କବିସୂର୍ଯ୍ୟନଗର,୮ା୫(ଡି.ଏନ୍.ଏ.)- ଗଞ୍ଜାମ ଜିଲା କବିସୂର୍ଯ୍ୟନଗର ସହରର ମର୍ଦ୍ଦରାଜ ହାଇସ୍କୁଲ, ଅରବିନ୍ଦ ପୂର୍ଣ୍ଣାଙ୍ଗ ଶିକ୍ଷାକେନ୍ଦ୍ର, କବିସୂର୍ଯ୍ୟ ବଳଦେବ ବିଜ୍ଞାନ ମହାବିଦ୍ୟାଳୟରେ ସଙ୍ଗରୋଧ ଗୃହ କରାଯାଇଛି। ମର୍ଦ୍ଦରାଜ ହାଇସ୍କୁଲ ସଙ୍ଗରୋଧ ଗୃହର ଜଣେ ଓ ଅରବିନ୍ଦ ପୂର୍ଣ୍ଣାଙ୍ଗ ଶିକ୍ଷାକେନ୍ଦ୍ରର ୩ ଜଣ ସୁରଟ ଫେରନ୍ତା ଗୁରୁବାର ପାଚେରି ଡେଇଁ ମେରୁବନ୍ଧରେ ଗାଧୋଉଥିଲେ। ପୋଲିସ ଖବର ପାଇବା ପରେ ସେମାନଙ୍କୁ ଘଉଡାଇ ନେଇ ଉକ୍ତ ସଙ୍ଗରୋଧ ଗୃହରେ ଛାଡିଥିଲା। ଏଥିସହ ଅରବିନ୍ଦ ପୂର୍ଣ୍ଣାଙ୍ଗ ଶିକ୍ଷାକେନ୍ଦ୍ର ସଙ୍ଗରୋଧ ଗୃହର ଅନ୍ୟଜଣେ ସୁରଟ ଫେରନ୍ତା ନିକଟସ୍ଥ ଏଟିଏମ୍କୁ ଆସି ସକାଳେ ଟଙ୍କା ଉଠାଉଥିବା ଦେଖିବାକୁ ମିଳିଥିଲା। କବିସୂର୍ଯ୍ୟନଗର ଏନ୍ଏସିର ଜନବସତି ଅଞ୍ଚଳରେ ଅବସ୍ଥିତ ବୃନ୍ଦାବତୀ ବିଦ୍ୟାପୀଠ, ସରକାରୀ ବାଳିକା ବିଦ୍ୟାଳୟରେ ମଧ୍ୟ ପ୍ରବାସୀ ଓଡ଼ିଆ ରହିଛନ୍ତି। ସମସ୍ତେ ସ୍ଥାନୀୟ ଅଞ୍ଚଳର ହୋଇଥିବାରୁ ବଜାରର ଦୋକାନୀଙ୍କ ସହ ପରିଚିତ। ବାହାରେ ବୁଲୁଥିବାରୁ ଅଞ୍ଚଳବାସୀଙ୍କୁ ସଂକ୍ରମଣର ଆଶଙ୍କା ରହିଛି। ତେଣୁ ଏସବୁ ସଙ୍ଗରୋଧ ଗୃହ ସ୍ଥାନାନ୍ତର ପାଇଁ ଅଞ୍ଚଳବାସୀ ଦାବି କରିଛନ୍ତି।
ଏନେଇ ଏନ୍ଏସି ନିର୍ବାହୀ ଅଧିକାରୀ ବିବେକାନନ୍ଦ ନାୟକ କହିଛନ୍ତି, ଏନ୍ଏସିବାସୀଙ୍କୁ ଏନ୍ଏସି ଭିତରେ ନିୟମ ପ୍ରକାରେ ରଖାଯାଇଛି। ଲୋକେ ସଚେତନ ହେବାକୁ ପଡିବ, ନଚେତ୍ ଆଗକୁ ପରିସ୍ଥିତି ଜଟିଳ ହେବ।