ଐଶ୍ୱର୍ଯ୍ୟା ଏବଂ ଅଭିଷେକ ବଚ୍ଚନଙ୍କ ଝିଅ ଆରାଧ୍ୟାଙ୍କ ଓଜସ୍ବିନୀ ଭାଷଣ ଶୁଣି ଦର୍ଶକ ଚକିତ ହୋଇଯାଇଛନ୍ତି। ୮ ବର୍ଷୀୟା ଆରାଧ୍ୟା ଧୀରୁଭାଇ ଅମ୍ବାନୀ ସ୍କୁଲରେ ପାଠ ପଢୁଛନ୍ତି। ସେ ତାଙ୍କ ସ୍କୁଲର ବାର୍ଷିକୋତ୍ସବରେ ନାରୀ ସଶକ୍ତୀକରଣ ଉପରେ ଏକ ଭାଷଣ ଦେଇଛନ୍ତି, ଯାହାର ଫଟୋ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ପାରମ୍ପରିକ ପୋଷାକରେ ଆରାଧ୍ୟା ମଞ୍ଚ ଉପରକୁ ଆସି ବେଶ୍ ଗମ୍ଭୀର ଭାବରେ ତାଙ୍କର ଏହି ଭାଷଣ ଦେଇଥିଲେ। ଏଥିରେ ସେ କହିଛନ୍ତି, ମୁଁ ଝିଅ, ମୁଁ ସ୍ବପ୍ନ, ନୂଆ ଯୁଗର ସ୍ବପ୍ନ, ଏକ ନୂଆ ଦୁନିଆରେ ଆମକୁ ଜାଗ୍ରତ ହେବାକୁ ପଡ଼ିବ। ମୁଁ ଏମିତି ଏକ ଦୁନିଆ ଚାହୁଁଛି, ଯେଉଁଠି ସୁରକ୍ଷିତ ରହିପାରିବି। ମୋତେ ସମସ୍ତେ ସ୍ନେହ ଶ୍ରଦ୍ଧା କରିବା ଦରକାର, ମୋତେ ସମ୍ମାନ କରିବା ଦରକାର। ମୁଁ ଏମିତି ଦୁନିଆ ଚାହୁଁଛି, ଯେଉଁଠି ପାଠ୍ୟପୁସ୍ତକରେ ଜୀବନ ଜ୍ଞାନ ରହିବା ଦରକାର। ତେବେ ଯାଇ ମାନବତା ସ୍ବତନ୍ତ୍ର ଭାବରେ ବଢ଼ିପାରିବ।
ଆରାଧ୍ୟାଙ୍କ ଏହି ଭାଷଣ ଶୁଣି ପୂରା ବଚ୍ଚନ ପରିବାର ଖୁସିରେ ଆତ୍ମବିଭୋର ହୋଇଯାଇଥିଲେ। ଜଣେ ପ୍ରଶଂସକ ଆରାଧ୍ୟାଙ୍କ ଏହି ଭାଷଣକୁ ସୋସିଆଲ ମିଡିଆରେ ଶେୟାର କରିଛନ୍ତି। ଏହା ଦେଖି ଅମିତାଭ କହିଛନ୍ତି, ଗୋଟିଏ ପରିବାରର ଗୌରବ, ଗୋଟିଏ ଝିଅ ପାଇଁ ଗୌରବ, ସମସ୍ତ ମହିଳାଙ୍କ ପାଇଁ ଗୌରବ ହେଉଛନ୍ତି ଆମ ଆରାଧ୍ୟା।