ଦିଗପହଣ୍ଡି,୧୫।୫(ଡି.ଏନ.ଏ.)-ଏକ ସଂଘବଦ୍ଧ ଆକ୍ରମଣ ମାମଲାରେ ଶୁକ୍ରବାର ଦିଗପହଣ୍ଡି ପୋଲିସ ଭୀଷ୍ମଗିରି ଗ୍ରାମର ଏମ. କଂଗ୍ରେସ ପାତ୍ର, ଏମ.ରାଜି ଓରଫ ରାଜେନ୍ଦ୍ର ପାତ୍ର ଦୁଇ ଭାଇଙ୍କ ସମେତ ତାଙ୍କ ସମ୍ପର୍କୀୟ ଏମ. ମାଗି ପାତ୍ରଙ୍କୁ ଗିରଫ କରି କୋର୍ଟଚାଲାଣ କରିଛି।
ପୋଲିସ କହିଛି, ଭୀଷ୍ମଗିରି ଗ୍ରାମରେ ଚାଷ ଜମି କ୍ରୟ ବିକ୍ରୟକୁ କେନ୍ଦ୍ର କରି ବି. ମଙ୍ଗଳା ପାତ୍ର ଏବଂ ଏମ.ସୁବୁଦ୍ଧି ପାତ୍ର ଦୁଇ ପରିବାର ମଧ୍ୟରେ ଦୀର୍ଘଦିନ ହେଲା ଅଶାନ୍ତି ଲାଗି ରହିଥିଲା। ଗତ ୯ ତାରିଖ ସକାଳେ ଏମ. ସୁବୁଦ୍ଧିଙ୍କ ପୁଅ ରାଜେନ୍ଦ୍ର ତାଙ୍କ ମଇଁଷି ପଲକୁ ବି. ମଙ୍ଗଳାଙ୍କ ରାଶି କିଆରିରେ ପୁରାଇ ରାଶି ଫସଲ ନଷ୍ଟ କରି ଦେଇଥିଲେ। ସାରେ ବି. ମଙ୍ଗଳା ଏବଂ ତାଙ୍କ ଭାଇ ବି. ବାଫୁଲୁ ଗ୍ରାମର ଉଷାକୋଠି ସାହିସ୍ଥିତ ଏମ. ସୁବୁଦ୍ଧିଙ୍କ ଘରକୁ ଯାଇ ପ୍ରତିବାଦ କରିବାରୁ ଏମ. ସୁବୁଦ୍ଧିଙ୍କ ପୁଅ ରାଜେନ୍ଦ୍ର ଓ ତାଙ୍କ ସମ୍ପର୍କୀୟ ଉଭୟ ଭାଇଙ୍କୁ ଖଣ୍ଡାରେ ଆକ୍ରମଣ କରିଥିଲେ। ଫଳରେ ଦୁଇ ଭାଇ ମଙ୍ଗଳା ଓ ବାଫୁଲୁ ଗୁରୁତର ହୋଇଥିଲେ। ଉଭୟଙ୍କୁ ସଙ୍କଟାପନ୍ନ ଅବସ୍ଥାରେ ବ୍ରହ୍ମପୁର ବଡ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ବି. କୁରେଶୁଙ୍କ ଅଭିଯୋଗକ୍ରମେ ଅଭିଯୁକ୍ତମାନଙ୍କ ବିରୋଧରେ ମାମଲା ରୁଜୁ ହୋଇଥିଲା। ତେବେ ଘଟଣା ଦିନଠାରୁ ଅଭିଯୁକ୍ତମାନେ ଫେରାର ଥିଲେ। ସେମାନେ ଗାଁକୁ ଫେରିଥିବା ଖବରପାଇ ତଦନ୍ତକାରୀ ପୋଲିସ ଅଧିକାରୀ ଏଏସଆଇ ଲାଚ୍ଛମେୟା ରେଡ୍ଡୀ ଚଢାଉ କରି ଅଭିଯୁକ୍ତମାନଙ୍କୁ ଗିରଫ କରିଥିଲେ।