ମୁମ୍ବାଇ, ୨୫।୪ (ପି.ଟି.): ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକରଙ୍କ ୧୦୦ ଅନ୍ତର୍ଜାତୀୟ ଶତକ ହାସଲ ରେକର୍ଡକୁ ଭାରତୀୟ ଅଧିନାୟକ ବିରାଟ କୋହଲି ଭାଙ୍ଗିପାରିବେ ବୋଲି ପୂର୍ବତନ ଅଷ୍ଟ୍ରେଲୀୟ ଦ୍ରୁତ ବୋଲର ବ୍ରେଟ୍ ଲି କହିଛନ୍ତି। ତେବେ ଏଥପାଇଁ କୋହଲି ଆଉ ୭-୮ ବର୍ଷ ନିରବଚ୍ଛିନ୍ନ ଭାବେ ଖେଳିବା ସହ ଏହି ଫର୍ମକୁ ବଜାୟ ରଖିବାକୁ ପଡିବ। ଦିନିକିଆରେ ସଚିନ ସର୍ବାଧିକ ୪୯ଟି ଶତକ ହାସଲ କରି ବିଶ୍ୱ ରେକର୍ଡ ସ୍ଥାପନ କରିଛନ୍ତି। ଏହି ଦୃଷ୍ଟିକୋଣରୁ ଦେଖିବାକୁ ଗଲେ କୋହଲି ୨୪୮ଟି ଦିନିକିଆ ଖେଳି ଏପର୍ଯ୍ୟନ୍ତ ୪୩ଟି ଶତକ ହାସଲ କରିସାରିଲେଣି।
ସେହିପରି ଟେଷ୍ଟ ଫର୍ମାଟ୍ରେ ମଧ୍ୟ ସଚିନ ସର୍ବାଧିକ ୫୧ଟି ଶତକ ହାସଲ କରି ବିଶ୍ୱ ରେକର୍ଡ କରିଛନ୍ତି। ତେବେ କୋହଲି ୮୬ଟି ଟେଷ୍ଟ ଖେଳି ଏପର୍ଯ୍ୟନ୍ତ ୨୭ଟି ଶତକ ହାସଲ କରିଛନ୍ତି। କୋହଲିଙ୍କ ପାଖରେ ପ୍ରତିଭା, ଫିଟ୍ନେସ୍ ଓ ମାନସିକ ଦୃଢତା ରହିଛି। ମାନସିକ ଦୃଢତାର କାରଣରୁ କୋହଲି ବିଦେଶରେ ମଧ୍ୟ ଅତି ସହଜରେ ଶତକ ହାସଲ କରିଛନ୍ତି। ତେଣୁ ସେ ସଚିନଙ୍କ ଏହି ରେକର୍ଡ ଭାଙ୍ଗିବା ଅସମ୍ଭବ ନୁହେଁ ବୋଲି ଲି କହିଛନ୍ତି। ଲି କ୍ୟାରିୟରରେ ୭୬ ଟେଷ୍ଟ, ୨୨୧ଟି ଦିନିକିଆ ମ୍ୟାଚ୍ ଖେଳିଛନ୍ତି।
ଆଗକୁ ଆଉ ୭-୮ ବର୍ଷ ଏହି ଭଳି ଖେଳ ଜାରି ରଖିଲେ କୋହଲି ନିଶ୍ଚିତ ଭାବେ ସଚିନଙ୍କ ରେକର୍ଡ ଭାଙ୍ଗିବେ। କ୍ରମାଗତ ୨୪ ବର୍ଷ ଖେଳିବା ପରେ ସଚିନ ୨୦୧୩ରେ ଅବସର ଘୋଷଣା କରିଥିଲେ। ସେ କ୍ରିକେଟର ପ୍ରାୟ ସବୁ ବ୍ୟାଟିଂ ରେକର୍ଡ ଭାଙ୍ଗିବାରେ ସକ୍ଷମ ହୋଇଥିଲେ। ସଚିନଙ୍କ ପଦାନୁସରଣ କରି କୋହଲି ଏବେ ସାରା ବିଶ୍ୱରେ ବହୁ ପରିମାଣରେ ରନ୍ ସଂଗ୍ରହ କରୁଛନ୍ତି ବୋଲି ଲି କହିଛନ୍ତି।