କଲମ୍ବୋ, ୧୯ା୫ (ପି.ଟି.)-ଶ୍ରୀଲଙ୍କା ସରକାର ହୋମାଗାମାଠାରେ ଦେଶର ସର୍ବବୃହତ୍ କ୍ରିକେଟ ଷ୍ଟାଡିୟମ ନିର୍ମାଣ ଯୋଜନା ଚଳାଇଛନ୍ତି। ପୂର୍ବତନ ଅଧିନାୟକ ମାହେଲା ଜୟବର୍ଦ୍ଧନେ କିନ୍ତୁ ଆଶ୍ଚର୍ଯ୍ୟ ପ୍ରକଟ କରିଛନ୍ତି। ବର୍ତ୍ତମାନ ଦେଶରେ ଯେତିକି ଭିତ୍ତିଭୂମି ରହିଛି ତାହାର ସଦୁପଯୋଗ ହୋଇପାରୁ ନ ଥିବାବେଳେ ସରକାର କେଉଁ ଦୃଷ୍ଟିରୁ ଆଉ ଏକ ଷ୍ଟାଡିୟମ ନିର୍ମାଣ ପାଇଁ ଅଗ୍ରସର ହେଉଛନ୍ତି ବୋଲି ସେ କହିଛନ୍ତି। ଦେଶରେ ସର୍ବବୃହତ୍ ଷ୍ଟାଡିୟମ ନିର୍ମାଣ ହେବାକୁ ଯାଉଥିବା ସମ୍ପର୍କରେ ସରକାର ରବିବାର ଶ୍ରୀଲଙ୍କା କ୍ରିକେଟ ସହ ମିଳିତଭାବେ ଘୋଷଣା କରିଛନ୍ତି। ହୋମାଗାମା ଅନ୍ତର୍ଗତ ଦିୟାଗାମାଠାରେ ୨୬ ଏକର ପରିମିତ ଅଞ୍ଚଳରେ ନିର୍ମିତ ହେବାକୁଥିବା ଏହି ଷ୍ଟାଡିୟମର ଦର୍ଶକ କ୍ଷମତା ୬୦,୦୦୦ ରଖାଯାଇଛି। ଏଥିରେ ଫ୍ଲଡ୍ଲାଇଟ୍ ବ୍ୟବସ୍ଥା ରହିବ। ୩ବର୍ଷ ମଧ୍ୟରେ ଏହାର ନିର୍ମାଣ କାର୍ଯ୍ୟ ଶେଷ ହେବ। ଏଥିରେ ୩୦ରୁ ୪୦ନିୟୁତ ଆମେରିକୀୟ ଡଲାର ବ୍ୟୟ ହେବ। ଶ୍ରୀଲଙ୍କାରେ ବର୍ତ୍ତମାନ ୮ଟି ଅନ୍ତର୍ଜାତୀୟ ଷ୍ଟାଡିୟମ ରହିଛି। ସେଗୁଡ଼ିକ ହେଲା କାଣ୍ଡି, ଗାଲେ, କଲମ୍ବୋ, ହାମ୍ବାନ୍ଟୋଟା, ଦାମ୍ବୁଲା, ପାଲିକେଲ୍ ଏବଂ ମୋରାତୁଓ୍ବା। ଜୟବର୍ଦ୍ଧନେ କହିଛନ୍ତି, ଦେଶରେ ବର୍ତ୍ତମାନ ଯେତୋଟିି ଷ୍ଟାଡିୟମ ରହିଛି ସେଥିରେ ଯଥେଷ୍ଟ ସଂଖ୍ୟାରେ ଅନ୍ତର୍ଜାତୀୟ ଅବା ଘରୋଇ ପ୍ରଥମଶ୍ରେଣୀ ମ୍ୟାଚ ଖେଳାଯାଇ ପାରୁ ନ ଥିବା ବେଳେ ନୂଆ ଷ୍ଟାଡିୟମର କୌଶସି ଆବଶକତା ନ ଥିଲା। ଅନ୍ୟପରେ ଭବିଷ୍ୟତରେ ଇଣ୍ଟରନ୍ୟାଶନାଲ କ୍ରିକେଟ କାଉନ୍ସିଲ (ଆଇସିସି) ଇଭେଣ୍ଟ ଆୟୋଜନ ଅଧିକାର ହାସଲ କରିବା ଉଦ୍ଦେଶ୍ୟ ରଖି ଏହି ଷ୍ଟାଡିୟମ ନିର୍ମାଣ କରାଯାଉଥିବା କୁହାଯାଉଛି।
