ବୁଗୁଡ଼ା,୧୪ା୬(ଡି.ଏନ.ଏ.)- ନିକଟସ୍ଥ ବେତାରସିଂ ଗ୍ରାମର ଜଣେ ସୁରଟ ଫେରନ୍ତା ପଜିଟିଭ ଚିହ୍ନଟ ପରେ ପ୍ରଶାସନ ପକ୍ଷରୁ କଣ୍ଟାକ୍ଟ ଟ୍ରେସିଂ ଆରମ୍ଭ ହୋଇଥିଲା। ତାଙ୍କ ସଂସ୍ପର୍ଶରେ ବୁଗୁଡ଼ା ଷ୍ଟେଟବ୍ୟାଙ୍କ ଛକର ଜନୈକ ଗାଡ଼ି ମାଲିକ ଆସିଥିବା ଜଣାପଡିବାରୁ ତାଙ୍କ ପରିବାରକୁ ସଙ୍ଗରୋଧରେ ନେବାକୁ ନିଷ୍ପତ୍ତି ହୋଇଥିଲା। ମାତ୍ର ସଙ୍ଗରୋଧ କେନ୍ଦ୍ର ଯିବାକୁ ସେମାନେ ରାଜି ହୋଇ ନ ଥିଲେ। ଫଳରେ ପୋଲିସ ଓ ପ୍ରଶାସନକୁ ଦୀର୍ଘ ୪ ଘଣ୍ଟା ନାକେଦମ୍ ହେବାକୁ ପଡିଥିଲା। ଶେଷରେ ଉକ୍ତ ପରିବାରର ୫ ମହିଳାଙ୍କ ସମେତ ୮ ଜଣଙ୍କୁ ରବିବାର ସନ୍ଧ୍ୟା ସାଢ଼େ ୭ଟାରେ ଗୋଲିଆର ୨ ସଙ୍ଗରୋଧ କେନ୍ଦ୍ରକୁ ପଠାଯାଇଛି। ସମ୍ପୃକ୍ତ ଗାଡ଼ି ଚାଳକ ଓ ବେତାରସିଂରୁ ବୁଗୁଡ଼ାର ବିଭିନ୍ନ ସ୍ଥାନକୁ ଆଣିଥିବା ଜଣେ ଅଟୋ ଚାଳକ ସମେତ ଅନ୍ୟ ୪ ଜଣଙ୍କୁ ମଧ୍ୟ ସଙ୍ଗରୋଧ କେନ୍ଦ୍ରକୁ ପଠାଯାଇଛି। ଏଥିସହ ସେ ଚିକିତ୍ସା ହୋଇଥିବା ନମିତା ପାଥୋଲୋଜିକୁ ଶନିବାର ରାତିରେ ସିଲ୍ କରିବା ସହ ମାଲିକଙ୍କ ପରିବାର ହୋମ୍ କ୍ୱାରାଣ୍ଟାଇନ୍ରେ ରହିଛନ୍ତି।