ୍ଜନ ଉକ୍ତ ଘରେ ଫ୍ୟାନ୍ରେ ଝୁଲି ଆତ୍ମହତ୍ୟା ଉଦ୍ୟମ କରୁଥିବାବେଳେ କବାଟ ଭାଙ୍ଗି ତାଙ୍କୁ ଶ୍ୱଶୁର ସୁରେଶ ସାହୁ, ଶାଶୁ ଜୟନ୍ତୀ ସାହୁ ଏବଂ ଶଳା ଲିକୁନୁ ଉଦ୍ଧାର କରିଥିଲେ। ଏହାପରେ ସମସ୍ତେ ତାଙ୍କୁ ମରଣାନ୍ତକ ଆକ୍ରମଣ କରିଥିଲେ। ଏଥିରେ ସୁଭଦ୍ରା ହସ୍ତକ୍ଷେପ କରିଥିଲେ ମଧ୍ୟ କେହି ତାଙ୍କ କଥା କେହି ଶୁଣି ନ ଥିଲେ। ସୁରେଶ ଉତ୍ତ୍ୟକ୍ତ ହୋଇ ରଞ୍ଜନଙ୍କୁ ହାଣି ଦେଇଥିଲେ। ସେଠାରୁ କୌଣସି ମତେ ଜୀବନ ବିକଳରେ ଖସିଆସି ବସୁଲେଇ ଗ୍ରାମର ଏକ ପାଇଖାନା ଟାଙ୍କି ଉପରେ ରଞ୍ଜନ ରାତିସାରା କ୍ଷତାକ୍ତ ଅବସ୍ଥାରେ ପଡ଼ି ରହିଥିଲେ। ସକାଳେ ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ୧୦୮ ଆମ୍ବୁଲାନ୍ସରେ ତାଳଚେର ମଣ୍ଡାପାଳ ଡାକ୍ତରଖାନାକୁ ପଠାଇଥିଲେ। ବୁଧବାର ସେ ଏ ନେଇ ପରଜଙ୍ଗ ଥାନାରେ ପହଞ୍ଚତ୍ ଲିଖିତ ଅଭିଯୋଗ କରିଛନ୍ତି। ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଦଦରାଘାଟି ଫାଣ୍ଡି ଅଧିକାରୀ ସମରଜିତ ନାୟକ ସୂଚନା ଦେଇଛନ୍ତି।
