ସଦାବିହାରୀ, ସଦାଫୁଲି ବା ନୟନ ତାରା ନାଁରେ ପରିଚିତ ଏହି ଫୁଲ ଦେଖିବାକୁ ଯେ ସୁନ୍ଦର ତା’ ନୁହେଁ ଏଥିରେ ରହିଛି ଔଷଧୀୟ ଗୁଣ। ଡାକ୍ତର ବସନ୍ତ ଲାଡଙ୍କ ଦ୍ୱାରା ଲିଖିତ ‘ଏ କମ୍ଲିଟ୍ ବୁକ୍ ଅଫ୍ ଆୟୁର୍ବେଦିକ ରିମେଡିଜ୍’ରେ ସଦାବିହାରୀର ଉପକାରିତା ବିଷୟରେ ବର୍ଣ୍ଣନା କରାଯାଇଛି।
-ଧଳା ରଙ୍ଗର ସଦାବିହାରୀ ଡାଇବେଟିସ୍ ରୋଗୀଙ୍କ ପାଇଁ ବେଶ୍ ଉପକାରୀ। ସକାଳୁ ଖାଲି ପେଟରେ ଧଳା ସଦାବିହାରୀ ଫୁଲର ୩-୪ଟି କଅଁଳିଆ ପତ୍ରକୁ ଚୋବାଇ ଖାଇ ଅଳ୍ପ ପାଣି ପିଇଲେ ଶର୍କରା ସ୍ତର ନିୟନ୍ତ୍ରଣରେ ରହିଥାଏ। ନିୟମିତ ଏହିପରି ୩ ମାସ କଲେ ଲାଭ ମିଳିଥାଏ।
-ସେହିପରି ଏହାର ପତ୍ରକୁ ଶୁଖାଇ ଗୁଣ୍ଡ କରି ପ୍ରତିଦିନ ଏଥିରୁ ଗୋଟିଏ ଚାମଚ ଫଳରସ ସହ ଖାଇଲେ ଡାଇବେଟିସ୍ ନିୟନ୍ତ୍ରଣରେ ରହିଥାଏ।
-ଗୋଲାପି ରଙ୍ଗର ସଦାବିହାରୀ ଫୁଲକୁ ଗୋଟିଏ କପ୍ ପାଣିରେ ସିଝାଇ ସକାଳୁ ଖାଲି ପେଟରେ ପିଇଲେ ଡାଇବେଟିସ୍ ପାଇଁ ଭଲ କାମଦିଏ।
-ମହୁମାଛି କାମୁଡିଲେ ସଦାବିହାରୀ ଫୁଲର ପତ୍ର ଭଲକାମ ଦିଏ। ଏହି ପତ୍ରର ରସକୁ ମହୁମାଛି କାମୁଡିବା ସ୍ଥାନରେ ଲଗାଇଲେ ଶୀଘ୍ର ଉପଶମ ମିଳିଥାଏ।
-ଶରୀରରେ କୌଣସି ସ୍ଥାନରେ ଘା’ ହୋଇଥିଲେ ସଦାବିହାରୀ ଗଛର କ୍ଷୀର ଲଗାଇଲେ ଏହା ଶୀଘ୍ର ଠିକ୍ ହୋଇଥାଏ।
-ସଦାବିହାରୀ ପତ୍ରର ରସ ସ୍କିନ୍ ଆଲର୍ଜି, କୁଣ୍ଡିଆ ଆଦି ସମସ୍ୟାରୁ ମୁକ୍ତି ଦେଇଥାଏ।