ଭୁବନେଶ୍ୱର, ୩।୧୧(ବ୍ୟୁରୋ)
ବହୁ ବାଦ ବିବାଦ ପରେ ମଧ୍ୟ ଭୁବନେଶ୍ୱର ମହାନଗର ନିଗମ(ବିଏମ୍ସି) ସଂଶୋଧିତ ହୋଲ୍ଡିଂ ଟିକସ ବା ସମ୍ପତ୍ତି ଟିକସ ଲାଗୁ କରିବାକୁ ବିଜ୍ଞପ୍ତି ପ୍ରକାଶ କରିଛି। ବିଏମ୍ସି ଅଞ୍ଚଳରେ ଜମି କିମ୍ବା ଘର କିଣିଥିବା ଲୋକମାନଙ୍କୁ ବର୍ଦ୍ଧିତ ଆକାର ଟିକସ ଦେବାକୁ ହେବ। ପ୍ରକାଶିତ ବିଜ୍ଞପ୍ତି ଅନୁଯାୟୀ ରାଜସ୍ବ ବିଭାଗ ଦ୍ୱାରା ନୂତନ ଭାବେ ଧାର୍ଯ୍ୟ କରାଯାଇଥିବା ଜମିର ବେଞ୍ଚମାର୍କ ମୂଲ୍ୟ ଅନୁଯାୟୀ ଟିକସ ଲାଗୁ କରାଯିବ। ଏଥିପାଇଁ ଜମି ମୂଲ୍ୟର ୦.୫% ଓ ସେହି ଜମି ଉପରେ ନିର୍ମାଣ ହୋଇଥିବା କୋଠାର ବାର୍ଷିକ ମୂଲ୍ୟକୁ ହିସାବ କରି ଟିକସ ନିର୍ଦ୍ଧାରଣ କରାଯାଇଛି। ଏଥିସହିତ ଘର କିଣୁଥିବା ବ୍ୟକ୍ତିମାନଙ୍କୁ ଘର ମୂଲ୍ୟକୁ ହିସାବକୁ ନେଇ ହୋଲ୍ଡିଂ ଟିକସ ଦେବାକୁ ପଡ଼ିବ। ଯଦି କୌଣସି ବ୍ୟକ୍ତି ନିଜ ଜମି ଉପରେ ନୂଆ କରି ଘର ନିର୍ମାଣ କରିଥିବେ ତେବେ ତାଙ୍କୁ ପୂର୍ତ୍ତ ବିଭାଗର କୋଠାଘର ନିର୍ମାଣ ଖର୍ଚ୍ଚ ନିର୍ଦ୍ଧାରଣ ଅନୁଯାୟୀ ଟିକସ ଦେବାକୁ ପଡ଼ିବ।
ବିଏମ୍ସି ଆଡିଶନାଲ କମିଶନର ସୁରଥଚନ୍ଦ୍ର ମଲ୍ଲିକ କହିଛନ୍ତି ଯେ, ନୂଆ ହୋଲ୍ଡିଂ ଟିକସକୁ ବିଭିନ୍ନ ରାଜନୈତିକ ଦଳ ଓ ନାଗରିକ ଅନୁଷ୍ଠାନ ବିରୋଧ କରୁଛନ୍ତି। ସେମାନେ ବିଏମ୍ସିକୁ ଦେଇଥିବା ଦାବିପତ୍ରକୁ ଆମେ ସାଧାରଣ ପ୍ରଶାସନ ବିଭାଗକୁ ପଠାଇଛୁ। ଏନେଇ ଆଲୋଚନା କରାଯିବ ବୋଲି ସେ କହିଛନ୍ତି। ଉଲ୍ଲେଖଯୋଗ୍ୟ, ସମାଜବାଦୀ ପାର୍ଟି, ସିପିଆଇ, ସିପିଆଇ ଏମ୍ଏଲ ଓ ଫରଓ୍ବାର୍ଡ ବ୍ଲକ୍ ସହ ଭୁବନେଶ୍ୱର ନାଗରିକ ମହାସଂଘ ନୂଆ ହୋଲ୍ଡିଂ ଟିକସକୁ ବିରୋଧ କରିବା ସହ ପୌର ନିର୍ବାଚନ ନ ହେବା ଯାଏ ସ୍ଥଗିତ ରଖିବାକୁ ଦାବି କରିଥିଲେ।
