ନୂଆଦିଲ୍ଲୀ,୨୫।୫ କରୋନା ସଂକ୍ରମଣରୁ ବଞ୍ଚିବା ଲାଗି ଲୋକମାନେ ସାଧାରଣ ପରିବହନ ବ୍ୟବସ୍ଥା ଠାରୁ ନିଜକୁ ଦୂରେଇ ରଖିବେ। ଏଥି ଲାଗି ଲୋକମାନେ ନିଜ ଲାଗି ଯାନ କିଣିବାକୁ ମନ ବଳାଇବେ ବୋଲି ଏକ ରିପୋର୍ଟରେ ଉଲ୍ଲେଖ ରହିଛି। ଏହା ଦ୍ୱାରା ଯାନ ଚାହିଦା ବଢିବ ବୋଲି ପ୍ରମୁଖ କମ୍ପାନୀଗୁଡିକ ଆଶାବାଦୀ ରହିଛନ୍ତି। ଲକ୍ଡାଉନ ପରେ ଲୋ ସେଗମେଣ୍ଟ ବିଶିଷ୍ଟ ଯାନଗୁଡିକର ଚାହିଦା ବଢିବା ନେଇ ପ୍ରମୁଖ ଯାନ ନିର୍ମାତା ମାରୁତି ସୁଜୁକି ଇଣ୍ଡିଆ ଆଶାବାଦୀ ରହିଛି। କମ୍ପାନୀର ସେଲ୍ସ ଏବଂ ମାର୍କେଟିଂ କାର୍ଯ୍ୟନିର୍ବାହି ନିର୍ଦ୍ଦେଶକ ଶଶାଙ୍କ ଶ୍ରୀବାସ୍ତବ କହିଛନ୍ତି , ଲୋକମାନେ ସାର୍ବଜନୀନ ପରିବହନ ବ୍ୟବସ୍ଥା ବାଦ ନିଜ ଯାନ କିଣିବା ଉପରେ ଫୋକସ କରିବେ। ବିଭିନ୍ନ ଗ୍ରାହକ ସର୍ଭେରୁ ଏହା ସାମ୍ନାକୁ ଆସିଛି। ବର୍ତ୍ତମାନ ଆର୍ଥତ୍କ କାର୍ଯ୍ୟକଳାପ ପ୍ରଭାବିତ ରହିଥିବାରୁ ଲୋକଙ୍କ କ୍ରୟ ଶକ୍ତି ଉପରେ ଏହାର ପ୍ରଭାବ ରହିଛି। ଏଭଳି ସ୍ଥିତିରେ ପ୍ରଥମଥର ଲାଗି ଯାନ କିଣୁଥିବା ଗ୍ରାହକ ମାନେ ଲୋ ସେଗମେଣ୍ଟ ମଡେଲ ଉପରେ ବିଶେଷ ଗୁରୁତ୍ୱ ଦେବେ ବୋଲି ଜଣାପଡିଛି। ହୋଣ୍ଡା କାର୍ସର ବରିଷ୍ଠ ଉପାଧ୍ୟକ୍ଷ ତଥା ନିର୍ଦ୍ଦେଶକ ରାଜେଶ ଗୋୟଲ କହିଛନ୍ତି ଯେ, ଲୋକମାନେ କୋଭିଡକୁ ନେଇ ସଜାଗ ଅଛନ୍ତି। ଏଣୁ ସାର୍ବଜନୀନ ପରିବହନ ଉପରେ ନିର୍ଭରତା କମିବ। ଫଳରେ କାର କିଣିବା ଲାଗି ଲୋକମାନେ ଅଗ୍ରସର ହେବ। ଲୋକମାନେ ନୂଆ କାର ସହ ୟୁଜଡ କାର ଉପରେ ଧ୍ୟାନ ଦେବେ। ଲୋକଙ୍କୁ ଶସ୍ତାରେ ଯାନ ଉପଲବ୍ଧ ହେବା ସହ ଏହା ବ୍ୟବହାର ଲାଗି ମଧ୍ୟ ସୁବିଧା ହେବ ବୋଲି ସେ ମତବ୍ୟକ୍ତ କରିଛନ୍ତି।