ଲଣ୍ଡନ, ୧୭।୭(ପି.ଟି.)- ବିଶ୍ୱକପ୍ ହିରୋ ଇଂଲଣ୍ଡ ଅଲ୍ରାଉଣ୍ଡର ବେନ୍ ଷ୍ଟେକ୍ସଙ୍କୁ ନାଇଟ୍ ଉପାଧି ପ୍ରଦାନ କରାଯିବ। ଦିନିକିଆ ବିଶ୍ୱକପ୍ ଫାଇନାଲ ମ୍ୟାଚ୍ରେ ନ୍ୟୁଜିଲାଣ୍ଡ ବିପକ୍ଷରେ ଷ୍ଟୋକ୍ସ ଜବରଦସ୍ତ ପ୍ରଦର୍ଶନ କରିଥିଲେ ଓ ଇଂଲଣ୍ଡକୁ ଚାମ୍ପିୟନ କରାଇବାରେ ମୁଖ୍ୟ ଭୂମିକା ଗ୍ରହଣ କରିଥିଲେ। ଏହି ନିର୍ଣ୍ଣାୟକ ମ୍ୟାଚ୍ରେ ସେ ୯୮ଟି ବଲର ସମ୍ମୁଖୀନ ହୋଇ ଉପଯୋଗୀ ୮୪ ରନ ସଂଗ୍ରହ କରିଥିଲେ ଓ ମ୍ୟାଚ୍କୁ ଟାଇ କରାଇବାରେ ସେ ମୁଖ୍ୟ ଭୂମିକା ଗ୍ରହଣ କରିଥିଲେ। ଷ୍ଟୋକ୍ସଙ୍କ ଏହି ସାହସିକ ପ୍ରଦର୍ଶନ ଇଂଲଣ୍ଡ ପ୍ରଧାନମନ୍ତ୍ରୀ ପଦ ଦୌଡ଼ରେ ଆଗରେ ଥିବା ଦୁଇ ପ୍ରାର୍ଥୀ ବୋରିସ୍ ଜନସନ ଓ ଜେରେମି ହଣ୍ଟଙ୍କୁ ବେଶ୍ ପ୍ରଭାବିତ କରିଛି।
ଷ୍ଟୋକ୍ସଙ୍କୁ ନାଇଟ ଉପାଧି ମିଳିବା ଉଚିତ ନେଇ ପ୍ରଶ୍ନ ହେବାକୁ ଜନସନ ‘ନିଶ୍ଚିତ ଭାବେ ହଁ’ ବୋଲି ଉତ୍ତର ଦେଇଛନ୍ତି। ହଣ୍ଟ ମଧ୍ୟ ଏହି ପ୍ରଶ୍ନର ସମାନ ଉତ୍ତର ଦେଇଛନ୍ତି। ସୂଚନାଯୋଗ୍ୟ ଯେ, ଏପର୍ଯ୍ୟନ୍ତ କ୍ରିକେଟରେ ଅବଦାନ ପାଇଁ ୧୧ଜଣ ଇଂଲଣ୍ଡ କ୍ରିକେଟରଙ୍କୁ ନାଇଟ୍ ଉପାଧିରେ ଭୂଷିତ କରାଯାଇଛି। ଶେଷଥର ପାଇଁ ପୂର୍ବତନ ଟେଷ୍ଟ ଓ ଦିନିକିଆ ଅଧିନାୟକ ଆଲିଷ୍ଟର କୁକ୍ଙ୍କୁ ଏହି ସମ୍ମାନ ପ୍ରଦାନ କରାଯାଇଥିଲା। ୨୮ ବର୍ଷୀୟ ଷ୍ଟୋକ୍ସ ବ୍ରିଷ୍ଟଲରେ ଏକା ମାରପିଟ୍ ଘଟଣା ପାଇଁ ତଦନ୍ତର ସମ୍ମୁଖୀନ ହୋଇଥିଲେ ଓ ୨୦୧୭-୧୮ ଆଶେସ ଖେଳିବାରୁ ବଞ୍ଚିତ ହୋଇଥିଲେ। ତେବେ ପରେ ସେ ଏଥିରେ ନିର୍ଦ୍ଦୋଷ ସାବ୍ୟସ୍ତ ହୋଇଥିଲେ। ଷ୍ଟୋକ୍ସ ସଦ୍ୟସମାପ୍ତ ବିଶ୍ୱକପ୍ରେ ମୋଟ ଉପରେ ୪୬୫ ରନ ସଂଗ୍ରହ କରିବା ସହ ୭ଟି ଉଇକେଟ ଅକ୍ତିଆର କରିଥିଲେ। ଅଧିନାୟକ ଇଅନ ମୋର୍ଗାନ ଷ୍ଟୋକ୍ସଙ୍କ ପ୍ରଦର୍ଶନକୁ ଭୂୟସୀ ପ୍ରଶଂସା କରିଛନ୍ତି। ଷ୍ଟୋକ୍ସଙ୍କୁ ସେ ଅସାଧାରଣ ଓ ଅତିମାନବୀୟ ବୋଲି ଘୋଷଣା କରିଥିଲେ।