ଜୟପୁର, ୭ା୩ (ନି.ପ୍ର) କୋରାପୁଟ ଜିଲା ଜୟପୁର ବ୍ଲକ ଅନ୍ତର୍ଗତ କୁମ୍ଭାରପୁଟ କୁମ୍ଭାରଙ୍କ ପାଇଁ ପ୍ରସିଦ୍ଧ। କିନ୍ତୁ ଗ୍ରାମରେ ରହୁଥିବା ୨ ପରିବାରଙ୍କ ଜୀବନ ଜୀବିକା ଏବେ ସଙ୍କଟରେ। ପରିବାରର ସମସ୍ତ ସଦସ୍ୟ ୨୪ ଘଣ୍ଟା କାମ କଲେ ମଧ୍ୟ ପେଟ ପୂରୁ ନାହିଁ । ଭବିଷ୍ୟତରେ କୁମ୍ଭାର ଚକ ବୁଲିବ କି ନାହିଁ ସେ ନେଇ ଚିନ୍ତାରେ ପରିବାର । ଗ୍ରାମରେ ଏକ ହାଣ୍ଡିଶାଳ ନିର୍ମାଣ ଓ ବଜାର ସୁବିଧା ନେଇ ବାରମ୍ବାର ଗୁହାରି କଲେ ମଧ୍ୟ କେହି ସେମାନଙ୍କ ଦୁଃଖ ଶୁଣୁନାହାନ୍ତି ।
ମାଟି ସହିତ ମଣିଷର ସମ୍ପର୍କ ଅତି ନିବିଡ । ଅନ୍ତୁଡିଶାଳରୁ ଶ୍ମଶାନ ପର୍ଯ୍ୟନ୍ତ ମାଟି ସାମଗ୍ରୀ ଲୋଡା । ଦିନ ଥିଲା ଏହା ଲୋକଙ୍କ ଜରୁରୀ ଥିଲା । ହେଲେ ବର୍ତ୍ତମାନ ଆଧୁନିକ ଯୁଗରେ ଏହାର ଚାହିଦା କମିବାରେ ଲାଗିଛି । ବଜାର ଚାହିଦା ହ୍ରାସ, ପ୍ରଶାସନ ତରଫରୁ ବଜାର ପାଇ ସୁଯୋଗ ନ ଦେବା, ଜାଳେଣିକାଠର ଅଭାବ, ଅତ୍ୟାବଶ୍ୟକ ସାମଗ୍ରୀର ଦର ବୃଦ୍ଧି କୁମ୍ଭାରଙ୍କ ପରିବାରକୁ ବେଶ୍ ପ୍ରଭାବିତ କରିଛି । ଉପଯୁକ୍ତ ପାରିଶ୍ରମିକ ମିଳୁ ନ ଥିବାରୁ ଅନେକ ପରିବାର ଏହି ବେଉସାକୁ ଛାଡିବାରେ ଲାଗିଲେଣି । କୁମ୍ଭାରପୁଟ ଗ୍ରାମରେ ହାତଗଣତି ପରିବାର ଏହି କାୈଳିକ ବୃତ୍ତିକୁ ବଞ୍ଚାଇ ରଖିଛନ୍ତି। ସକାଳ ହେବା ମାତ୍ରେ ପରିବାର ଲୋକେ ଦୀପ, ରୁଖା, କଳସ, ହାଣ୍ଡି, ପାଣି ହାଣ୍ଡି ଆଦି ମାଟି ସାମଗ୍ରୀ ପ୍ରସ୍ତୁତ କରିବାରେ ଲାଗି ପଡ଼ନ୍ତି । ଏହି କାମରେ ପୁରୁଷମାନଙ୍କୁ ଘରର ମହିଳାମାନେ ସହଯୋଗ କରିଥାନ୍ତି । ପରିବାରର ସମସ୍ତ ସଦସ୍ୟ ଏହି କାମ କରୁଥିଲେ ମଧ୍ୟ ପରିବାର ଚଳିବା କଷ୍ଟକର ହୋଇପଡ଼େ ସେମାନଙ୍କର । ସରକାରଙ୍କ କୌଣସି ଯୋଜନା ମଧ୍ୟ ଏମାନଙ୍କ ଲାଗି ନାହିଁ । ମାଟି ପାତ୍ର ତିଆରି କରିବା ପରେ ସେମାନେ ଜୟପୁରକୁ ଆସି ସାହି ସାହି ବୁଲି ବିକ୍ରି କରିଥାନ୍ତି । ଏମାନଙ୍କ ପାଇଁ ପୌରପରିଷଦ କି ପ୍ରଶାସନ ତରଫରୁ ମାଟି ଜିନିଷ ବିକ୍ରି କରିବା ଲାଗି ବଜାର ସୁବିଧା କରାଯାଉନାହିଁ । ଫଳରେ କମ ଦରରେ ଘର ଘର ବୁଲି ବିକ୍ରି କରିବାକୁ ପଡ଼ିଥାଏ ସେମାନଙ୍କୁ । ଦୈନିକ ଶହେରୁ ୨ ଶହ ଟଙ୍କା ରୋଜଗାର କରିଥାନ୍ତିି । ଏତିକି ରୋଜଗାରରେ ପରିବାର ଚଳାଇବା ସେମାନଙ୍କ ପାଇଁ କାଠିକାର ପାଠ । ହାଣ୍ଡିଶାଳଟିଏ ନିର୍ମାଣ କରିବା ପାଇଁ ଗୁହାରି କରି ଥକିଲେଣି । କିନ୍ତୁ କୌଣସି ନେତା କି ପ୍ରଶାସନ କର୍ଣ୍ଣପାତ କରୁ ନାହାଁନ୍ତି । ବର୍ଷ କୁ ୬ ମାସ କାମ କଲେ ୬ ମାସ ବନ୍ଦ ସେମାନଙ୍କର ଏହି କାମ । ସରକାରଙ୍କ ଆନ୍ତରିକତା ଅଭାବରୁ କୁମ୍ଭାରପୁଟ କୁମ୍ଭାରମାନେ କୌଳିକ ବୃତ୍ତିକୁ ଛାଡି ଅନ୍ୟ କାମ କରିବା ସହ ଦାଦନ ଖଟିବାକୁ ବାହାରକୁ ଯାଉଛନ୍ତି ବୋଲି ଗ୍ରାମର ରଘୁ ନାଥ କୁମ୍ଭାର, ଲବ କୁମ୍ଭାର, ଇଶ୍ୱର କୁମ୍ଭାର, ସୁନା ଧର କୁମ୍ବାର ପ୍ରକାଶ କରିଛନ୍ତି।