ଅନୁଗୋଳ ଅଫିସ, ୨୮।୫ – ଅନୁଗୋଳ ରେଳ ଷ୍ଟେଶନ ପରିସରରେ ଏଣେତେଣେ ପଡ଼ିଛି କେତେକ ବ୍ୟବହୃତ ପର୍ସନାଲ ପ୍ରୋଟେକ୍ଟିଭ୍ ଇକ୍ୟୁମେଣ୍ଟ ବା ପିପିଇ। ଏହାକୁ ନେଇ ରେଳ କର୍ମଚାରୀ ଓ କଲୋନୀବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଗତ ସୋମବାର ଗୁଜରାଟରୁ ଟ୍ରେନ୍ରେ ଆସିଥିବା ପ୍ରବାସୀମାନଙ୍କୁ ପ୍ରଶାସନ ଅନୁଗୋଳ ଷ୍ଟେଶନଠାରୁ ବସ୍ରେ ଘରକୁ ପଠାଇବା ବ୍ୟବସ୍ଥା କରିବା ବେଳେ ଡାକ୍ତର, ପୋଲିସ ଓ ଅନ୍ୟ ଅଧିକାରୀମାନେ ପିପିଇ ବ୍ୟବହାର କରିଥିଲେ। ହେଲେ ଏହାର ଠିକଣା ପରିଚାଳନା ପରିବର୍ତ୍ତେ ଅତ୍ୟନ୍ତ ବେପରୁଆ ଢଙ୍ଗରେ ଫିଙ୍ଗି ଦିଆଯାଇଥିବା କଲୋନୀବାସୀ ଅଭିଯୋଗ କରିଛନ୍ତି। ଏପରି କି ଅଭିଯୋଗ ପରେ ବି ପ୍ରଶାସନ କୌଣସି ପଦକ୍ଷେପ ନେଇ ନ ଥିବା ସେମାନେ କହିଛନ୍ତି।
କଲୋନୀବାସୀଙ୍କ କହିବା ଅନୁଯାୟୀ, ରେଳ ଷ୍ଟେଶନ୍ରେ ଓହ୍ଲାଇଥିବା ପ୍ରବାସୀମାନଙ୍କ ସଂସ୍ପର୍ଶରେ ଯେଉଁମାନେ ସିଧାସଳଖ ଆସିଥିଲେ ସେମାନେ ସୁରକ୍ଷା ଦୃଷ୍ଟିରୁ ପିପିଇ ପିନ୍ଧିଥିଲେ। ପ୍ରବାସୀମାନେ ଯିବା ପରେ ଷ୍ଟେଶନକୁ ସାନିଟାଇଜ କରାଯାଇଥିଲା। କିନ୍ତୁ ମେଡିକାଲ କର୍ମଚାରୀ ଓ ଅନ୍ୟମାନେ ପିନ୍ଧିଥିବା ପିପିଇଗୁଡ଼ିକ ରେଳ ଷ୍ଟେଶନ ନିକଟରେ ଫିଙ୍ଗି ଦିଆଯାଇଥିଲା। ନିୟମ ଅନୁଯାୟୀ ଉକ୍ତ ପିପିଇଗୁଡ଼ିକୁ ଏଣେତେଣେ ନ ପକାଇ ମେଡିକାଲ ବର୍ଜ୍ୟବସ୍ତୁ ଗାଡ଼ିରେ ନିଆଯାଇ ଚିହ୍ନଟ ସ୍ଥାନରେ ପୋତାଯିବା କଥା। କିନ୍ତୁ ସେପରି କରା ନ ଯାଇ ପିପିଇ, ଗ୍ଲୋବ୍ସ, ମାକ୍ସ ଆଦିକୁ ଷ୍ଟେଶନ ପରିସରରେ ଫିଙ୍ଗି ଦିଆଯାଇଥିବାରୁ ରେଳ କର୍ମଚାରୀ ଓ କଲୋନୀବାସୀ ଆଶଙ୍କା ମଧ୍ୟରେ ରହିଛନ୍ତି। ଏ ନେଇ ଷ୍ଟେଶନ ମ୍ୟାନେଜରଙ୍କଠାରୁ ଆରମ୍ଭ କରି ପ୍ରଶାସନକୁ ଜଣାଯାଇଥିଲେ ମଧ୍ୟ କୌଣସି ପଦକ୍ଷେପ ନିଆଯାଇ ନାହିଁ। ଘଟଣା ସମ୍ପର୍କରେ ଷ୍ଟେଶନ ମ୍ୟାନେଜର ଜିତେନ୍ଦ୍ର କୁମାର ସାହୁ କହିଛନ୍ତି, ପିପିଇ ଓ ଅନ୍ୟ ବ୍ୟବହୃତ ସାମଗ୍ରୀ ବାହାରେ ପଡ଼ିଥିବା ପ୍ରଶାସନକୁ ଅବଗତ କରାଯାଇଥିଲା। କିନ୍ତୁ ଏହାକୁ ସଫା କରାଯାଇ ନାହିଁ। ଜିଲା ମୁଖ୍ୟ ଚିକିତ୍ସାଧିକାରୀ ପ୍ରତାପ ବେହେରା କହିଛନ୍ତି, ଏପରି ଘଟଣା ନଜରକୁ ଆସିନାହିଁ। ଗଣମାଧ୍ୟମ ନିକଟରୁ ଅବଗତ ହୋଇଛି। ଅନୁଧ୍ୟାନ ପରେ ପଦକ୍ଷେପ ନିଆଯିବ।