ମେଲବୋର୍ନ,୧୦।୪ (ପି.ଟି.): ମାଷ୍ଟର ବ୍ଲାଷ୍ଟର ସଚିନ ତେନ୍ଦୁଲକରଙ୍କ ପ୍ରଶଂସାରେ ଶତମୂଖ ହୋଇଛନ୍ତି ମାଇକେଲ କ୍ଲାର୍କ। ସେହିପରି ଭାରତୀୟ ଅଧିନାୟକ ବିରାଟ କୋହଲି ମଧ୍ୟ ସଚିନ୍ଙ୍କ ଭଳି ଜଣେ ମହାନ ବ୍ୟାଟ୍ସମ୍ୟାନ ବୋଲି କ୍ଲାର୍କ କହିଛନ୍ତି। ଏହି ଦୁଇ ଖେଳାଳିଙ୍କ ଟେକ୍ନିକ୍ ଅସାଧାରଣ। ତେଣୁ ଏହି ଭାରତୀୟ ବ୍ୟାଟ୍ସମ୍ୟାନଙ୍କୁ ଆଉଟ କରିବ ବେଶ କଷ୍ଟକର ବୋଲି ସେ ସ୍ବୀକାର କରିଛନ୍ତି। ତେନ୍ଦୁଲକରଙ୍କ ଭଳି ଜଣେ ସୟଂସମ୍ପୂର୍ଣ୍ଣ ବ୍ୟାଟ୍ସମ୍ୟାନ ବିଶ୍ୱରେ ବିରଳ। ମୋ ସମୟରେ ସେ ନିର୍ବିବାଦରେ ଶ୍ରେଷ୍ଠ ବୋଲି କ୍ଲାର୍କ କହିଛନ୍ତି।
ବୈଷୟିକ ଦୃଷ୍ଟିକୋଣରୁ ଦେଖିବାକୁ ଗଲେ ତେନ୍ଦୁଲକରଙ୍କ କୌଣସି ତ୍ରୁଟି ଥିବା ପରି ମନେ ହୁଏନାହିଁ ବୋଲି ‘ବିଗ୍ ସ୍ପୋଟର୍ସ ବ୍ରେକ୍ଫାଷ୍ଟ’ ନାମକ ଏକ ରେଡିଓ ଶୋ’କୁ ସାକ୍ଷାତକାର ଦେଇ କ୍ଲାର୍କ ଏହି କଥା କହିଛନ୍ତି। ତେବେ ବର୍ତ୍ତମାନ ପିଢିକୁ ବିଚାର କଲେ କୋହଳି ସବୁ ଫର୍ମାଟରେ ଶ୍ରେଷ୍ଠ ବୋଲି ସେ କହିଛନ୍ତି। ଦିନିକିଆ ଓ ଟି୨୦ ଫର୍ମାଟରେ କୋହଲି ହାସଲ କରିଥିବା ରେକର୍ଡ ଦୃଷ୍ଟାନ୍ତମୂଳକ। ଟେଷ୍ଟ କ୍ରିକେଟରେ ମଧ୍ୟ ସେ ବେଶ୍ ପ୍ରଭାବୀ ସାବ୍ୟସ୍ତ ହୋଇଛନ୍ତି। ବଡ଼ ବଡ଼ ଶତକ ହାସଲ କରିବାରେ କୋହଲି ଓ ସଚିନଙ୍କ ମଧ୍ୟରେ ସାମଞ୍ଜସ୍ୟ ରହିଛି। ବିଶ୍ୱର ଏକମାତ୍ର ବ୍ୟାଟ୍ସମ୍ୟାନ ଭାବେ ତେନ୍ଦୁଲକର ୨୦୦ ଟେଷ୍ଟ ମ୍ୟାଚ୍ ଖେଳିଛନ୍ତି ଓ ମୋଟ ଉପରେ ୧୦୦ ଅନ୍ତର୍ଜାତୀୟ ଶତକ ହାସଲ କରିଛନ୍ତି। ଟେଷ୍ଟରେ ସେ ୫୧ଟି ଶତକ ଓ ଦିନିକିଆରେ ୪୯ଟି ଅର୍ଦ୍ଧଶତକ ହାସଲ କରିଛନ୍ତି। ଟେଷ୍ଟରେ ସେ ସର୍ବାଧିକ ମୋଟ ୧୫,୯୨୧ ଓ ଦିନିକିଆରେ ସେ ୪୬୩ଟି ମ୍ୟାଚ୍ ଖେଳି ସର୍ବାଧିକ ୧୮, ୪୨୬ ରନ ସଂଗ୍ରହ କରିଛନ୍ତି। ଘରୋଇ ଗ୍ରାଣ୍ଡରେ ୨୦୧୩ରେ ଓ୍ବେଷ୍ଟଇଣ୍ଡିଜ ବିପକ୍ଷରେ ବିଦାୟୀ ଟେଷ୍ଟ ମ୍ୟାଚ ଖେଳି ସେ ଅବସର ଘୋଷଣା କରିଥିଲେ। କ୍ଲାର୍କ ମଧ୍ୟ ୧୧୫ଟି ଟେଷ୍ଟ ଖେଳି ୮, ୬୪୩ ରନ ସଂଗ୍ରହ କରିଛନ୍ତି ଓ ସେ ୨୮ଟି ଶତକ ହାସଲ କରିଛନ୍ତି। ସେହିପରି ୨୪୫ଟି ଦିନିକିଆ ମ୍ୟାଚ୍ ଖେଳି କ୍ଲାର୍କ ୭୯୮୧ ରନ ସଂଗ୍ରହ କରିଛନ୍ତି। ୩୯ ବର୍ଷୀୟ କ୍ଲାର୍କଙ୍କ ନେତୃତ୍ୱରେ ଅଷ୍ଟ୍ରେଲିଆ ୨୦୧୫ ବିଶ୍ୱକପ୍ ଟାଇଟଲ ହାସଲ କରିଥିଲା।