ବରଗଡ଼ ଅଫିସ୍,୨୪।୪: ଲକ୍ ଡାଉନ୍ କଟକଣା ଲାଗୁ ହେବା ଦିନଠାରୁ ବରଗଡ଼ ବ୍ଲକ ବରଡ଼ୋଲର ସ୍ବେଚ୍ଛାସେବୀ ଅନୁଷ୍ଠାନ ସଂକଳ୍ପ ପରିବାର ପକ୍ଷରୁ ଅମୃତ ଆହାର, ଭୋକିଲା ପେଟକୁ ମୁଠାଏ ଅନ୍ନ ଅଭିଯାନ ଆରମ୍ଭ ହୋଇଛି । ଏହି ଅଭିଯାନରେ ଏଠାରେ ରହିଥିବା ପ୍ରବାସୀ ଶ୍ରମିକ, ଅସହାୟ ତଥା ସେମାନଙ୍କ ପରିବାର ଲୋକଙ୍କୁ ରନ୍ଧାଖାଦ୍ୟ ଯୋଗାଇ ଦିଆଯାଉଛି । ସଂକଳ୍ପ ପରିବାରର ଏହି ଅଭିଯାନ ୩୦ଦିନରେ ପହଞ୍ଚିଛି । ଶୁକ୍ରବାର ଏହି ଅଭିଯାନରେ ବରଗଡ଼ ଟାଉନ ଥାନା ପୋଲିସ, ପଶ୍ଚିମ ଓଡ଼ିଶା ଯୁବାମଞ୍ଚ ସାମିଲ ହୋଇଛି। ସଂକଳ୍ପ ପରିବାରର ସଭାପତି ରୋହିତ ଜୟସ୍ବାଲ, ସଂଯୋଜକ ବିକାଶ ଅଗ୍ରୱାଲ ତତ୍ତ୍ବାବଧାନରେ ଚାଲିଥିବା ଏହି ଅଭିଯାନରେ ସ୍ଥାନୀୟ ଘରୋଇ ବସଷ୍ଟାଣ୍ଡରେ ବରଗଡ଼ ଟାଉନ ଥାନାର ଏସ୍ଆଇ ଏସ.କେ ବଳିୟାର ସିଂ, ଏସ୍ଆଇ ସନୟ କୁମାର ନାଏକ ଏବଂ ଅନ୍ୟ ପୋଲିସ କର୍ମଚାରୀମାନେ ଉପସ୍ଥିତ ରହି ରନ୍ଧାଖାଦ୍ୟ ବିତରଣ କରିଥିଲେ । ସେହିପରି ବରଗଡ଼ ସିମେଣ୍ଟ ନଗରରେ ସ୍ଥାନୀୟ ବିଧାୟକ ଦେବେଶ ଆଚାର୍ଯ୍ୟ ଉପସ୍ଥିତ ରହିଥିଲେ । ପଶ୍ଚିମ ଓଡ଼ିଶା ଯୁବାମଞ୍ଚର ସଭାପତି ଅଜିତ୍ ପତି, ସୋହେଲାର କୋଶଲ ସଂଗ୍ରାମୀ ଆକାଶ ପଣ୍ଡା ପ୍ରମୁଖ ଯୋଗଦେଇ ସହଯୋଗ କରିଥିଲେ । ସଂକଳ୍ପ ପରିବାରର ସମସ୍ତ କର୍ମକର୍ତ୍ତା, ସଭ୍ୟବୃନ୍ଦ ନିଜ ମଧ୍ୟରେ ପାଣ୍ଠି ସଂଗ୍ରହ କରି ଏଭଳି ସେବା ଯୋଗାଇ ଆସୁଛନ୍ତି।