ମୁମ୍ବାଇ, ୧୮।୬ (ପି.ଟି.)-ଏକ ମହତ ଉଦ୍ଦେଶ୍ୟ ଲକ୍ଷ୍ୟରେ ଅଷ୍ଟ୍ରେଲିଆର ପୂର୍ବତନ ଅଧିନାୟକ ଷ୍ଟିଭ୍ ଓ୍ବଙ୍କ ମ୍ୟାନେଜର ହର୍ଲେ ମେଡ୍କାଫ୍ ଭାରତର ଶାରୀରିକ ଅନଗ୍ରସର କ୍ରିକେଟରଙ୍କୁ ୧.୫ ଲକ୍ଷଟଙ୍କା ସହାୟତା କରିଛନ୍ତି। ଏହି ଖେଳାଳିମାନେ କରୋନା ଭାଇରସ ସଂକ୍ରମଣ ଜନିତ ଲକ୍ଡାଉନ୍ ସ୍ଥିତିଯୋଗୁ ଆର୍ଥିକ ଦୁର୍ବଳ ହୋଇ ଯାଇଥିଲେ। ଫିଜିକାଲି ଚ୍ୟାଲେଞ୍ଜଡ୍ କ୍ରିକେଟ ଆସୋସିଏଶନ ଅଫ୍ ଇଣ୍ଡିଆ (ପିସିସିଏଆଇ) ଅଧୀନରେ ଥିବା ଅସମର୍ଥ ଖେଳାଳିଙ୍କୁ ସହାୟତା ପାଇଁ ମେଡକାଫ ଯୋଜନା କରିଛନ୍ତି ବୋଲି ଏହାର ସମ୍ପାଦକ ରବି ଚୌହାନ ପ୍ରକାଶ କରିଛନ୍ତି। ପିସିସିଏଆଇର କେତେକ ଖେଳାଳି କଠିନ ସମୟ ଦେଇ ଗତି କରୁଛନ୍ତି ବୋଲି ଜାଣିବାପରେ ମେଡକାଫ୍ ଅର୍ଥ ସଂଗ୍ରହ ପାଇଁ ଉଦ୍ୟମ କରିଛନ୍ତି । ଏହା ଫଳପ୍ରଦ ହୋଇଛି ଏବଂ ସେ ୧,୫୦,୦୦୦ ଟଙ୍କା ସଂଗ୍ରହ କରି ପାରିଛନ୍ତି। ଏହି ଅର୍ଥରାଶି ନିହାତି ଆବଶ୍ୟକ କରୁଥିବା ପିସିସିଏଆଇର ୩୦ ଖେଳାଳିଙ୍କୁ ପ୍ରଦାନ କରାଯିବ“ ବୋଲି ଚୌହାନ କହିଛନ୍ତି। ପ୍ରତି ଖେଳାଳିଙ୍କ ଆକାଉଣ୍ଟକୁ ୫ ହଜାର ଲେଖାଏ ଟଙ୍କା ପଠାଇ ଦିଆଯିବ ବୋଲି ସେ କହିଛନ୍ତି।