ବାଲେଶ୍ୱର ଅଫିସ,୧୨।୧୧- ବାଲେଶ୍ୱର ଜିଲାର କାଠ ଶିଳ୍ପ ସହିତ ପ୍ରତ୍ୟକ୍ଷ ଓ ପରୋକ୍ଷ ଭାବରେ ଜଡ଼ିତ ଥିବା ବିଭିନ୍ନ ବର୍ଗର ୧୨ଶହରୁ ଊର୍ଦ୍ଧ୍ୱ ଶ୍ରମିକ ପରିବାର କାମଧନ୍ଦା ହରାଇ ସଙ୍କଟରେ ପଡ଼ିଛନ୍ତି। ରୋଜଗାର ନ ଥିବାରୁ ଆର୍ଥିକ ଦୁତ୍ଃସ୍ଥିତି ମଧ୍ୟରେ ସେମାନେ ଚିନ୍ତାରେ ଦିନ କାଟୁଛନ୍ତି ବୋଲି ଜୀବନ ଜୀବିକା ସୁରକ୍ଷା ସଂଯୁକ୍ତ ଗଣ ସଂଗ୍ରାମ କମିଟି ପକ୍ଷରୁ କୁହାଯାଇଛି। ସୋମବାର ପୂର୍ବାହ୍ନରେ ଷ୍ଟେଶନ ଛକ ସ୍ଥିତ ଏକ ଘରୋଇ ହୋଟେଲ ସମ୍ମିଳନୀ କକ୍ଷରେ ଆୟୋଜିତ ଏକ ଖବରଦାତା ସମ୍ମିଳନୀରେ ଅନୁଷ୍ଠାନର ସଭାପତି ମଣିଭଦ୍ର ସାହୁ, ସମ୍ପାଦକ ପ୍ରବୋଧ କୁମାର ପରିଡ଼ା, କୋଷାଧ୍ୟକ୍ଷ ଯୋଗେଶ ପଟେଲ ମିଳିତ ଭାବେ ଏହା ପ୍ରକାଶ କର କହିଛନ୍ତି, ସ’ ମିଲ୍ ସପିଟ୍ କଣ୍ଟ୍ରୋଲ ଆକ୍ଟ ୧୯୮୦-୮୧ ଅନୁଯାୟୀ ବାଲେଶ୍ୱର ଜିଲାରେ ୧୪ଟି କରତକଳକୁ ଅନୁମତି ମିଳିଥିଲା। ୧୯୯୬ ରେ ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁସାରେ ଜଙ୍ଗଲରୁ ୧୦କି.ମି. ପରିସରରେ କୌଣସି ସ’ମିଲ୍କୁୁ ଅନୁମତି ଦିଆ ନ ଯିବାରୁ ୨୦୦୨ରୁ ଏହି ଜିଲାର କୌଣସି ସ’ମିଲ୍କୁ ସରକାରୀ ଅନୁମତି ମିଳି ନାହିଁ। ସ୍ଥାନୀୟ ଆବଶ୍ୟକତାକୁ ଆଖି ଆଗରେ ରଖି କେତେକ ଲୋକ ବେଆଇନ୍ ଭାବେ ସ’ମିଲ୍ ଚଲାଇ ଥିଲେ। ୨୦୧୧ରେ ରାଜ୍ୟ ସରକାର ସ’ ମିଲ୍ ସପିଟ୍ କଣ୍ଟ୍ରୋଲ ଆକ୍ଟର (ଇଣ୍ଡଷ୍ଟ୍ରିଆଲ ଆକ୍ଟ) ଅନୁଯାୟୀ ପ୍ରତ୍ୟେକ ଜିଲାରେ ୨ଟି କରି ସ’ ମିଲ୍ ଚଳାଇବାକୁ ପାଇଁ ଅନୁମତି ଦେଇଥିଲେ। ଏହାପରଠାରୁ ଜିଲାରେ ପଣପଣାରେ ୨ଟି ଓ ସୋମନାଥପୁରରେ ୪ଟି ସ’ ମିଲ୍ କାର୍ଯ୍ୟ କରୁଛି। ଜିଲାରେ ଅନ୍ୟତ୍ର ଚାଲୁଥିବା ୬୦ରୁ ଊର୍ଦ୍ଧ୍ୱ ସ’ ମିଲ୍ ବନ୍ଦ ହୋଇ ପଡ଼ିଛି। ଏଥିରେ କାର୍ଯ୍ୟରତ ୧୨ଶହରୁ ଊର୍ଦ୍ଧ୍ୱ ଶ୍ରମିକ ବୃତ୍ତି ହରାଇ ଚିନ୍ତାରେ ରହିଛନ୍ତି। ଏଥିସହିତ କାଠ ଶିଳ୍ପ ସହିତ ଜଡ଼ିତ କାଠ ମିସ୍ତ୍ରି, ରାଜ ମିସ୍ତ୍ରି, ଡେକୋରେଟରଙ୍କୁ ନାହଁି ନ ଥିବା ଅସୁବିଧାରେ ପଡୁଛି। ଏପରିକି କୁକୁଡ଼ା ଫାର୍ମରେ ଆବଶ୍ୟକ ପଡୁଥିବା କାଠଗୁଣ୍ଡର ମଧ୍ୟ ଅଭାବ ଦେଖାଦେଇଛି। ଏଣୁ କାଠ ଶିଳ୍ପର ଆବଶ୍ୟକତା ଓ ଜୀବନ ଜୀବିକାର ସୁରକ୍ଷାକୁ ଦୃଷ୍ଟି ରଖି ସରକାର ଏହି ସମସ୍ୟା ପ୍ରତି ଦୃଷ୍ଟି ଦେବାକୁ ସଂଯୁକ୍ତ ଗଣ ସଂଗ୍ରାମ କମିଟି ପକ୍ଷରୁ ଦାବି କରାଯାଇଥିଲା।