ଜୟପୁର,୧୨।୨(ନି.ପ୍ର.) – ଜୟପୁର ସହରର ରାସ୍ତା ସଂପ୍ରସାରଣ କାମ ସରିଲା। କିନ୍ତୁ ରାସ୍ତା ମଝିରୁ ହଟିଲାନି ବିଦ୍ୟୁତ ଖୁଣ୍ଟ ଓ ନଳକୂପ। ପ୍ରଶାସନିକ ଅବହେଳା ଯୋଗୁ ୩ ବର୍ଷ ହେବ ସାଧାରଣ ଲୋକେ ଏହି କାରଣରୁ ହଇରାଣ ହେବା ସହ ଛୋଟ ବଡ଼ ଦୁର୍ଘଟଣା ମଧ୍ୟ ଘଟୁଛି।
୩ ବର୍ଷ ତଳେ ଜୟପୁର ସହରର ବେଲରୋଡରୁ ରାଞ୍ଚତ୍-ବିଜୟଓ୍ବାଡ଼ା କରିଡର ଯାଏ ରାସ୍ତା ସଂପ୍ରସାରଣ କରାଯାଇଥିଲା। ଜବରଦଖଲକାରୀଙ୍କୁ ହଟାଇବା ପରେ ରାସ୍ତା ନିର୍ମାଣ କାମ ହୋଇଥିଲା। ଯୋଜନା ମୁତାବକ ପ୍ରସାଦ ରାଓପେଟାରୁ କୁମ୍ଭାରସାହି ଶେଷ ଯାଏ ଥିବା ବିଦ୍ୟୁତ ଓ ଟେଲିଫୋନ ଖୁଣ୍ଟ, ନଳକୂପ ସ୍ଥାନାନ୍ତର କରାଯିବାର ଥିଲା। କିନ୍ତୁ ତାହା ଆଜି ଯାଏ ହୋଇପାରି ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ସ୍ଥାନୀୟ ବାସିନ୍ଦା ବାରମ୍ବାର ଅଭିଯୋଗ କଲେ ମଧ୍ୟ ପ୍ରଶାସନ ଶୁଣୁନାହିଁ। ୩୨୬ ନମ୍ବର ଜାତୀୟ ରାଜପଥକୁ ସଂଯୋଗ କରିବା ପାଇଁ ଏହି ରାସ୍ତାକୁ ୪୦ ଫୁଟ ଓସାର କରାଯାଇଥିବା ବେଳେ କାମ ଶେଷ ହେବା କ୍ଷଣି ଖୁଣ୍ଟକୁ ସ୍ଥାନାନ୍ତର କରିବାକୁ ନିଷ୍ପତ୍ତି ହୋଇଥିଲା। ପୌରାଞ୍ଚଳ ଅଧୀନରେ ଥିବା ଏହି ରାସ୍ତା ପୂର୍ତ୍ତି ବିଭାଗ ଅଧୀନକୁ ଯିବା ପରେ ଖୁଣ୍ଟ ହଟାଇବା ପାଇଁ ବିଭାଗ ପକ୍ଷରୁ ସାଉଥ୍କୋ ନିକଟରେ ସ୍ଥାନାନ୍ତର ପାଇଁ ଅଟକଳ ହୋଇଥିବା ଟଙ୍କା ପଇଠ କରାଯାଇଥିଲା। ଏହା ସତ୍ତ୍ୱେ ଏଯାବତ୍ ଖୁଣ୍ଟ ହଟିନାହିଁ। ଏ ସମ୍ପର୍କରେ ପୌର କାର୍ଯ୍ୟନିର୍ବାହୀ ଅଧିକାରୀ ଆଲୋକ ରଞ୍ଜନ ସାମନ୍ତରାୟଙ୍କୁ ପଚାରିବାରୁ ସେ କହିଥିଲେ, ତୁରନ୍ତ ଖୁଣ୍ଟ ହଟାଇବାକୁ ସାଉଥ୍କୋ କର୍ତ୍ତୃପକ୍ଷଙ୍କୁ ଚିଠି କରି ଜଣାଇବି।