ଭୁବନେଶ୍ୱର,୨।୬(ବ୍ୟୁରୋ): ଦୁଇମାସର ଲକ୍ଡାଉନ୍ ପରେ ସୋମବାର ଥିଲା ଅନ୍ଲକ୍-୧.୦ର ପ୍ରଥମ ଦିନ। କେନ୍ଦ୍ର ସରକାରଙ୍କ ଦ୍ୱାରା ଜାରି ଗାଇଡ୍ଲାଇନ୍ ଅନୁଯାୟୀ ସବୁକିଛି ପୂର୍ବଭଳି ନ ହେଲେ ବି ପ୍ରାୟତଃ ସ୍ବାଭାବିକ ହୋଇଯିବ ବୋଲି ଆଶା କରାଯାଉଥିଲା। ଏଥିପାଇଁ ସକାଳ ହେବାକ୍ଷଣି ରାଜ୍ୟ ରାଜଧାନୀ ଚଳଚଞ୍ଚଳ ହୋଇଉଠିଥିଲା। ବଜାର ଓ ଅଫିସ୍ ଯିବାପାଇଁ ଲୋକେ ଘରୁ ବାହାରିଥିଲେ। ରାଜଧାନୀର ଟ୍ରାଫିକ୍ ପୁଣି ପୂର୍ବ ଅବସ୍ଥାକୁ ଫେରିବା ଭଳି ମନେହୋଇଥିଲା। ଦୋକାନ, ବଜାର ସବୁକିଛି ଖୋଲା ଥିବାବେଳେ ଲୋକେ ବିଭିନ୍ନ ସାମଗ୍ରୀ କିଣିବା ପାଇଁ ଭିଡ଼ ଜମାଇଥିଲେ। ପୁଣିଥରେ ସବୁକିଛି ଠିକ୍ ହୋଇଯିବ ଭାବି ଲୋକେ ବେଶ୍ ଖୁସି ଥିଲେ। ହେଲେ ଅପରାହ୍ନରେ ରାଜ୍ୟ ମୁଖ୍ୟ ଶାସନ ସଚିବ ଅସିତ ତ୍ରିପାଠୀଙ୍କ ଖବରଦାତା ସମ୍ମିଳନୀ ପରେ ସବୁକିଛି ଓଲଟପାଲଟ ହୋଇଯାଇଥିଲା। ଶନିବାର ଓ ରବିବାର ୧୧ଟି ଜିଲା ଶଟ୍ଡାଉନ୍ ସହ ରାତି ୭ରୁ ସକାଳ ୫ ପର୍ଯ୍ୟନ୍ତ କର୍ଫ୍ୟୁ ବଳବତ୍ତର ରହିବ ବୋଲି ସୂଚନା ଦେଇଥିଲେ। ତେବେ ଏହି ନିଷ୍ପତ୍ତିକୁ ନେଇ ସହରବାସୀ ଅସନ୍ତୋଷ ପ୍ରକାଶ କରୁଥିବା ଦେଖିବାକୁ ମିଳିଥିଲା। ବିଶେଷକରି ଆର୍ଥିକ କ୍ଷତି ସହୁଥିବା ଛୋଟ ବଡ଼ ବ୍ୟବସାୟୀମାନେ ପୁଣିଥରେ ରାତିରେ ବେପାର କରି ନ ପାରି ନିରାଶ ହୋଇ ଘରକୁ ଫେରିଥିଲେ। ଏନେଇ ରାଜମହଲ ଛକର ଜଣେ ମିଠା ବ୍ୟବସାୟୀ ଦେବପ୍ରସାଦ ସାହୁ କହିଛନ୍ତି, ଭଲ ବେପାର ହେବ ଭାବି ପୂର୍ବରୁ ବରାପାଇଁ ବିରିବାଟଣଠାରୁ ଆରମ୍ଭକରି ମିଠା ତିଆରି ପାଇଁ ଅଧିକ ଛେନା ମଗାଇଥିଲୁ। ହେଲେ ରାଜ୍ୟ ସରକାରଙ୍କ ନିଷ୍ପତ୍ତି ଯୋଗୁ ସବୁକିଛି ନଷ୍ଟ ହୋଇଗଲା। ଅଧା ବେପାର ବି ହୋଇପାରିଲାନି। ୭ଟା ନ ହେଉଣୁ ପୋଲିସ ଭୟରେ ସବୁକିଛି ବନ୍ଦକରି ଏବେ ଘରକୁ ଯାଉଛୁ। ଫଳ ବ୍ୟବସାୟୀ ରଘୁନନ୍ଦନ ମହାପାତ୍ର କହିଛନ୍ତି, ରାତ୍ରି କର୍ଫ୍ୟୁକୁ ଆମେ ସ୍ବାଗତ କରୁଛୁ। ହେଲେ ଶନିବାର ଓ ଶଟ୍ଡାଉନ୍ ହେଲେ ବ୍ୟବସାୟ ବହୁଳଭାବେ ପ୍ରଭାବିତ ହେବ। ଏମିତି ବି ପରିବାର ଚଳାଇବା ବହୁ କଷ୍ଟକର ହୋଇପଡ଼ୁଛି। ଏବେ ସପ୍ତାହକୁ ଦୁଇଦିନ ବେପାର ବନ୍ଦ ହେଲେ ଆମକୁ କିଏ କ୍ଷତିପୂରଣ ଦେବ ବୋଲି ସେ ପ୍ରଶ୍ନ କରିଥିଲେ।